Mudzimu u ṱoḓa uri vhathu vhoṱhe vha ḓiphiṋe nga vhutshilo kha ḽifhasi. O sika ḽifhasi na zwithu zwoṱhe zwi re khaḽo nga nṱhani ha uri u funa vhathu. Hu si kale u ḓo dzhia vhukando a ita uri vhathu vha re mashangoni oṱhe vha vhe na vhumatshelo havhuḓi. U ḓo fhelisa tshengelo yoṱhe.​—Vhalani Yeremia 29:11.

A hu na muvhuso we wa vhuya wa kona u fhelisa vhutshinyi hoṱhe, malwadze kana lufu. Fhedzi mafhungo maḓifha ndi a uri, hu si kale Mudzimu u ḓo fhelisa mivhuso yoṱhe ya vhathu, vhudzuloni hayo u ḓo vhea muvhuso wawe. Vhane vha ḓo vhuswa nga muvhuso wawe vha ḓo ḓiphiṋa nga mulalo na mutakalo wavhuḓi.​—Vhalani Yesaya 25:8; 33:24; Daniele 2:44.

Tshengelo i ḓo fhela musi Mudzimu a tshi fhelisa vhathu vhavhi kha ḽifhasi. (Tsefanya 2:3) Zwenezwo zwi ḓo itea lini? Bivhili yo dzula yo amba nga ha zwithu zwine zwa khou vhilaedzisa vhathu ṋamusi. Zwithu zwivhi zwine zwa khou itea zwino zwi sumbedza uri Mudzimu u ḓo dzhia vhukando hu si kale.​—Vhalani 2 Timotheo 3:1-5.

Ri fanela u guda nga ha Mudzimu ri tshi shumisa Ipfi ḽawe, Bivhili. I fana na vhurifhi vhu bvaho ha khotsi wa lufuno. I ri vhudza nga ha nḓila ine ra nga tshila ngayo khwine ṋamusi na nḓila ine ra nga ḓiphiṋa ngayo nga vhutshilo vhu sa fheli kha ḽifhasi tshifhingani tshi ḓaho. Vhaṅwe vhathu a vha nga takaleli u ni vhona ni tshi khou guda Bivhili na Ṱhanzi dza Yehova. Fhedzi ri songo tenda vhaṅwe vhathu vha tshi ri tshutshudza ra vho pfukwa nga tshibuli tsha u guda nga ha vhumatshelo havhuḓi.​—Vhalani Mirero 29:25; Nzumbululo 14:6, 7.