DANIEL NA MIRIAM vho vhingana nga September 2000 nahone vha ya u dzula ḓoroboni ya ngei Barcelona kha ḽa Spain. Daniel o ri: “Ro vha ri tshi tshila vhutshilo ho ḓoweleaho. Mishumo yashu yo vha i tshi ri tendela u ḽa kha dziresiturente dzi ḓuraho, ri tshi dalela maṅwe mashango nahone ri tshi ambara zwiambaro zwi ḓuraho. Ro vha ri tshi ya vhuḓinḓani ha tsimu tshifhinga tshoṱhe.” Fhedzi ho vha na tshanduko.

Musi vhe buthanoni nga 2006, Daniel o kwamiwa nga nyambo ye khayo ha vhudziswa mbudziso ine ya ri: “Naa ri khou ita zwoṱhe zwine ra nga kona u thusa vhane vha khou ‘wela kha bulayo’ uri vha dzhene nḓilani i yaho vhutshiloni vhu sa fheli?” (Mir. 24:11) Yeneyo nyambo yo ombedzela vhuḓifhinduleli ha u ḓivhadza mulaedza u tshidzaho u bvaho Bivhilini. (Mish. 20:26, 27) Daniel o dovha a ri: “Ndo pfa u nga Yehova o vha a tshi khou amba na nṋe.” Yeneyo nyambo yo dovha ya sumbedza uri u ṱanḓavhudza vhuḓinḓa hashu zwi nga engedza dakalo ḽashu. Daniel o vha a tshi zwi ḓivha uri zwenezwo ndi ngoho. Miriam o vha o no thoma u vula nḓila nahone o vha a tshi khou ḓiphina nga phaṱhutshedzo dza u vula nḓila.

Daniel o ri: “Ndo phetha nga ḽa uri ho vha hu tshifhinga tsha uri ndi ite tshanduko khulwane vhukuma vhutshiloni hanga.” O ita tshanduko. O thoma u shuma awara dzi si gathi mushumoni, a thoma u vula nḓila nahone a humbula nga ha dakalo ḽine ene na Miriam vha nga vha naḽo arali vha shuma hu re na ṱhoḓea khulwane ya vhahuweleli vha Muvhuso.

Nga May 2007, Daniel na Miriam vho litsha mishumo yavho ya u ḓitshidza nahone vha pfulutshela ngei Panama, shango ḽe vha vhuya vha ḽi dalela. Tsimu ye vha vha vha tshi shuma khayo yo vha i na zwiṱangadzime zwi si gathi ngei Bocas del Toro Archipelago, Lwanzheni lwa Caribbean nahone vhunzhi ha vhadzulapo vha henefho vho vha vhe Vhangabe. Daniel na Miriam vho humbula uri vha nga dzula Panama miṅwedzi ya malo vha tshi khou shumisa tshelede ye vha i vhulunga.

Vho vha vha tshi ya kha zwenezwo zwiṱangadzime nga zwikepe na baisigira nahone vha kha ḓi humbula zwavhuḓi lwendo lwavho lwa u thoma lwe vha lu fara nga baisigira khilomithara dzi ṱoḓaho u vha 32, vha tshi khou gonya zwikwara ḓuvha ḽi tshi khou gotsha ḓula. Daniel o ṱoḓou ṋoka nga maneto. Naho zwo ralo, miṱa ya Vhangabe ye vhenevho vhavhingani vha ṱangana nayo, yo vha ṱanganedza zwavhuḓi na u vha sumbedza mafunda, zwihuluhulu musi vhenevho vhavhingani vha tshi guda maṅwe maipfi a luambo lwa henefho. Hu si kale, vho vha vhe na pfunzo dza Bivhili dza 23.

Naho zwo ralo, vhenevho vhavhingani vho pfa vhuṱungu vhukuma musi tshelede ye vha vha vho i vhulunga i tshi fhela. Daniel o ri: “Musi ri tshi khou lila, ro thoma u humbula nga ha u humela ngei Spain. Zwo ri pfisa vhuṱungu vhukuma u sia vhagudiswa vhashu vha Bivhili.” Fhedzi nga murahu ha ṅwedzi, vho pfa mafhungo a takadzaho. Miriam o ri: “Ro rambiwa uri ri shume sa vhavulanḓila vho khetheaho. Zwo ri takadza vhukuma u dovha ra bvela phanḓa na mushumo washu!”

Nga nṱhani ha tshanduko dze dza vha hone ndanguloni, nga 2015 Daniel na Miriam vho humbelwa uri vha bvele phanḓa na tshumelo yavho sa vhavulanḓila vha tshifhinga tsho ḓalaho. Vho ita mini? Vho vha na lutendo kha fulufhedziso ḽi wanalaho kha Psalme ya 37:5 ine ya ri: “Thudzela dzinḓila dzau kha Yehova, U mu fulufhedze, Ene u ḓo shuma.” Vho wana mushumo wa u ḓitshidza u itela uri vha kone u ḓiṱhogomela musi vha tshi khou vula nḓila nahone zwino vha shuma tshivhidzoni tsha vunḓuni ḽa Veraguas kha ḽa Panama.

Daniel o ri: “Musi ri sa athu u ṱuwa Spain, ro vha ri si na vhungoho ha uri ri ḓo kona u tshila vhutshilo ho leluwaho. Fhedzi ṋamusi ri na vhungoho ha uri ri nga kona u tshila vhutshilo ho leluwaho nahone a ri shayi tshithu naho tshi tshifhio tsha ndeme.” Ndi ḽifhio dakalo ḽavho ḽihulwanesa? Vho ri: “U thusa vhathu vha ḓiṱukufhadzaho uri vha gude nga ha Yehova, ndi dakalo ḽi sa vhambedzwi na tshithu!”