Vhurifhi Ha Vhuvhili Vhu Yaho Kha Timotheo 4:1-22
4 Ndi a u laya phanḓa ha Mudzimu na Kristo Yesu, ane a ḓo haṱula+ vha tshilaho na vho faho,+ musi a tshi ḓivhonadza+ na musi a tshi vha Khosi Muvhusoni wawe,+
2 uri u huwelele ipfi+ ḽa Mudzimu nga u fhisea, zwifhingani zwavhuḓi na zwi konḓaho; u kaidze,+ u laye, u ṱuṱuwedze u sa fheli mbilu na u funza+ nga vhutsila.
3 Ngauri hu ḓo vha na tshifhinga tshine vha si tsha ḓo thetshelesa pfunzo ya ngoho,*+ fhedzi vha ḓo tevhela nyemulo dzavho, vha ṱoḓa vhafunzi vhane vha ḓo vha vhudza zwine zwa takadza nḓevhe dzavho.*+
4 Vha ḓo litsha u thetshelesa ngoho, vha thetshelesa mazwifhi.
5 Fhedzi iwe dzula wo dzivhuluwa kha zwoṱhe, konḓelela zwi lemelaho,+ ita mushumo wa muevangeli,* shumela Mudzimu nga nḓila yavhuḓi.+
6 Ngauri ndo no ḓi shululwa sa tshinwiwa tshi shelwaho kha aḽeṱare,+ tshifhinga tsha u vhofhololwa hanga+ tshi tsini.
7 Ndo lwa nndwa yo teaho,+ ndo ṱhaphudza mbambe,+ ndo tevhedza lutendo.
8 U bva zwino ndo vhetshelwa khare ya u luga+ ine Murena ane a vha muhaṱuli o lugaho+ a ḓo nṋea yone sa malamba nga ḽeneḽo ḓuvha,+ Murena u ḓo i ṋea nṋe na vhoṱhe vhe vha funa a tshi ḓivhonadza.
9 Iḓa kha nṋe nga u ṱavhanya.
10 Ngauri Dema+ o nṱutshela nge a funa zwa ḽino shango,* a ya Thesalonika; Kiresensi a ya Galata, Tito a ya Dalmatia.
11 Ndo sala na Luka fhedzi. U ḓe na Marko ngauri u a nthusa mushumoni wa Mudzimu.
12 Fhedzi ndo ruma Tixiko+ ngei Efesa.
13 Musi u tshi ḓa, u nḓele na tshiambaro tshe nda tshi sia na Karipo ngei Tiroasi na mipombo, zwihuluhulu yo itwaho nga mikumba.
14 Alekzanda ane a ita zwithu nga koporo* o nkhakhela zwihulu. Yehova* u ḓo mu lifhedza u ya nga mishumo yawe.+
15 Na iwe u mu thanyele, ngauri o pikisa mulaedza washu nga nḓila yo kalulaho.
16 Musi ndi tshi sengiswa lwa u thoma a hu na o imaho na nṋe, vhoṱhe vho nṱutshela. Ngavhe vha sa vhonwi mulandu.
17 Fhedzi Murena o nthusa, a nṋea maanḓa, uri a ntshumise uri ndi huwelele nga vhuḓalo na uri tshaka dzoṱhe dzi zwi pfe;+ nda ponyokiswa mulomoni wa ndau.+
18 Murena u ḓo mponyokisa kha mishumo mivhi yoṱhe, a ntshidza uri ndi ye Muvhusoni wawe wa ṱaḓulu.+ Nga a rendwe lini na lini. Amen.
19 U lumelise Prisika* na Akwila+ na muṱa wa Onesiforo.+
20 Erasito+ o sala Korinta, fhedzi ndo sia Tirofimo+ ngei Mileto a tshi khou lwala.
21 U ṱavhanye u ḓa vhuria vhu sa athu u swika.
Oibulo, Pudensi, Liko, Klaudia na vhatendi vhoṱhe vha a u lumelisa.
22 Ngavhe Murena a tshi fhaṱutshedza nḓila ine wa humbula ngayo, a u sumbedze vhuthu vhuhulu.
