Ri Nga Thuswa Nga Mini Uri Ri Vhe Na Vhumatshelo Havhuḓi?

TAMBANI

Samusi ro zwi haseledza kha thero dzo fhiraho, vhathu vho lingedza u wana vhumatshelo havhuḓi nga u fhulufhela maanḓa a sa vhonali, pfunzo ya nṱha, lupfumo na u vha muthu wavhuḓi. U ṱoḓa vhumatshelo havhuḓi nga dzenedzi nḓila, zwi fana na u ya fhethu hune ni si hu ḓivhe ni tshi khou shumisa mapa wo khakheaho. Naa izwi wi amba uri a hu na tshine tsha nga ri thusa uri ri vhe na vhumatshelo havhuḓi? Na khathihi!

U LIVHISWA NGA MUTHU MUHULWANE

Kanzhi musi ri tshi ita phetho, ri ṱoḓa thuso kha muthu a re muhulwane kha riṋe, o ṱalifhaho u ri fhira. Nga nḓila i fanaho, muthu muhulwane kha riṋe, o ṱalifhaho u ri fhira ndi ene ane a nga ri vhudza uri ri nga vha hani na vhumatshelo havhuḓi. Ri nga vhala nyeletshedzo yawe kha bugu ine ya pfi Bivhili ye ya thoma u ṅwalwa miṅwahani i ṱoḓaho u vha 3 500 yo fhiraho.

Ndi ngani ni tshi nga fhulufhela Bivhili? Ndi ngauri yo ṅwalwa nga Muthu a re muhulwane u fhira roṱhe, o ṱalifhaho u fhira roṱhe. U ṱaluswa sa “Wa-Kale-kale wa Maḓuvha” ane a vha “wa lini na lini.” (Daniele 7:9; Phisalema 90:2) Ndi “Musiki wa ḽiṱaḓulu, Mudzimu wa ngoho, Muvhumbi wa ḽifhasi.” (Yesaya 45:18) U ri vhudza uri dzina ḽawe ndi Yehova.—Phisalema 83:18.

Ngauri Bivhili i bva kha muthu o sikaho vhathu vhoṱhe, a i ambi uri lushaka kana mvelele ya vhaṅwe i khwine kha ya vhaṅwe. Nyeletshedzo yayo i shuma tshifhinga tshoṱhe nahone yo no thusa vhathu vha bvaho mashangoni oṱhe. I wanala nga nyambo nnzhi nahone yo no phaḓaladzwa u fhira bugu dzoṱhe. * Nga zwenezwo, vhathu vha nga kona u i vhala na u livhiswa ngayo vhe huṅwe na huṅwe. Zwenezwi zwi tendelana na zwine Bivhili ya zwi amba. I ri:

“Mudzimu ha ṱaluli, kha tshaka dzoṱhe ane a mu ofha, a ita zwo lugaho u a mu ṱanganedza.”—MISHUMO 10:34, 35.

Samusi vhabebi vha tshi funa vhana vhavho na u vha thusa, Yehova Mudzimu u fana na Khotsi ane a ri thusa a tshi shumisa Ipfi ḽawe ḽine ḽa vha Bivhili. (2 Timotheo 3:16) Ni nga fhulufhela zwi re Ipfini ḽawe ngauri ndi ene o ri sikaho nahone u a ḓivha zwine zwa ḓo ita uri ri takale.

RI NGA FHULUFHELA BIVHILI

Ri nga fhulufhela zwine Bivhili ya zwi amba nga ha vhumatshelo ngauri ṋamusi ri vhona hu na zwiitea na vhuḓifari zwe Bivhili ya dzula yo amba uri zwi ḓo itea miṅwahani i ṱoḓaho u vha 2 000 yo fhiraho.

ZWIITEA

“Lushaka lu ḓo lwa na luṅwe lushaka na muvhuso wa lwa na muṅwe muvhuso. Hu ḓo vha na midzinginyo mihulu na malwadze, ha vha na nḓala fhethu hunzhi.”—LUKA 21:10, 11.

VHUḒIFARI

“Maḓuvhani a vhufhelo hu ḓo vha na zwifhinga zwi lemelaho zwi konḓaho u sedzana nazwo. Ngauri vhathu vha ḓo funa vhone vhaṋe fhedzi, vha funa tshelede, vha zuwa, vha ḓihudza, vha semana, a vha nga thetshelesi vhabebi, a vha nga livhuwi, a vha nga fhulufhedzei, a vha nga vhi na lufuno, a vha nga tendelani na vhaṅwe, vha ḓo tshinya vhaṅwe dzina, a vha nga koni u ḓifara, vha ḓo ita zwa dzikhakhathi, a vha nga funi zwivhuya, vha ḓo vha vhafheṱi, vha ḓo vha na swili, vha ḓikukumusa, vha funa miḓifho nṱhani ha u funa Mudzimu.”—2 TIMOTHEO 3:1-4.

Bivhili yo kona hani u amba hu tshee nga phanḓa uri zwenezwi zwithu zwi ḓo itea? Zwi tou pfala uri ni ḓo tendelana na Leung wa Hong Kong we a ri: “Vhuporofita ha Bivhili ho ṅwalwa kale-kale. A zwi konadzei uri muthu a ambe hu tshee nga phanḓa uri zwithu zwi ḓo itea nahone zwa itea nga yeneyo nḓila kokotolo. Zwi amba uri Bivhili i tea u vha i tshi bva kha muthu o ṱalifhaho u ri fhira.”

Bivhili i na vhuporofita vhunzhi-vhunzhi he ha itea. * Zwenezwi zwi sumbedza uri Bivhili ndi Ipfi ḽa Mudzimu nga ngoho. Yehova u ri: “Nṋe ndi Mudzimu, a hu na muṅwe ane a nga nṋe. Ndi dzula ndo amba u bva mathomoni zwine zwa ḓo itea.” (Yesaya 46:9, 10) Nga zwenezwo, ni na tshiitisi tshavhuḓi tsha u fhulufhela zwine Bivhili ya zwi amba nga ha vhumatshelo.

VHULIVHISI VHUNE HA ḒO NI THUSA ZWINO NA LINI NA LINI

Musi ni tshi tevhedza vhulivhisi vhu wanalaho kha Maṅwalo Makhethwa, ni ḓo vhuyelwa. Kha ri vhone dziṅwe tsumbo.

NYELETSHEDZO YAVHUḒI NGA HA MUSHUMO NA TSHELEDE

“Ndi khwine u vha na zwo eḓanaho tshanḓani tshithihi tshi awelaho u fhira u vha na zwinzhi zwanḓani zwivhili zwi shumaho nga maanḓa hu u pandamedza muya.”—MUHUWELELI 4:6.

NI NGA VHA HANI NA MUṰA WO TAKALAHO?

“Muṅwe na muṅwe waṋu a fune mufumakadzi wawe samusi a tshi ḓifuna; na mufumakadzi a ṱhonifhe munna wawe nga maanḓa.”—VHAEFESA 5:33.

NI NGA SHUMISANA HANI ZWAVHUḒI NA VHAṄWE?

“Litsha u sinyuwa u furalele mbiti; u songo sinyuwa, wa ita vhuvhi.”—PHISALEMA 37:8.

Arali na ita zwine Bivhili ya zwi amba, ni ḓo vha na vhutshilo havhuḓi zwino, na dovha na vha na vhumatshelo havhuḓi. Bivhili i ri vhudza nga ha zwithu zwavhuḓi zwe Mudzimu a ri fhulufhedzisa zwone tshifhingani tshi ḓaho, i sumbedza uri:

HU ḒO VHA NA MULALO NA U TSIRELEDZEA

“Vha ḓo takadzwa vhukuma nga muḓalo wa mulalo.”—PHISALEMA 37:11.

VHOṰHE VHA ḒO VHA NA VHUDZULO NA ZWIḼIWA

“Vha ḓo fhaṱa nnḓu vha dzula khadzo, vha ḓo ṱavha minḓirivhe vha ḽa mitshelo yayo.”—YESAYA 65:21.

A HU NA ANE A ḒO LWALA KANA A LOVHA

“Lufu a lu tsha ḓo vha hone, u ṱungufhala, u lila na vhuṱungu a zwi tsha ḓo vha hone.”—NZUMBULULO 21:4.

Ni tea u ita mini uri ni vhe na honoho vhumatshelo? Vhalani thero i tevhelaho.

^ phar. 6 U itela u wana zwo engedzeaho nga ha u ṱalutshedzelwa na u phaḓaladzwa ha Bivhili, dzhenani kha www.jw.org ni sedze kha BIBLE TEACHINGS > HISTORY & THE BIBLE.

^ phar. 16 U itela u wana mafhungo o engedzeaho, vhalani ndima 9 ya bugu The Bible—God’s Word or Man’s? yo gandiswaho nga Ṱhanzi dza Yehova. I a wanala kha inthanethe kha www.jw.org. Sedzani kha LIBRARY > BOOKS & BROCHURES.

Ṱhanzi dza Yehova

Ri Nga Thuswa Nga Mini Uri Ri Vhe Na Vhumatshelo Havhuḓi?

U LIVHISWA NGA MUTHU MUHULWANE

You May Also Like

Ngoho Nga Ha Vhumatshelo

Naa Vhulivhisi Vhu Re Bivhilini Vhu Kha Ḓi Vha Ha Ndeme?

Bivhili Na Vhumatshelo Haṋu