Mishumo 21:1-40
21 Musi ro no onesana navho ra buḓekanya nga tshikepe ra livha Kosi, nga ḓuvha ḽi tevhelaho ra ya Rodo, nahone u bva henefho ra fhirela Patara.
2 Musi ro no wana tshikepe tshine tsha buḓekanya tshi tshi ya Fenikia, ra tshi ṋamela ra ya henengei.
3 Ri tshi vho vhona tshiṱangadzime tsha Kipiro ra tshi pfuka nga thungo ya tsha monde ra wela Siria, ra swika Tiro, ngauri tshikepe tsho vha tshi tshi fanela u tsitsa thundu henefho.
4 Ra ṱoḓa vhafunziwa, ra vha wana nahone ra dzula henefho maḓuvha a sumbe. Fhedzi nge vha vha vho vhudzwa nga muya mukhethwa, vha ḓi dzulela u vhudza Paulo uri a songo ya Yerusalema.
5 Musi tshifhinga tsha uri ri ṱuwe tshi tshi swika, ra ṱuwa, vhathu vhoṱhe u katela na vhafumakadzi na vhana, vha ri fhelekedza vha ri bvisa kha wonoyo muḓi. Ra gwadama henefho khunzi-khunzini ra rabela
6 nahone ra onesana. Ra ṋamela tshikepe, fhedzi vhone vha humela mahayani avho.
7 Ra ṱhaphudza lwendo lwashu lulapfu lwa u bva Tiro ra mbo ḓi swika Ptolemai, ra lumelisana na vhahashu nahone ra dzula navho ḓuvha ḽithihi.
8 Nga ḓuvha ḽi tevhelaho, ra ya Kesarea, ra swika nḓuni ya muevangeli Filipo, we a vha e muṅwe wa vhanna vha sumbe,* nahone ra dzula nae.
9 Onoyo munna o vha e na vhananyana vhaṋa vha songo vhingwaho, vhe vha vha vha tshi porofita.
10 Musi ro no dzula maḓuvha o vhalaho henefho, ha ḓa muṅwe muporofita ane a pfi Agabo ane a bva Yudea,
11 a ḓa kha riṋe a dzhia bannda ḽa Paulo a ḓivhofha milenzhe na zwanḓa nahone a ri: “Muya mukhethwa u ri, ‘Muṋe wa ḽeneḽi bannda u ḓo vhofhiwa nga yeneyi nḓila nga Vhayuda ngei Yerusalema nahone vha ḓo mu kumedza zwanḓani zwa vha dzitshaka.’”
12 Musi ri tshi pfa zwenezwo, riṋe na vhathu vha henefho ra thoma u mu humbela uri a songo ya Yerusalema.
13 Paulo a fhindula a ri: “Ni khou lilela-ni ni tshi ita uri ndi khathuwe mbilu? Ndi a ni fulufhedzisa uri ndo ḓiimisela u vhofhiwa na u fa ngei Yerusalema ndi tshi itela dzina ḽa Murena Yesu.”
14 Musi ri tshi vhona a sa tendi zwine ra khou zwi amba, ra tendelana ra ri: “Kha hu itwe zwine Yehova a zwi funa.”
15 Nga murahu ha eneo maḓuvha ra lugiselela lwendo ra thoma u ya Yerusalema.
16 Ra ṱuwa na vhaṅwe vhafunziwa vha bvaho ngei Kesarea, vha ri isa ha Mnasoni wa Kipiro, we a vha e mufunziwa wa kale, ra vha vhaeni nḓuni yawe.
17 Musi ri tshi swika Yerusalema vhahashu vha ri ṱanganedza nga dakalo.
18 Fhedzi nga ḓuvha ḽi tevhelaho ra ṱuwa na Paulo ra ya ha Yakobo; nahone vhahulwane vhoṱhe vho vha vhe hone.
19 A vha lumelisa vhoṱhe nahone a thoma u vha vhudza nga vhuḓalo zwithu zwe Mudzimu a zwi itela vha dzitshaka a tshi mu shumisa musi e vhuḓinḓani hawe.
20 Musi vho no zwi pfa vha thoma u renda Mudzimu, nahone vha amba na Paulo vha ri: “Wahashu, u khou zwi vhona uri hu na vhatendi vha zwigidi zwo vhalaho henengei vhukati ha Vhayuda; nahone vhoṱhe vha a fhisetshela Mulayo.
21 Fhedzi vho pfa mavhari-vhari nga ha iwe uri u khou funza Vhayuda vhoṱhe vhukati ha dzitshaka uri vha litshe u tevhedza mulayo wa Mushe, nga u vha vhudza uri vha songo fumbisa vhana vhavho kana uri vha litshe u tevhela mikhuvha.
22 Ri fanela u ita mini? Vha ḓo zwi pfa zwa uri u fhano.
23 Nga zwenezwo, ita zwine ra u vhudza ri tshi ri: Ri na vhanna vhaṋa vho itaho muano.
24 Ṱuwa na vhenevho vhanna nahone u ḓikunakise nga lwa mulayo khathihi navho u vha badelele uri vha vheulwe dziṱhoho. Ndi hone vhathu vhoṱhe vha tshi ḓo ḓivha zwauri mavhari-vhari e wa hwelelwa a si one, vha ḓo vhona uri u khou tshimbila nga nḓila yo teaho nahone u khou tevhedza Mulayo.
25 Vhatendi vha bvaho kha vha dzitshaka, ro vha ṅwalela nga ha phetho yashu ya uri vha iledze zwithu zwo ṋekedzwaho midzimu ya zwifanyiso khathihi na malofha, na u ḽa zwo faho nga u tou tzhipiwa, na vhupombwe.”
26 Ngauralo, nga ḓuvha ḽi tevhelaho Paulo a ṱuwa na vhenevho vhanna a ḓikunakisa nga lwa mulayo khathihi navho nahone vha ya thembeleni, u itela u ḓivhadza maḓuvha ane vhuṱambo ha u ḓikunakisa a ḓo fhela ngao, na u ṋekedza tshiṱhavhelo tsha muṅwe na muṅwe wavho nga ḽeneḽo ḓuvha.
27 Ha ri maḓuvha a sumbe e tsini na u fhela, musi Vhayuda vha bvaho Asia vha tshi mu vhona thembeleni vha thoma u fhiriṱanya gogo ḽoṱhe, nahone vha mu fara,
28 vha vhidzelela vha ri: “Vhanna vha Isiraele, ri thuseni! Ngoyu uḽa muthu ane a funza vhathu vhoṱhe fhethu hoṱhe zwine vhathu vhahashu vha si zwi fune na zwine zwa lwisana na Mulayo wa henefha fhethu, zwiṅwe hafhu, o ḓisa na Vhagerika thembeleni a tshikafhadza afha fhethu hukhethwa.”
29 Ngauri vho vha vho mu vhona e na Tirofimo wa Efesa henefho muḓini nahone vha humbula uri Paulo o mu ḓisa thembeleni.
30 Ha vuwa bonyongo henefho muḓini, vhathu vha ḓa vha tshi khou gidima vha fara Paulo vha mu kokodzela nnḓa ha thembele, nahone vha vala mavothi nga u ṱavhanya.
31 Musi vha tshi khou ṱoḓa u mu vhulaha, mulangammbi a pfa zwauri ho vuwa bonyongo muḓini woṱhe wa Yerusalema;
32 nga u ṱavhanya a dzhia maswole na nduna dzavho vha gidimela khavho. Musi vha tshi vhona mulangammbi na maswole, vha litsha u rwa Paulo.
33 Ndi hone mulangammbi a tshi sendela tsini a fara Paulo nahone a laedza uri a vhofhiwe nga ngeḓane mbili; nahone a mu vhudzisa uri ndi ene nnyi na zwe a tshinya.
34 Fhedzi vhaṅwe kha gogo vha thoma u zhamba vha tshi amba izwi, vhaṅwe vha tshi amba zwiḽa. Ngauralo, nge a kundwa u pfa uri hu nga vha ho tshinyala mini nga nṱhani ha bonyongo ḽe ḽa vha ḽi hone, a laedza uri a ḓiswe gammbani ya maswole.
35 Musi vha tshi swika zwiṱepisini, zwa ṱoḓea uri a tou hwalwa nga maswole ngauri gogo ḽo vha ḽo halifha vhukuma;
36 ngauri gogo ḽo vha ḽi tshi khou vha tevhela ḽi tshi khou zhamba ḽi tshi ri: “Mu vhulaheni!”
37 Musi vhe tsini na u swika gammbani ya maswole, Paulo a amba na mulangammbi a ri: “Naa ndo tendelwa u amba na iwe?” Mulangammbi a mu fhindula a ri: “Naa u a kona u amba Lugerika?
38 Naa a u Muegipita we zwiḽa kale a ṱuṱuwedza uri hu vutshelwe muvhuso nahone a ya sogani e na vhavhulahi vha zwigidi zwiṋa?”
39 Paulo a fhindula a ri: “Nṋe ndi Muyuda wa Tariso ngei Kilikia, mudzulapo wa muḓi u ḓivheaho. Ngauralo, ndi khou humbela uri u ntendele ndi ambe na vhathu.”
40 Musi o no mu tendela, Paulo a ima kha zwiṱepisi, a ita ngafhadzo nga tshanḓa uri vhathu vha fhumule. Musi vho no fhumula, a amba navho nga Luheberu, a ri:
