1, 2. (a) Ṱhanzi dza Yehova dzi ḓipfa hani nga ha Bivhili? (b) Ndi tshifhio tshipiḓa tsha Bivhili tshine na tshi funesa?

SA Ṱhanzi dza Yehova, ri funa Bivhili. I a ri khuthadza, u ri ṋea fulufhelo na vhulivhisi vhune ra nga vhu fulufhela. (Vharoma 15:4) A si bugu i re na mihumbulo ya vhathu, fhedzi ndi “ipfi ḽa Mudzimu.”—1 Vhathesalonika 2:13.

² Kanzhi, hu na zwipiḓa zwa Bivhili zwine roṱhe ra zwi takalela. Vhaṅwe vha takalela Dzievangeli ngauri dzi sumbedza vhumuthu ha Yehova a tshi shumisa Yesu. (Yohane 14:9) Vhaṅwe vha takalela bugu dza vhuporofita dzi ngaho Nzumbululo, dzine dza sumbedza ‘zwithu zwine zwa fanela u itea hu si kale.’ (Nzumbululo 1:1) Vhaṅwe vha a khuthadzea musi vha tshi vhala Dzipsalme nahone vhaṅwe vha takalela u vhala nyeletshedzo i shumaho i re kha Mirero. Vhukuma, Bivhili ndi ya vhathu vhoṱhe.

3, 4. (a) Ri ḓipfa hani nga khandiso dzashu? (b) Ndi khandiso dzifhio dzo livhiswaho kha vhaṅwe vhathu nga ho khetheaho?

³ Nga nṱhani ha uri ri funa Bivhili, ri dovha ra funa khandiso dzashu dzo thewaho Ipfini ḽa Mudzimu. Bugu dzoṱhe, dzibugwana, magazini na dziṅwe khandiso dzine ra dzi wana ndi  ndugiselo i bvaho ha Yehova. Dzi ri thusa u dzula ri tsini nae na u ita uri lutendo lwashu lu dzule lwo khwaṱha.—Tito 2:2.

⁴ Vhunzhi ha khandiso dzashu dzo ṅwalelwa Ṱhanzi dza Yehova nga u tou angaredza. Naho zwo ralo, hu na dziṅwe khandiso dzo ṅwalelwaho vhaswa kana vhabebi nga ho livhaho. Vhunzhi ha thero na vidio dzine dza vha kha website yashu dzo lugiselelwa nga ho livhaho vhathu vhane vha si vhe Ṱhanzi dza Yehova. Zwenezwo zwi shumiswa zwo fhamba-fhambanaho zwi sumbedza uri Yehova o ita zwe a zwi fulufhedzisa zwine zwa vha u ṋea vhathu vhoṱhe vhulivhisi vhunzhi.—Yesaya 25:6.

5. Ri nga vha na vhungoho ha uri Yehova u takalela mini?

⁵ Vhunzhi hashu ri nga takalela u vha na tshifhinga tsho engedzeaho tsha u vhala Bivhili na khandiso dzashu. Nga zwenezwo, ri nga kha ḓi sa fhedza tshifhinga tshi fanaho ri tshi khou guda khandiso iṅwe na iṅwe ine ra i wana. Ri nga vha na vhungoho ha uri Yehova u a takala musi ri tshi shumisa tshifhinga tshashu nga vhuṱali u itela u vhala na u guda Bivhili na khandiso dzashu. (Vhaefesa 5:15, 16) Naho zwo ralo, hu na khombo ine ra fanela u i iledza. Ndi ifhio yeneyo khombo?

6. Ndi mini zwine zwa nga ita uri ri si vhuyelwe nga ndugiselelo dza Yehova?

⁶ Arali ra sa ṱhogomela, ri nga humbula uri zwipiḓa zwa Bivhili kana dziṅwe khandiso a dzi shumi kha riṋe. Sa tsumbo, hu pfi mini arali tshipiḓa tsha Bivhili tshi tshi vhonala tshi sa shumi kha vhuimo hashu? Kana hu pfi mini arali khandiso i songo livhiswa kha riṋe nga ho livhaho? Naa ri sokou ṱavhanya ra vhala eneo mafhungo kana ra litsha u a vhala? Arali zwo ralo, ri nga xelelwa nga mafhungo a ndeme ane a nga ri vhuyedza. Ri nga iledza hani yeneyo khombo? Ri fanela u humbula uri mafhungo oṱhe ane ra a wana a bva ha Yehova. Bivhilini ri vhala uri: “Nṋe Yehova Mudzimu wau ndi U funza zwi farisaho.” (Yesaya 48:17) Kha ino thero, ri ḓo haseledza nga ha nyeletshedzo tharu dzine dza ḓo ri thusa uri ri vhuyelwe nga ndugiselelo dzoṱhe dze Yehova a ri ṋea dzone.

7. Ndi ngani ri tshi fanela u vhala Bivhili ri na muhumbulo wo tshaho?

⁷ Vhalani ni na muhumbulo wo tshaho. Ndi ngoho uri zwiṅwe zwipiḓa zwa Bivhili zwo ṅwalelwa vhaṅwe vhathu kana tshigwada tsha vhathu nga ho livhaho. Naho zwo ralo, Bivhili i amba uri “Maṅwalo oṱhe o hevhedzwa nga Mudzimu nahone a a vhuyedza.” (2 Timotheo 3:16) Ndi ngazwo ri tshi fanela u vhala Bivhili ri na muhumbulo wo tshaho. Muṅwe wahashu u lingedza u humbula uri a nga guda ngudo nnzhi kha mafhungo mathihi. Zwenezwo zwi mu thusa uri a wane ngudo dzo dzumbamaho. Nga zwenezwo, musi ri sa athu u thoma u vhala Bivhili, ri fanela u humbela Yehova uri a ri ṋee muhumbulo wo tshaho na vhuṱali ha u pfesesa zwine a ṱoḓa ri tshi zwi guda.—Esera 7:10; vhalani Yakobo 1:5.

8, 9. (a) Musi ri tshi vhala Bivhili, ndi mbudziso dzifhio dzine ra nga ḓivhudzisa dzone? (b) Pfaneleo dzine vhahulwane vha Vhakriste vha fanela u vha nadzo dzi ri vhudza mini nga ha Yehova?

⁸ Vhudzisani mbudziso. Musi ni tshi vhala Bivhili, imani nahone ni ḓivhudzise mbudziso dzi tevhelaho: ‘Zwenezwi zwi  mmbudza mini nga ha Yehova? Ndi nga shumisa hani enea mafhungo vhutshiloni hanga? Ndi nga a shumisa hani u thusa vhaṅwe?’ Musi ri tshi elekanya nga ha dzenedzi mbudziso, ri ḓo vhuyelwa nga ho engedzaho nga muvhalo washu wa Bivhili. Kha ri ṱhogomele iṅwe tsumbo. Bivhili i ṱalusa dziṅwe pfaneleo dzine muhulwane wa Mukriste a fanela u vha nadzo. (Vhalani 1 Timotheo 3:2-7.) Vhunzhi hashu a ri vhahulwane vha tshivhidzo, nga zwenezwo, ri nga humbula uri eneo mafhungo a nga si vhuye a ri thusa. Naho zwo ralo, kha ri shumise mbudziso tharu dzo bulwaho afho nṱha, u itela u vhona nḓila ine wonoyu mutevhe wa pfaneleo wa nga ri thusa ngayo roṱhe.

⁹ “Zwenezwi zwi mmbudza mini nga ha Yehova?” Yehova o ri ṋea mutevhe wa pfaneleo dzine vhahulwane vha fanela u vha nadzo. U na zwilinganyo zwa nṱha zwine vhanna vhane vha ṱhogomela tshivhidzo vha fanela u vha nazwo. Zwenezwi zwi sumbedza uri tshivhidzo ndi tsha ndeme kha Yehova. Bivhili i amba uri o tshi renga “nga malofha a Murwa wawe.” (Mishumo 20:28) Nga zwenezwo, Yehova u lavhelela uri vhahulwane vha vhe tsumbo dzavhuḓi nahone vha na vhuḓifhinduleli khae ha nḓila ine vha fara ngayo miraḓo ya tshivhidzo. U ṱoḓa ri tshi pfa ro tsireledzea nga fhasi ha ṱhogomelo yavho. (Yesaya 32:1, 2) Musi ri tshi vhala nga ha dzenedzi pfaneleo, ri guda nḓila ine  Yehova a ri ṱhogomela ngayo zwa vhukuma.

10, 11. (a) Musi ri tshi vhala nga ha pfaneleo dzine vhahulwane vha fanela u vha nadzo, ri nga shumisa hani enea mafhungo vhutshiloni hashu? (b) Ri nga shumisa hani enea mafhungo u thusa vhaṅwe?

¹⁰ “Ndi nga shumisa hani enea mafhungo vhutshiloni hanga?” Arali no no vha muhulwane, ni fanela u dzula ni tshi vusulusa wonoyu mutevhe wa pfaneleo nahone ni lingedze u khwinisa. Arali ni “tshi ṱoḓa u vha mulavhelesi,” ni fanela u lingedza u sumbedza dzenedzi pfaneleo nga hune na nga kona ngaho. (1 Timotheo 3:1) Fhedzi Vhakriste vhoṱhe vha nga guda kha dzenedzi pfaneleo. Sa tsumbo, Yehova u lavhelela muṅwe na muṅwe washu a tshi vha a humbulelaho na u vha na mavhonele avhuḓi. (Vhafilipi 4:5; 1 Petro 4:7) Musi vhahulwane vhe “tsumbo kha sambi,” ri nga guda khavho na u “edzis[a] lutendo lwavho.”—1 Petro 5:3; Vhaheberu 13:7.

¹¹ “Ndi nga shumisa hani enea mafhungo u thusa vhaṅwe?” Ri nga shumisa wonoyu mutevhe wa pfaneleo dzine vhahulwane vha tshivhidzo vha fanela u vha nadzo u itela u thusa vhagudiswa vha Bivhili na vhaṅwe vha re na dzangalelo uri vha pfesese nḓila ine vhahulwane vha fhambana ngayo na vhafunzi vha vhurereli. Wonoyu mutevhe u nga dovha wa ri humbudza nḓila ine vhahulwane vha vha ngayo vhashumi vha biko tshivhidzoni. Zwenezwi zwi ḓo ri thusa u ṱhonifha vhenevha vhahashu. (1 Vhathesalonika 5:12) Musi ri tshi vha ṱhonifha, zwi ḓo ita uri vha ite mushumo wavho vho takala.—Vhaheberu 13:17.

12, 13. (a) Ri nga ita ṱhoḓisiso ifhio ri tshi shumisa zwishumiswa zwine ra vha nazwo? (b) Ṋeani tsumbo ya nḓila ine vhubvo ha mafhungo ha nga dzumbulula ngayo ngudo dzine ra si kone u dzi wana nga u ṱavhanya.

¹² Itani ṱhoḓisiso. Musi ri tshi guda Bivhili, ri nga ṱoḓa phindulo dza mbudziso dzi tevhelaho:

• Ndi nnyi o ṅwalaho tshenetshi tshipiḓa tsha Bivhili?

• Tsho ṅwalwa ngafhi nahone lini?

• Ndi zwiitea zwifhio zwa ndeme zwe zwa vha zwi tshi khou itea musi yeneyi bugu i tshi ṅwalwa?

Enea mafhungo a nga ri thusa u wana ngudo dzine ra si kone u dzi wana nga u ṱavhanya.

¹³ Sa tsumbo, Hesekiele 14:13, 14 i ri: “Shango arali ḽo ndevhela ḽa ntshandukela, Nṋe nda angaladza tshanḓa tshanga khaḽo’, nda vunḓa thikho dzaḽo dza zwiḽiwa, nda ruma nḓala khaḽo’ ya fhedza vhathu na kholomo khaḽo’, ngavhe kha ḽeneḽo shango ha vha na havha vhanna vhararu, Noaxe na Daniele na Yobo, ndi misi vhenevho nga zwivhuya zwavho vha tshi ḓitshidza vhone vhaṋe fhedzi, vhá sa tshidzi vhaṅwe. Muṋe wa vhoṱhe Yehova u ralo.” Arali ra ita ṱhoḓisiso, ri guda uri Hesekiele o ṅwala enea maipfi miṅwahani ya 612 musi Kristo a sa athu u bebwa. Ho vha hu kale Noaxe na Yobo vho no fa, fhedzi Yehova o vha a kha ḓi humbula u fulufhedzea havho. Naho zwo ralo, Daniele  o vha a kha ḓi tshila. A nga vha o vha e na miṅwaha i ṱoḓaho u vha 20 musi Yehova a tshi amba uri o vha o luga u fana na Noaxe na Yobo. Ri guda mini? Yehova u a vhona na u dzhiela nṱha u fulufhedzea ha vhashumeli vhawe vhoṱhe, u katela na vhaswa.—Psalme ya 148:12-14.

14. Vhaswa vha thuswa hani nga khandiso dze vha itelwa dzone, nahone vhaṅwe vha nga vhuyelwa hani nga u dzi vhala? (Sedzani tshifanyiso tsha u thoma.)

¹⁴ Khandiso dza vhaswa. Ro guda uri ri nga vhuyelwa nga zwipiḓa zwoṱhe zwa Bivhili. Nga nḓila i fanaho, ri nga vhuyelwa nga khandiso dzashu dzoṱhe. Kha ri ṱolisise tsumbo dzi si gathi. Miṅwahani ya zwenezwino, Yehova o lugiselela vhaswa mafhungo manzhi. ^[1] (Sedzani notsi dza u fhedzisela.) Enea mafhungo a vha thusa u sedzana na mitsiko tshikoloni na khaedu dzine vha ṱangana nadzo musi vha tshi khou aluwa. Fhedzi roṱhe ri nga vhuyelwa hani nga u vhala dzenedzi thero na dzibugu? Musi ri tshi vhala enea mafhungo, ri guda nga ha thaidzo dzine vhaswa vha sedzana nadzo nahone ri ḓo kona u vha thusa na u vha ṱuṱuwedza khwine.

15. Ndi ngani Vhakriste vho no aluwaho vha tshi fanela u vhala mafhungo o ṅwalelwaho vhaswa?

¹⁵ Vhakriste vho no aluwaho a vho ngo fanela u dzhiela fhasi u vhala thero dzo livhiswaho kha vhaswa. Thaidzo nnzhi dze ha haseledzwa nga hadzo kha dzenedzi thero dzi kwama Vhakriste vhoṱhe. Sa tsumbo, roṱhe ri ṱoḓa u imelela zwine ra zwi tenda, u langa maḓipfele ashu, u lwisana na mutsiko wa thangana dza murole, u iledza vhukonani vhu si havhuḓi na vhuḓimvumvusi. Naho dzenedzi khandiso dzo ṅwalelwa vhaswa, mafhungo ane a vha khadzo a bva Bivhilini nahone Vhakriste vhoṱhe vha nga vhuyelwa.

16. Khandiso dzashu dzi dovha dza thusa vhaswa uri vha ite mini?

¹⁶ Khandiso dzo ṅwalelwaho vhaswa dzi nga dovha dza vha thusa u khwaṱhisa vhushaka havho na Yehova. (Vhalani Muhuweleli 12:1, 13.) Na vhathu vho no aluwaho vha nga vhuyelwa. Sa tsumbo, thero ya Awake! ya April 2009 yo katela thero “Young People Ask . . . How Can I Make Bible Reading Enjoyable?” Yeneyo thero yo vha i na nyeletshedzo dzo fhamba-fhambanaho nahone yo vha i tshi katela bogisi ḽine na nga ḽi gera na u ḽi shumisa kha ngudo yaṋu. Naa vhathu vho no aluwaho vho vhuyelwa nga yeneyi thero? Muṅwe mufumakadzi o amba uri u guda Bivhili zwo vha zwi tshi mu konḓela tshifhinga tshoṱhe. Fhedzi o shumisa nyeletshedzo ye a i wana kha yeneyi thero nahone zwino u takalela u vhala Bivhili. O amba uri u takadzwa nga u vhona nḓila ine bugu dza Bivhili dza tshimbidzana ngayo, o ri: “Ndi ḓiphina vhukuma nga u vhala Bivhili u fhira naho hu lini.”

17, 18. Ri nga vhuyelwa hani nga u vhala khandiso dzo livhiswaho tsimuni? Ṋeani tsumbo.

¹⁷ Khandiso dza vhathu vha tsimuni. U bva nga 2008 ro takalela u guda thero dza Tshiingamo tshi gudwaho. Kanzhi  dzenedzi khandiso dzo ṅwalelwa Ṱhanzi dza Yehova, fhedzi ri dovha ra vha na magazini dzo livhiswaho kha vhathu vha tsimuni. Na riṋe ri nga vhuyelwa hani nga dzenedzo khandiso? Kha ri ṱolisise iṅwe tsumbo. Musi muthu we na mu ramba a tshi ḓa Holoni ya Muvhuso ni a takala. Musi tshiambi tshi tshi khou ṋekedza nyambo, ni humbula nga ha muthu we na mu ramba. Ni ḓivhudzisa uri onoyo muthu u ḓipfa hani nga ha zwine a khou zwi pfa na uri zwenezwo zwi nga shandula hani vhutshilo hawe. Nga zwenezwo, ni a kwamea nahone ni a takala vhukuma nga zwine zwa khou haseledzwa.

¹⁸ Hu nga itea zwi fanaho na kha riṋe musi ri tshi vhala khandiso yo ṅwalelwaho vhathu vha tsimuni. Sa tsumbo, Tshiingamo tsha tsimuni na khandiso dzi re kha jw.org dzi ṱalutshedza mafhungo a re Bivhilini nga maipfi o leluwaho u a pfesesa. Musi ri tshi vhala eneo mafhungo, ri pfesesa nga vhuḓalo na u funa ngoho i re Bivhilini ine ra vho i ḓivha zwavhuḓi. Zwiṅwe hafhu, ri nga guda nḓila ntswa dza u ṱalutshedza zwine ra zwi tenda vhuḓinḓani. Nga nḓila i fanaho, magazini wa Awake! u khwaṱhisa zwine ra zwi tenda zwa uri hu na Musiki. Dzi dovha dza ri thusa u guda nḓila ya u imelela zwine ra zwi tenda.—Vhalani 1 Petro 3:15.

19. Ri nga sumbedza hani u livhuha ndugiselelo ya Yehova?

¹⁹ Vhukuma, Yehova o ri ṋea nyeletshedzo nnzhi na vhulivhisi u itela u ri vhuyedza. (Mateo 5:3) Kha ri bvele phanḓa ri tshi guda na u shumisa mafhungo oṱhe e a ri ṋea one. Arali ri tshi ita zwenezwo, ri ḓo vhuyelwa nahone ri ḓo sumbedza Yehova uri ri dzhiela nṱha ndugiselelo dzawe dzoṱhe.—Yesaya 48:17.