Yehova o sika mufumakadzi wa u thoma Eva, uri a vhe musadzi wa Adamu.—Genesi 2:21, 22.

Yehova o vha sika vhe na mihumbulo na mivhili yo fhelelaho, vhe si na vhukhakhi na vhuthihi.

Haya havho ha Paradiso ho vha hu tsimu ya Edeni—fhethu he ha vha ho naka vhukuma hu na milambo, miri ya mitshelo na zwipuka.

Yehova o amba navho; o vha funza. Arali vha vhe vho mu thetshelesa, vho vha vha tshi ḓo vha vho tshila nga hu sa fheli Paradisoni kha ḽifhasi.

Yehova o sumbedza Adamu na Eva muri muthihi wa mutshelo we wa vha u tsimuni nahone a vha vhudza uri arali vha ḽa mutshelo wawo, vho vha vha tshi ḓo fa.

Muṅwe wa vharuṅwa o shandukela Mudzimu. Onoyo muruṅwa muvhi ndi Sathane Diabolo.

Sathane o vha a sa ṱoḓi uri Adamu na Eva vha thetshelese Yehova. Nga zwenezwo, o shumisa ṋowa uri i vhudze Eva uri arali a ḽa mutshelo wa wonoyo muri, o vha a sa ḓo fa, fhedzi o vha a tshi ḓo fana na Mudzimu. Vhukuma, eneo o vha e mazwifhi.—Genesi 3:1-5.