Nga murahu ha tshifhinga, musi Vhaisiraele vhe sogani, Kora, Dathani, Abiramu na vhaṅwe vha 250 vho shandukela Mushe. Vho ri khae: ‘Ro neta nga inwi! Ndi ngani inwi ni tshi tea u vha murangaphanḓa washu nahone Aroni e tshifhe muhulu? Yehova u ima na riṋe roṱhe, hu si inwi na Aroni fhedzi.’ Yehova a sinyuwa. O zwi dzhia vha tshi khou vutshela ene!

Mushe a vhudza Kora na vhatevheli vhawe a ri: ‘Kha ri ṱangane matshelo thebenekeleni nahone ni ḓe na zwa u okela mulilo zwo ḓala zwioro. Yehova u ḓo ri sumbedza we a mu khetha.’

Nga ḓuvha ḽi tevhelaho, Kora na vhanna vha 250 vha yo ṱangana na Mushe thebenekeleni. Henefho vha fhisa zwioro vha tshi khou ḓiita vhotshifhe. Yehova a vhudza Mushe na Aroni a ri: ‘Sendelani kule na Kora na vhanna vhawe.’

Naho Kora o ya kha Mushe thebenekeleni, Dathani, Abiramu na miṱa yavho vho hana u ya. Yehova a vhudza Vhaisiraele uri vha sendele kule na madennde a Kora, Dathani na Abiramu. Nga u ṱavhanya, Vhaisiraele vha sendela kule. Dathani, Abiramu na miṱa yavho vha ima nnḓa ha madennde avho. Nga u ṱavhanya fhasi ha  vulea nahone vha milwa. Ngei thebenekeleni, ha tsa mulilo nahone wa fhisa Kora na vhanna vhawe vha 250.

Nga murahu Yehova a vhudza Mushe a ri: ‘Dzhiani thonga ya murangaphanḓa muṅwe na muṅwe wa lushaka nahone ni ṅwale dzina ḽawe khayo. Fhedzi kha thonga ya lushaka lwa Vhalevi, ni ṅwale dzina ḽa Aroni. Ni dzi vhee nga ngomu ha thebenekele nahone thonga ya ane nda ḓo mu khetha i ḓo mela maluvha.’

Nga ḓuvha ḽi tevhelaho, Mushe a bvisa thonga dzoṱhe nahone a dzi sumbedza vharangaphanḓa. Thonga ya Aroni yo vha i tshi khou mela maluvha nahone i na alimondo dzo vhibvaho. Nga yeneyi nḓila, Yehova o khwaṱhisedza uri o khetha Aroni uri a vhe ene tshifhe muhulwane.