Bivhili I Shandula Vhutshilo

TAMBANI

Bivhili I Shandula Vhutshilo

NDI mini zwe zwa thusa muṅwe muthu o omaho ṱhoho na a sa dzhenei uri a thome u funa vhathu na u ṱoḓa u vha thusa? Ndi mini zwe zwa thusa muṅwe munna wa ngei Mexico uri a si tsha ḓifara luvhi nga zwa vhudzekani? Ndi mini zwe zwa thusa muṅwe munna wa ngei Dzhapani a re na bvumo we a vha a tshi ṱaṱisana nga dzibaisigira uri a litshe wonoyo muṱaṱisano nahone a thome u shumela Mudzimu? Ipfani zwe vhenevha vhathu vha zwi amba.

“Ndo Vha Ndi Sa Dzhenei, Ndi Na Swili Nahone Ndi Na Vhuhali.”—VHO DENNIS O’BEIRNE

ṄWAHA WA MABEBO: 1958

SHANGO: ENGLAND

ZWE VHA VHA VHA TSHI ZWI ITA: MUTHU O OMAHO ṰHOHO NA A SA DZHENEI

VHUTSHILO HANGA HA TSHIFHINGANI TSHO FHIRAHO: Vhathu vha muṱa wa khotsi anga vha bva Ireland nahone ndo aluwa ndi tshi ya kerekeni ya Katolika ya Ireland. Kanzhi ndo vha ndi tshi ya kerekeni ndi ndoṱhe naho ndi sa takaleli u ya. Fhedzi ndo vha ndi tshi takalela u ḓivha nga ha Mudzimu. Ndo vha ndi tshi dzula ndi tshi rabela Thabelo ya Murena nahone nga madekwana musi ndo ganama mmbeteni, ndi tshi humbula nga ha zwine ya amba zwone. Ndo vha ndi tshi ḓivhudzisa uri maipfi maṅwe na maṅwe a re kha yeneyo thabelo a amba mini.

Musi ndi na miṅwaha i ṱoḓaho u vha 16, ndo vha ndi kha zwigwada zwo fhambanaho zwine zwa hanedzana na tshitshavha. Ndo vha ndi tshi shumisa zwidzidzivhadzi, zwihuluhulu mbanzhe nahone ndo vha ndi tshi i daha ḓuvha ḽiṅwe na ḽiṅwe. Ndo vha ndi tshi nwesa halwa, ndi tshi ita zwithu zwine zwa vhea vhutshilo hanga khomboni, ndi tshi fara vhathu nga nḓila i si yavhuḓi ngauri ndo vha ndi si na ndavha na tshithu. Ndo vha ndi sa dzhenei nahone ndi tshi amba na muthu fhedzi arali ndi tshi vhona zwo tea. Ndo vha ndi sa ṱoḓi u fodiwa. Musi ndi tshi sedza nḓila ye vhutshilo hanga ha vhu ngayo, ndi a zwi vhona uri ndo vha ndi sa dzhenei, ndi na swili nahone ndi na vhuhali. Ndo vha ndi tshi fara zwavhuḓi khonani dzanga fhedzi.

Ndo thoma u takalela u vhala Bivhili musi ndi na vho 20. Khonani yanga ye ya vha i tshi rengisa zwidzidzivhadzi o thoma u vhala Bivhili musi e dzhele nahone ro vha ri tshi amba lwa tshifhinga tshilapfu nga ha vhurereli, kereke na zwine Saṱhane a khou zwi ita kha ḽifhasi. Ndo mbo ḓi renga Bivhili nda thoma u i guda ndi ndoṱhe. Nṋe na khonani yanga ro vha ri tshi vhala Bivhili, ra ṱangana u itela u amba nga ha zwe ra zwi guda na u zwi ṅwala fhasi. Ro zwi ita lwa miṅwedzi yo vhalaho.

Zwiṅwe zwa zwithu zwe ra zwi ṱhogomela musi ri tshi khou guda na u zwi ṅwala ndi zwi tevhelaho: Ri khou tshila maḓuvhani a vhufhelo, Vhakriste vha tea u huwelela mafhungo maḓifha a Muvhuso wa Mudzimu, Vhakriste a vha tei u vha tshipiḓa tsha shango na u dzhenelela kha mafhungo a politiki na uri Bivhili i ri vhudza uri ri ḓifare nga nḓila yavhuḓi. Ro zwi vhona uri Bivhili i amba ngoho na uri hu tea u vha hu na vhurereli ha ngoho. Fhedzi honoho vhurereli ndi vhufhio? Ro zwi vhona uri vhurereli vhuhulwane vhu ita zwithu zwo fhambanaho na zwe Yesu a zwi funza ngauri vhu livhisa ṱhogomelo kha zwifhaṱo zwaho zwihulwane, mikhuvha yaho na u ḓidzhenisa kha mafhungo a politiki. Ro zwi vhona uri honoho vhurereli a vhu iti zwine Mudzimu a zwi funa nahone ra thoma u ya kha vhurereli vhu sa ḓivhiwi nga vhathu vhanzhi u itela u vhona nḓila ine vha ita ngayo zwithu.

Ro vha ri tshi ṱangana na vhathu vha re kha honoho vhurereli nahone ra vha vhudzisa mbudziso dzi bvaho Bivhilini. Ro vha ri tshi kona u vhona arali nḓila ine vha ḓo fhindula ngayo dzenedzo mbudziso i tshi ḓo tendelana na zwine Bivhili ya zwi funza ngauri ro vha ri tshi ḓivha nḓila ine Bivhili ya fhindula ngayo dzenedzo mbudziso. Nga murahu ha u amba navho, ndo vha ndi tshi rabela nda vhudza Mudzimu uri: ‘Arali havha vhathu vha kha vhurabeli ha ngoho, ndi khou humbela uri u nthuse ndi vhe na dzangalelo ḽa u dovha nda ṱangana navho.’ Nga murahu ha u fhedza miṅwedzi yo vhalaho ndi tshi khou ṱangana na vhurereli ho fhambanaho, a tho ngo wana vhurereli he ha fhindula mbudziso dzanga vhu tshi shumisa Bivhili nahone ndo vha ndi si na dzangalelo ḽa u dovha nda ṱangana naho.

Nṋe na khonani yanga ro fhedzisela ro ṱangana na Ṱhanzi dza Yehova. Ra vha vhudzisa mbudziso dzi fanaho na dze ra dzi vhudzisa vhaṅwe, fhedzi vho ri fhindula vha tshi shumisa Bivhili. Zwe vha zwi amba zwo vha zwi tshi tendelana na zwe ra zwi guda. Ro dovha ra vha vhudzisa mbudziso dze ra vha ri sa athu u wana phindulo dzadzo kha Bivhili, dzi ngaho nḓila ine Mudzimu a dzhia ngayo u daha na u shumisa zwidzidzivhadzi. Vho dovha vha ri fhindula vha tshi shumisa Bivhili. Ra tenda u ya muṱanganoni Holoni yavho.

Zwo vha zwi tshi nkonḓela u ya miṱanganoni. Naho vhathu vha re henefho vho vha vha tshi dzhenea nahone vha tshi vha vho ambara zwavhuḓi, ndo vha ndi sa ṱoḓi u amba navho. Ndo vha ndi sa vha fhulufheli, zwa ita uri ndi si tsha ṱoḓa u ya miṱanganoni. Fhedzi ndo rabela kha Yehova sa nga misi uri a nthuse uri ndi vhe na dzangalelo ḽa u dovha nda ṱangana na vhenevha vhathu arali vhe kha vhurereli ha ngoho nahone nda pfa ndi na dzangalelo ḽihulu ḽa u guda Bivhili na Dziṱhanzi.

NḒILA YE BIVHILI YA SHANDULA NGAYO VHUTSHILO HANGA: Ndo vha ndi tshi zwi ḓivha uri ndi tea u litsha u shumisa zwidzidzivhadzi nahone zwo nndelutshela u zwi litsha. Fhedzi zwo nkonḓela nga maanḓa uri ndi litshe u daha. Ndo lingedza u litsha u daha, fhedzi zwa sokou sea zwi tshi ṱanama. Ndo amba na Yehova nga ha thaidzo yanga musi ndi tshi pfa nga ha vhaṅwe vhe vha litsha u daha nga luthihi. Ndo fheleledza ndo kona u litsha u daha ndi tshi thuswa nga Yehova. Ndo vha ndo no guda uri ndi zwa ndeme u amba na Yehova nga thabelo zwi tshi bva mbiluni.

Zwiṅwe zwe nda tea u zwi shandula ndi nḓila ine nda ambara ngayo na zwitaela zwa mavhudzi. Musi ndi tshi ya miṱanganoni lwa u tou thoma, ndo vha ndo itwa tshitaela tsha mavhudzi o imelaho nṱha, maṅwe ao o daiwa nga muvhala wa blue. Nga murahu, ndo a daya nga muvhala wa orange. Ndo vha ndi tshi ambara bokhathi na dzhasi ḽa mukumba ḽo ṅwalekanywaho. Naho Ṱhanzi dzo lingedza u amba na nṋe, ndo vha ndi sa ṱoḓi u shandula nḓila ine nda ambara ngayo na u ḓilugisa ngayo. Ndo fheleledza ndo humbula nga ha luṅwalo lwa 1 Yohane 2:15-17, lune lwa ri: “Ni songo funa shango kana zwi re khaḽo. Ane a funa shango, ha funi Khotsi.” Ndo mbo ḓi zwi ṱhogomela uri nḓila ye nda vha ndi ngayo yo vha i tshi sumbedza uri ndi funa shango na uri arali ndi tshi ṱoḓa u sumbedza uri ndi funa Mudzimu, ndi tea u shanduka. Ndo mbo ḓi shanduka.

Nga u ya ha tshifhinga, ndo zwi ṱhogomela uri a si Dziṱhanzi fhedzi vhane vha ṱoḓa ndi tshi ya miṱanganoni. Vhahevheru 10:24, 25 yo ntsumbedza uri na Mudzimu o vha a tshi ṱoḓa uri ndi ye miṱanganoni. Musi ndi tshi vho ya miṱanganoni yoṱhe, ndi tshi vho ḓivha vhahashu khwine, ndo mbo ḓi ita phetho ya u ḓiṋekedzela kha Yehova na u lovhedzwa.

NḒILA YE NDA VHUYELWA NGAYO: Ndo kwamea vhukuma nge Yehova a nṋea tshibuli tsha u vha na vhushaka ha tsini nae. Nḓila ye a mpfela ngayo vhuṱungu na u sumbedza uri u na ndavha na nṋe yo ita uri ndi mu edzise na u tevhela tsumbo ya Murwa wawe Yesu Kristo. (1 Petro 2:21) Ndo guda uri musi ndi tshi khou lingedza u tshila sa Mukriste, ndi kha ḓi tendelwa u ita zwithu zwine nda zwi takalela. Ndo ita zwoṱhe zwine nda nga kona uri ndi vhe muthu a funaho vhaṅwe. Ndi lingedza u edzisa tsumbo ya Kristo kha nḓila ine nda fara ngayo mufumakadzi wanga na ṅwananga. Nahone ndi funa vhahashu vha re tshivhidzoni. Ndi vho ḓiṱhonifha na u funa vhaṅwe nge nda tevhela tsumbo ya Kristo.

“Vho Vha Vha Tshi Nṱhonifha.”—VHO GUADALUPE VILLARREAL

ṄWAHA WA MABEBO: 1964

SHANGO: MEXICO

ZWE VHA VHA VHA TSHI ZWI ITA: U ḒIFARA LUVHI

VHUTSHILO HANGA HA TSHIFHINGANI TSHO FHIRAHO: Hahashu ro vha ri vhana vha sumbe. Ro alutshela kha ḓorobo ye vhunzhi ha vhathu vha vha vha tshi shaya, ya Hermosillo, ngei Sonora kha ḽa Mexico. Khotsi anga vho lovha ndi tshi kha ḓi vha muṱuku, zwa ita uri mme anga vha tee u shuma u itela u ri ṱhogomela. Ndo vha ndi tshi anzela u tshimbila nga milenzhe ngauri ro vha ri si na tshelede ya u renga zwienda. Na nṋe ndo tea u shuma ndi tshi kha ḓi vha muṱuku u itela u ṱhogomela muṱa wahashu. Ro vha ri tshi dzula kha nnḓu ṱhuku-ṱhuku u fana na miṅwe miṱa minzhi.

Mme anga a vho ngo kona u ri tsireledza ngauri vho vha vha tshi dzula vha siho. Musi ndi na miṅwaha ya rathi, muṅwe mutukana a re na miṅwaha ya 15 o thoma u ntambudza nga lwa vhudzekani. O zwi ita lwa tshifhinga tshilapfu. Zwo ita uri ndi vhone uri a zwo ngo khakhea u funa vhathu vha mbeu i fanaho na yanga. Ndo lingedza u ṱoḓa thuso kha madokotela na vhafunzi, fhedzi vho mmbudza uri a zwo ngo khakhea u funa vhaṅwe vhatukana naho na nṋe ndi mutukana.

Musi ndi na miṅwaha ya 14, ndo mbo ḓi thoma u sumbedza uri ndi gay nga nḓila ine nda ita ngayo zwithu na u ambara ngayo. Ndo fhedza miṅwaha ya 11 ndi tshi khou tshila nga yeneyo nḓila nahone ndi tshi dzula na vhanna vho fhambanaho. Nga murahu ha tshifhinga, ndo mbo ḓi gudela u ita mavhudzi nahone nda vula saḽuni. Fhedzi ndo vha ndi songo takala. Ndo vha ndi tshi pfa vhuṱungu na u pfa u nga ndo fheṱiwa. Ndo vhona uri zwe nda vha ndi tshi khou zwi ita zwo vha zwo khakhea. Nda ḓivhudzisa uri: ‘Naa hu na vhathu vhavhuḓi na vhane vha fhulufhelea?’

Ndo mbo ḓi humbula khaladzi anga muhulwane we a vhala na Ṱhanzi dza Yehova nahone nga murahu a lovhedzwa. O vha a tshi mmbudza zwe a vha a tshi khou zwi guda, fhedzi ndi si na ndavha nazwo. Fhedzi ndo vha ndi tshi takalela nḓila ine a tshila ngayo na nḓila ine mbingano yawe ya vha ngayo. Ndo vha ndi tshi zwi vhona uri ene na munna wawe vha a funana na u ṱhonifhana. Vho vha vha tshi farana zwavhuḓi. Nga u ya ha tshifhinga, ndo thoma u guda Bivhili na Ṱhanzi dza Yehova. Ndi tshi thoma, ndo vha ndi tshi gudela u bva mulanduni. Fhedzi zwithu zwo mbo ḓi shanduka.

NḒILA YE BIVHILI YA SHANDULA NGAYO VHUTSHILO HANGA: Ṱhanzi dza Yehova vho nthamba uri ndi ḓe miṱanganoni, nda ya. Ndo vha ndi sa athu u vhuya nda zwi tshenzhela. Vhathu vho vha vha tshi nkolela, fhedzi Ṱhanzi dza Yehova vho vha vha sa mpfari nga yeneyo nḓila. Vho vha vha tshi nndumelisa zwavhuḓi nahone vha tshi nṱhonifha. Zwenezwo zwo nkwama.

Ndo funa Ṱhanzi dza Yehova nga ho engedzeaho musi ndi tshi ya guvhanganoni. Ndo zwi vhona uri naho vho kuvhangana vhe vhanzhi, ndi vhathu vhavhuḓi nahone vha a funa vhaṅwe u fana na khaladzi anga. Ndo ḓivhudzisa arali vhenevha vhe vhone vhathu vhavhuḓi vhane nda nga vha fhulufhela vhe nda vha ndi tshi khou vha ṱoḓa u bva kale. Nḓila ine vha vha ngayo na vhuthihi, nḓila ine vha funana ngayo na nḓila ye vha fhindula mbudziso dzanga vha tshi shumisa Bivhili, zwo ntakadza. Ndo zwi vhona uri u tevhedza zwine Bivhili ya zwi funza ndi zwone zwine zwa ita uri vha vhe vhathu vhavhuḓi. Ndo zwi vhona uri na nṋe ndo vha ndi tshi tea u ita tshanduko dzo vhalahonyana uri ndi kone u fana navho.

Ndo vha ndi tshi tea u shandula nḓila ine nda tshila ngayo ngauri ndo vha ndi gay. Ndo vha ndi tshi tea u shandula nḓila ine nda amba ngayo, nda ita ngayo zwithu, nda ambara ngayo, zwitaela zwanga zwa mavhudzi na khonani dzanga. Khonani dze nda vha ndi nadzo vho vha vha tshi nkolela vha tshi ri: “Ndi ngani ni tshi khou ita zwenezwi zwithu? Ho vha hu si na tsho khakheaho nga inwi. Ni songo guda Bivhili. No luga no ralo.” Zwithu zwe zwa nkonḓela u zwi shandula ndi nḓila i si yavhuḓi ye nda vha ndi tshi tshila ngayo.

Naho zwo vha zwi songo leluwa u ita dzenedzi tshanduko, ndo vha ndi tshi zwi ḓivha uri zwi a konadzea ngauri ndo kwamiwa nga maipfi a re kha 1 Vhakorinta 6:9-11 ane a ri: “Naa a ni zwi ḓivhi uri vhathu vha songo lugaho a vha nga ḽi ifa ḽa Muvhuso wa Mudzimu? Ni songo fhurwa. Vhane vha ḓifara luvhi nga zwa vhudzekani, vhane vha gwadamela midzimu ya zwifanyiso, phombwe, vhanna vhane vha rengisa muvhili, vhanna vhane vha ita zwa vhudzekani na vhaṅwe vhanna, . . . a vha nga ḽi ifa ḽa Muvhuso wa Mudzimu. Vhaṅwe vhaṋu vho vha vha tshi ita zwenezwo. Fhedzi no ṱanzwiwa.” Yehova o no thusa vhathu tshifhingani tsho fhiraho uri vha ite tshanduko, na nṋe o nthusa. Zwo ndzhiela miṅwaha yo vhalaho nahone ndo filimba vhukuma, fhedzi nḓila ine Ṱhanzi dza Yehova vha mpfuna ngayo na nḓila ye vha nndivhisa ngayo zwo nthusa.

NḒILA YE NDA VHUYELWA NGAYO: Zwino ndi khou tshila nga nḓila yavhuḓi. Zwino ndo vhinga nahone nṋe na mufumakadzi wanga ri thusa ṅwana washu uri a tshile u tendelana na zwine Bivhili ya zwi funza. A tshi tsha tshila nga nḓila ye nda vha ndi tshi tshila ngayo u thomani. Ndi na vhushaka havhuḓi na Yehova nahone ndi khou ḓiphiṋa nga u mu shumela. Ndi muhulwane wa tshivhidzo nahone ndo kona u thusa vhaṅwe uri vha ḓivhe ngoho i re Bivhilini. Nḓila ye nda shanduka ngayo yo takadza mme anga zwa ita uri na vhone vha gude Bivhili nahone nga murahu vha lovhedzwa. Khaladzi anga muṱuku we a vha a tshi ḓifara luvhi, na ene o mbo ḓi vha Ṱhanzi.

Vhaṅwe vhathu vhe vha vha vha tshi ḓivha nḓila ye nda vha ndi tshi tshila ngayo, vha a zwi vhona uri zwino ndo shanduka na uri ndi tshila nga nḓila yavhuḓi. Ndi a zwi ḓivha uri ndi mini zwe zwa nthusa uri ndi ite dzenedzi tshanduko. Tshifhingani tsho fhiraho ndo humbela madokotela uri a nthuse, fhedzi vho nṋea nyeletshedzo i si yavhuḓi. Ndi Yehova we a nthusa. Naho ndo vha ndi tshi ḓipfa ndi si tshithu, o ntsumbedza uri u a mpfuna na uri ha mmpheleli mbilu. Zwe zwa nthusa u ita tshanduko ndi u ḓivha uri Mudzimu o ṱalifhaho na ane a ri funa u na ndavha na nṋe nahone u ṱoḓa ndi tshi vha na vhutshilo havhuḓi.

“Ndo Pfa Ndi Songo Fushea, Ndi Na Vhuludu Nahone Ndi Si Tshithu.”—VHO KAZUHIRO KUNIMOCHI

ṄWAHA WA MABEBO: 1951

SHANGO: DZHAPANI

ZWE VHA VHA VHA TSHI ZWI ITA: U ṰAṰISANA NGA DZIBAISIGIRA

VHUTSHILO HANGA HA TSHIFHINGANI TSHO FHIRAHO: Ndo alutshela ḓoroboni i si na phosho i re tsini na lwanzheni ngei Shizuoka ngei Prefecture kha ḽa Dzhapani. Hahashu ro vha ri malo nahone ri tshi dzula kha kuḓu kuṱukuṱuku. Khotsi anga vho vha vhe na vhengele ḽa dzibaisigira. Musi ndi tshi kha ḓi vha ṅwana, vho vha vha tshi ṱuwa na nṋe kha miṱaṱisano ya dzibaisigira. Zwenezwo zwa ita uri ndi takalele wonoyo mutambo. Khotsi anga vho mbo ḓi thoma u nndugiselela uri ndi dzhene kha yeneyo miṱaṱisano ya dzibaisigira. Musi ndi phuraimari, vho ngudisa uri ndi kone u wina kha yeneyo miṱaṱisano. Musi ndi sekondari, ndo wana pfufho tharu miṅwaha miraru i khou tou tevhekana. Ndo wana tshibuli tshavhuḓi tsha u ya yunivesithi, fhedzi nṋe nda khetha u ya tshikoloni tsha u guda u ṱaṱisana nga dzibaisigira. Musi ndi na miṅwaha ya 19, zwa u ṱaṱisana nga dzibaisigira zwo mbo ḓi vha mushumo wanga.

Nga tshenetsho tshifhinga, ndo vha ndi tshi ṱoḓa u vha mureili wa dzibaisigira a fhiraho vhoṱhe Dzhapani. Ndo vha ndi tshi ṱoḓa u vha na tshelede nnzhi-nnzhi uri ndi kone u ḓiphiṋa nga vhutshilo na uri muṱa wanga u kone u kapula mapfura nga lebula. Ndo vha ndi tshi shuma vhukuma musi ndi tshi ita nḓowe-nḓowe. Nga zwiṅwe zwifhinga musi zwi tshi konḓa vhukuma ndi tshi khou ita nḓowe-nḓowe kana musi ndi kha muṱaṱisano, ndo vha ndi tshi ḓivhudza uri ndo bebelwa zwenezwi na uri ndi tea u bvela phanḓa. Nda ita nga u ralo. Ndo mbo ḓi thoma u vhona mvelelo dza u shuma hanga nga maanḓa. Nga ṅwaha wanga wa u thoma musi ndi tshi khou ṱaṱisana na vhaṅwe vhareili vhaswa, ndo dzhia vhuimo ha u thoma. Nga ṅwaha wanga wa vhuvhili, ndo dzhenela kha muṱaṱisano we wa vha u tshi ḓo sumbedza uri ndi nnyi mureili wa khwinesa kha ḽa Dzhapani. Ndo dzhenelela lwa rathi kha wonoyo muṱaṱisano nahone ndo vha ndi tshi bva kha vhuimo ha vhuvhili tshifhinga tshoṱhe.

Ndo vha ndi tshi dzulela u dzhia vhuimo ha nṱha kha muṱaṱisano nahone vhathu vha thoma u mmbidza uri ndi milenzhe yo khwaṱhaho ya Tokai, iṅwe ḓorobo ya Dzhapani. Ndo vha ndi na muya wa u ṱaṱisana. Nga u ya ha tshifhinga, vhaṅwe vhane nda ṱaṱisana navho vho vha vha tshi nnyofha ngauri ndo vha ndi na vhuhali musi ndi tshi ṱaṱisana navho. Ndo vha ndi tshi vho holesa nahone ndi tshi renga tshiṅwe na tshiṅwe tshine nda tshi takalela. Ndo renga nnḓu ye ya vha i na kamara i re na mitshini yavhuḓi ya u ita nyonyoloso. Ndo renga goloi ya vhunzhilinzhili ye mutengo wayo wa vha u tshi lingana na wa nnḓu. Ndo renga dzinnḓu na dzi-shares uri ndi vhulunge tshelede yanga.

Naho ndo vha ndi na tshelede, ndo pfa ndi songo fushea, ndi na vhuludu nahone ndi songo takala. Nga tshenetsho tshifhinga, ndo vha ndi na mufumakadzi na vhana, fhedzi ndo vha ndi tshi vha fhelela mbilu. Ndo vha ndi tshi vha halifhela naho vho ita zwithu zwi sa ri tshithu. Vho vha vha tshi dzula vho tshuwa nahone vha tshi sedza mbonalo ya tshifhaṱuwo tshanga u itela u vhona arali ndo sinyuwa kana ndo takala.

Nga u ya ha tshifhinga, mufumakadzi wanga a thoma u guda Bivhili na Ṱhanzi dza Yehova. Zwenezwo zwo ita uri vhutshilo hashu vhu shanduke. O ri u khou ṱoḓa u ya miṱanganoni ya Ṱhanzi dza Yehova, nda ri ndi khwine ri tshi tou ṱuwa roṱhe sa muṱa. Ndi kha ḓi humbula musi muṅwe muhulwane wa tshivhidzo a tshi ḓa muḓini wanga a thoma u guda Bivhili na nṋe. Zwe nda zwi guda zwo nkwama mbilu.

NḒILA YE BIVHILI YA SHANDULA NGAYO VHUTSHILO HANGA: Thi nga hangwi nḓila ye Vhaefesa 5:5 ya nkwama ngayo. I ri: “A hu na ane a ḓo ḽa ifa ḽa Muvhuso wa Kristo na wa Mudzimu, arali a tshi ḓifara luvhi nga zwa vhudzekani kana e na vhuyaḓa kana e na tseḓa, zwine zwa vha u gwadamela midzimu ya zwifanyiso.” Ndo vha ndi tshi zwi ḓivha uri vhathu vhanzhi vha a betsha kha muṱaṱisano wa dzibaisigira na uri u ita uri muthu a vhe na tseḓa. Luvalo lwanga lwo vha lu tshi ndina. Ndo zwi vhona uri arali ndi tshi ṱoḓa u takadza Yehova, ndi tea u litsha u ṱaṱisana nga dzibaisigira. Fhedzi zwo vha zwi songo leluwa u ita nga u ralo.

Ṅwaha wo fhelaho ndo vha ndo wina vhukuma kha miṱaṱisano nahone ndo vha ndi tshi kha ḓi ṱoḓa u ita zwo engedzeaho. Ndo vha ndi tshi tea u vha na muya wa u ṱaṱisana uri ndi kone u wina kha muṱaṱisano. Fhedzi u guda Bivhili zwo nthusa uri ndi dzike na u vha na mulalo ndi si tsha vha na dzangalelo kha u dzhenelela kha miṱaṱisano. Ndo tou dzhenelela kha muṱaṱisano luraru fhedzi musi ndo no thoma u guda, fhedzi ndo vha ndi kha ḓi funa zwa u ṱaṱisana. Ndo vha ndi sa ḓivhi uri ndi nga ṱunḓela hani muṱa wanga. Ndo vha ndi sa ḓivhi uri ndi fare mini ndi litshe mini nahone mashaka anga o vha a sa takaleli ndi tshi guda. Khotsi anga vho kulea nungo nga phetho ye nda i ita. Ndo vha ndo tsikeledzea na u ḓaḓa lwe nda thoma u vha na ulcer.

Ndo kona u konḓelela nge nda dzula ndi tshi guda Bivhili na u ya miṱanganoni ya Ṱhanzi dza Yehova. Nga u ya ha tshifhinga, ndo mbo ḓi vha na lutendo lwo khwaṱhaho. Ndo humbela Yehova uri a fhindule thabelo dzanga na u nthusa uri ndi zwi vhone uri o dzi fhindula. Musi mufumakadzi wanga a tshi mmbudza uri ha ṱoḓi nnḓu khulwane uri a kone u takala, zwo ita uri ndi rudze mbilu. Ndo ita mvelaphanḓa nga zwiṱuku nga zwiṱuku.

NḒILA YE NDA VHUYELWA NGAYO: Ndo zwi vhona uri maipfi a Yesu a re kha Mateo 6:33 ndi ngoho. O ri: “Dzulani ni tshi ṱoḓa Muvhuso wa Mudzimu na u luga hawe u thoma, zwiṅwe zwithu zwoṱhe ni ḓo engedzwa ngazwo.” A ri athu u vhuya ra ṱahela “zwiṅwe zwithu” zwine ra zwi ṱoḓa uri ri tshile zwe Yesu a amba nga hazwo. Naho ndi si tsha wana tshelede nnzhi u fana na musi ndi tshi kha ḓi ita zwa muṱaṱisano, lwa miṅwaha ya 20, nṋe na muṱa wanga a ri lili tshithu.

Musi ndi tshi khou shumela Yehova na vhahashu, zwi ita uri ndi takale na u fushea u fhira u thomani. Na tshifhinga tshi tou gidima. Nḓila ine ra tshilisana ngayo muṱani yo no khwinisea. Vhana vhanga vhararu na vhafumakadzi vhavho vha vho shumela Yehova.