Muvhigo Wa Vhahuweleli Vha Muvhuso

“Vhathu vho Hangwiwaho” Vha a Humbulwa

MATHOMONI a 2001, Haykaz muswa a re na miṅwaha ya 15 wa Ṱhanzi ya Yehova yo dalela “Vhathu vho Hangwiwaho,” ṱanoni ḽa ngei Bern, kha ḽa Switzerland, ḽe ḽa vha ḽi tshi sumbedza nga ha u tovholwa ha Ṱhanzi dza Yehova nga tshigwada tsha Vhanazi. Musi a tshi fhedza madalo awe, Haykaz o ri: “Ndo vha ndi tshi pfa nga ha u farwa luvhi na u shengela he ha tshenzhelwa nga Ṱhanzi dza Yehova nga fhasi ha muvhuso wa Vhunazi, fhedzi holu lwo vha lu lwa u thoma ndi tshi vhona maṅwalwa a vhukuma na zwifanyiso zwa tshenetsho tshifhinga. Zwe zwa sumbedzwa henefho, mivhigo ya vhathu vhe vha vhona nga maṱo, na zwe zwa ambiwa nga vhaḓivhazwakale malugana na ḽeneḽo ṱano zwo kwama muhumbulo na mbilu yanga.”

Nga murahu ha tshifhinga, musi Haykaz o khethiwa uri a ṅwalele muvhigo vhane a dzhena navho kilasini tshikoloni tsha murole wa nṱha, o nanga tshiṱoho tshine tsha ri “Ṱhanzi dza Yehova—Vhathu vho Hangwiwaho vha Tshifhingani Tsha Vhunazi.” Mudededzi wawe o tenda tshenetsho tshiṱoho, fhedzi a vhudza Haykaz uri u fanela u sumbedza bugu ye a wana khayo eneo mafhungo. Haykaz a tendelana na wonoyo muhumbulo o takala. O ri: “Ndo ṅwala manweledzo a bugu dze dza vha dzi tshi amba nga ha Ṱhanzi dza Yehova tshifhingani tsha vhuvhusi ha Vhunazi. Ndo dovha nda ṱalusa na vhuḓipfi hanga nga ha ṱano ḽa ‘Vhathu vho Hangwiwaho.’ Muvhigo we wa ḓadza masiaṱari a 43 wo vha u tshi katela misumbedzo na zwifanyiso.”

Nga November 2002, Haykaz o vhalela muvhigo vhane a dzhena navho kiḽasini, vhadededzi, muṱa wa hawe, na khonani dzawe. Nga murahu ha zwenezwo ho mbo ḓi vha na mbudziso na dziphindulo, nahone zwenezwo zwa mu ṋea tshibuli tsha u ṱalutshedza nga ha thendo dzawe dzo thewaho Bivhilini. Musi musidzana we a vha o thetshelesa a tshi vhudzisa uri ndi ngani o ṋanga tshenetsho tshiṱoho, Haykaz o ṱalutshedza uri vhunzhi ha bugu dza ḓivhazwakale a dzi ambi nga ha Ṱhanzi dza Yehova na uri o vha a tshi khou ṱoḓa uri vhathu vha ḓivhe nga ha nḓila ye Dziṱhanzi dza lwela ngayo lutendo lwadzo lwa Vhukriste dzo khwaṱha. Wonoyo musumbedzo wo vha na mvelelo dzifhio?

Haykaz o ri: “Vhane nda dzhena navho tshikolo vho vha vho mangala. Vho vha vha sa ḓivhi nga ha u tovholwa lwa tshiṱuhu ha Ṱhanzi dza Yehova sa tshigwada. Hafhu, vhanzhi vho vha vha sa ḓivhi uri Ṱhanzi dze dza iswa gammbani dza Vhanazi dza tshengedzo dzo vha dzi tshi ambara zwiambaro zwi re na tswayo dza khuḓatharu dza muvhala wa bulusele dzo khetheaho.”

Nga murahu ha musumbedzo wawe, Haykaz o vha na zwibuli zwo engedzeaho zwa u amba na vhane a dzhena navho kilasini nahone a haseledza navho nga ha vhuimo ha Dziṱhanzi ho thewaho Bivhilini malugana na u shelwa malofha, halwa, na vhuḓifari. A tshi amba zwe a zwi ṱhogomela, Haykaz o ri: “A huna na muthu na muthihi ane nda dzhena nae tshikolo we a nkholedza.” Zwiṅwe-hafhu, muvhigo wawe zwa zwino wo vhewa laiburari ya tshikolo. U ḓo shuma u sumbedza tshivhindi tsho khwaṱhaho tsha Ṱhanzi dza Yehova tshine tsha sa ḓo hangwiwa.