Mishumo Ya Vhaapostola 9:1-43
9 Saulo o vha a tshi kha ḓi vha o halifhela vhafunziwa vha Murena,+ a tshi ṱoḓa u vha vhulaya, a ya kha tshifhe muhulu
2 a mu humbela uri a mu ṅwalele marifhi a u ya sinagogoni dza ngei Damaseko, uri musi a tshi wana vhanna na vhafumakadzi vho faraho iyo Nḓila,+ a vha fare a vha ḓise Yerusalema.
3 Musi e nḓilani a tshi vho swika tsini na Damaseko, a vhonetshelwa nga lupenyo lu bvaho ṱaḓulu,+
4 a wela fhasi, a pfa ipfi ḽi tshi ri: “Saulo, Saulo, ndi ngani u tshi khou ntovhola?”
5 Saulo a ri: “Murena, ndi iwe nnyi?” Ene a ri: “Ndi nṋe Yesu,+ ane wa khou mu tovhola.+
6 Takuwa u dzhene muḓini, u ḓo vhudzwa zwine wa fanela u zwi ita.”
7 Vhanna vhe a vha a tshi khou tshimbila navho vho vha vho sokou ima vho fhumula, vha tshi khou pfa ipfi, fhedzi vha sa vhoni muthu.+
8 Saulo a takuwa a sa vhoni tshithu, naho maṱo awe o vha o vulea. Vha mu fara nga tshanḓa vha dzhena nae Damaseko.
9 Ha fhela maḓuvha mararu a sa koni u vhona,+ a sa ḽi kana u nwa.
10 Henefho Damaseko ho vha hu na mufunziwa we a vha a tshi pfi Anania,+ Murena a amba nae kha bono a ri: “Anania!” Ene a ri: “Ndi fhano Murena.”
11 Murena a ri: “Takuwa u ye kha nḓila ine ya pfi I Songo Kombamaho,* nḓuni ya Yudasi, henefho u ṱoḓe munna ane a pfi Saulo a bvaho Tariso.+ Ngauri u khou rabela,
12 o u vhona kha bono u tshi ḓa wa mu vhea zwanḓa uri a dovhe a vhone.”+
13 Fhedzi Anania a ri: “Murena, ndo pfa vhathu vha tshi amba nga ha nḓila ye onoyu munna a tambudza ngayo vhakhethwa vhau ngei Yerusalema.
14 O rumiwa fhano nga vhahulwane vha vhotshifhe uri a fare vhoṱhe vhane vha vhidzelela dzina ḽau.”+
15 Fhedzi Murena a ri: “Iya khae ngauri ndo mu nanga+ uri a ṱanziele nga ha dzina ḽanga kha dzitshaka,+ kha mahosi+ na kha Vhaisiraele.
16 Ngauri ndi ḓo mu sumbedza uri u ḓo tambudzwa lungafhani a tshi itela dzina ḽanga.”+
17 Anania a ya a dzhena kha yeneyo nnḓu, a mu vhea zwanḓa a ri: “Wahashu Saulo, Murena Yesu we wa mu vhona u nḓilani u tshi khou ḓa ngeno, o nthuma uri u dovhe u vhone na uri u ḓale muya mukhethwa.”+
18 Nga u ṱavhanya ha wa zwithu zwi ngaho zwikwati maṱoni awe, a dovha a vhona. A takuwa a lovhedzwa.
19 Nga murahu a ḽa zwiḽiwa a vha na nungo.
A dzula Damaseko maḓuvha o vhalaho e na vhafunziwa,+
20 a thoma u funza sinagogoni uri Yesu ndi Murwa wa Mudzimu.
21 Fhedzi vhoṱhe vhe vha mu pfa vha mangala vha ri: “Naa uyu munna a si ene we a tovhola vha ngei Yerusalema vhane vha vhidzelela ḽeneḽi dzina?+ Naa a si ene we a ḓa fhano uri a vha fare a vha ise kha vhahulwane vha vhotshifhe?”+
22 Fhedzi Saulo a bvela phanḓa a tshi funza nga hu bvelelaho, a tshi mangadza Vhayuda vha dzulaho Damaseko musi a tshi vha sumbedza uri Yesu ndi ene Kristo.+
23 Musi ho no fhela maḓuvha manzhi, Vhayuda vha langana u mu vhulaya.+
24 Saulo a ḓivha zwe vha langana u zwi ita. Vha mu lalela khoroni vhusiku na masiari uri vha mu vhulaye.
25 Ngauralo, vhafunziwa vhawe vha mu dzhia vhusiku vha mu bvisa nga buli ḽi re luvhondoni, vha mu tsitsela fhasi nga manngi.+
26 Musi a tshi swika Yerusalema+ a ita uri a ṱangane na vhafunziwa, fhedzi vhoṱhe vho vha vha tshi mu ofha, ngauri vho vha vha sa tendi uri o no vha mufunziwa.
27 Ngauralo, Baranaba+ a mu thusa nga u mu isa kha vhaapostola. A vha vhudza uri Saulo o vhona Murena+ nḓilani na uri Murena o amba nae. A vha vhudza na uri Saulo o funza nga ha dzina ḽa Yesu nga tshivhindi musi e Damaseko.+
28 Saulo a dzula navho, a tshimbila o vhofholowa ngei Yerusalema, a tshi amba nga tshivhindi nga ha dzina ḽa Murena.
29 O vha a tshi amba na u hanedzana na Vhayuda vha ambaho Tshigerika. Fhedzi vhenevho vha lingedza u mu vhulaya.+
30 Musi vhahawe vha tshi zwi pfa, vha ya nae Kesarea, vha mu rumela Tariso.+
31 Zwivhidzo zwoṱhe zwa Yudea, Galilea na Samaria+ zwa vha na mulalo, zwa khwaṱhiswa; zwa bvela phanḓa zwi tshi engedzea musi zwi tshi ofha Yehova* na u khwaṱhiswa nga muya mukhethwa.+
32 Musi Petro a tshi khou tshimbila madzinguni oṱhe, a swika na kha vhakhethwa vhane vha dzula ngei Lida.+
33 Henefho a wana muṅwe munna we a vha a tshi pfi Eniasi, we a vha o no fhedza miṅwaha ya malo o eḓela mmbeteni, ngauri o vha o oma lurumbu.
34 Petro a ri: “Eniasi, Yesu Kristo u khou u fhodza.+ Vuwa u adzulule mmbete.”+ A vuwa nga u ṱavhanya.
35 Musi vhoṱhe vha dzulaho Lida na shangoni ḽa Sharona vha tshi mu vhona, vha tenda Murena.
36 Ngei Yope ho vha hu na muṅwe mufunziwa we a vha a tshi pfi Tabita, zwine zwa amba uri “Doroka.”* Onoyo mufumakadzi o vha a tshi ita mishumo mivhuya na u thusa vhashai.
37 Fhedzi misini yeneyo a lwala a fa. Vha mu ṱanzwa vha mu vhea kamarani ya nṱha.
38 Samusi muḓi wa Lida wo vha u tsini na wa Yope, musi vhafunziwa vha tshi pfa uri Petro o vha e henefho muḓini, vha ruma vhanna vhavhili uri vha ye vha ambe nae vha ri: “Ri humbela uri u ḓe ngeno nga u ṱavhanya.”
39 Petro a takuwa a ṱuwa navho. Musi a tshi swika, vha mu isa kamarani ya nṱha; tshilikadzi dzoṱhe dza mu kuvhanganela dzi tshi khou lila, dza mu sumbedza zwiambaro zwoṱhe zwe Doroka a vha rungela zwone a tshi kha ḓi tshila.
40 Fhedzi Petro a bvisela vhathu vhoṱhe nnḓa,+ a gwadama a rabela. A rembuluwa a amba na tshitumbu a ri: “Tabita, vuwa!” A bonyolola maṱo awe, musi a tshi vhona Petro, a vuwa a dzula.+
41 A mu fara nga tshanḓa, a mu takusa, a vhidza vhakhethwa na dzitshilikadzi a vha sumbedza uri Tabita u khou tshila.+
42 Zwenezwo zwa ḓivhea muḓini woṱhe wa Yope, vhanzhi vha tenda Murena.+
43 A dzula henefho Yope maḓuvha manzhi na Simoni+ musuki wa mikumba.
