Levitiko 3:1-17
3 “‘Arali tshifhiwa tshawe tshi tshiṱhavhelo tsha u pfumedzana,*+ a tshi khou ṋekedza kholomo, hu sa londwi uri ndi ya mboho kana ndi ya tsadzi, a ḓise tshifuwo tshi sa lwaliho phanḓa ha Yehova.
2 A vhee tshanḓa tshawe kha ṱhoho ya tshifhiwa tshawe, tshi ṱhavhiwe muṋangoni wa dennde ḽa muṱangano; vharwa vha Aroni vhane vha vha vhotshifhe vha ḓo shasha malofha thungo dzoṱhe dza aḽeṱare.
3 A ḓise tshiṅwe tsha tshiṱhavhelo tsha u pfumedzana sa tshifhiwa tshi fhiselwaho Yehova:+ mapfura+ o putelaho mala na mapfura oṱhe a re kha mala,
4 na tswio mbili dzi re na mapfura tsini na zwizwa. A dovhe a bvise na mapfura a re kha tshivhindi khathihi na tswio.+
5 Vharwa vha Aroni vha ḓo tshi dubisa kha aḽeṱare nṱha ha tshifhiwa tsha u fhiswa tsho vhewaho nṱha ha khuni dzi re muliloni,+ sa tshifhiwa tshi fhiswaho nga mulilo tshine tsha nukhelela kha Yehova.+
6 “‘Arali tshifhiwa tshawe tsha tshiṱhavhelo tsha u pfumedzana na Yehova tshi tsha nngu kana mbudzi, a ḓise tshifuwo tsha tshiduna kana tsha tshisadzi tshi sa lwaliho.+
7 Arali a tshi khou ṋekedza thutha sa tshifhiwa tshawe, u ḓo tshi ṋekedza phanḓa ha Yehova.
8 A vhee tshanḓa tshawe kha ṱhoho ya tshifhiwa tshawe, tshi ṱhavhiwe muṋangoni wa dennde ḽa muṱangano. Vharwa vha Aroni vhane vha vha vhotshifhe vha ḓo shasha malofha atsho thungo dzoṱhe dza aḽeṱare.
9 A ḓise mapfura a bvaho kha tshiṱhavhelo tsha u pfumedzana sa tshifhiwa tshi fhiselwaho Yehova.+ A bvise mapfura oṱhe a re mutshilani tsini na muṱoḓo, mapfura o putelaho mala, mapfura oṱhe a re kha mala,
10 na tswio mbili dzi re na mapfura tsini na zwizwa. A dovhe a bvise na mapfura a re kha tshivhindi na tswio.+
11 Tshifhe u ḓo tshi dubisa kha aḽeṱare sa tshifhiwa tsha zwiḽiwa,* tshi fhiselwaho Yehova.+
12 “‘Arali tshifhiwa tshawe i mbudzi, u ḓo i ḓisa phanḓa ha Yehova.
13 A vhee tshanḓa tshawe kha ṱhoho yayo, i ḓo ṱhavhiwa phanḓa ha dennde ḽa muṱangano, vharwa vha Aroni vha shashe malofha ayo thungo dzoṱhe dza aḽeṱare.
14 A ḓise tshiṅwe tsha tshiṱhavhelo sa tshifhiwa tshi fhiselwaho Yehova tshine tsha vha mapfura o putelaho mala na mapfura oṱhe a re kha mala,+
15 na tswio mbili na mapfura a re khadzo ane a vha tsini na zwizwa. A dovhe a bvise na mapfura a re kha tshivhindi na tswio.
16 Tshifhe u ḓo zwi dubisa kha aḽeṱare sa tshifhiwa tsha zwiḽiwa,* tsho fhiswaho tshine tsha nukhelela. Mapfura oṱhe ndi a Yehova.+
17 “‘Ndi mulayo wa lini na lini kha mirafho yaṋu, na hoṱhe hune na dzula hone: A no ngo tea u ḽa mapfura naho e afhio kana malofha+ naho e afhio.’”
