TUMU PARAU MATAMUA | NA OE ANEI E FAATERE RA I TO OE ORARAA?
Te fifi: Te mau manaˈo haaparuparu
MEA teimaha anei te oraraa no te tahi huru to oe mai te oto paha, te riri aore ra te inoino? Mai te peu e e, aita paha rea taime aore ra puai to oe no te rave i te mea faufaa mau. Eaha te nehenehe e rave? a
HIˈORAA BIBILIA: DAVIDA
E rave rahi taime, ua taui te huru o te arii Davida. I te tahi taime, ua ahoaho e ua oto o ˈna. Eaha tei tauturu ia ˈna ia faaoromai? Ua haamahora Davida i to ˈna aau i te Atua. (Samuela 1, 24:12, 15) Ua papai atoa oia no te faataa i to ˈna mau huru e manaˈo. Ei taata tiaturi i te Atua, ua pure pinepine atoa oia. b
TA GREGORY I RAVE
Mai tei faaitehia i roto i te tuhaa matamua o teie tumu parau, ua fifi roa te oraraa o Gregory no te mea e ahoaho noa o ˈna. Te na ô ra oia: “E haapeapea hanoa vau e eita ta ˈu e nehenehe e faaea.” Eaha ta Gregory i rave no te faanaho faahou i to ˈna oraraa? Te parau ra oia: “Ia faaea vau i te na reira, ua farii au i te tauturu a ta ˈu vahine e te mau hoa. Ua farerei atoa vau i te taote e ua imi i te mau haamaramaramaraa no nia i to ˈu tupuraa. Ma te tahi mau tauiraa, te ite ra vau ua maitai mai to ˈu huru, aita râ i vaiiho i te reira ia haaparuparu ia ˈu. E ahoaho vau i te tahi mau taime, ua taa maitai râ ia ˈu i teie nei na te aha e faatupu i te reira e eaha te rave no te faaea i te ahoaho.”
“E maitai to te aau rearea mai te raau maˈi atoa ra.”—Maseli 17:22
TA OE E NEHENEHE E RAVE
E ahoaho hanoa anei oe? A tamata i to muri nei manaˈo no te faanaho faahou i to oraraa:
-
A papai no te faataa i to oe huru i tera e tera mahana.
-
A faaite i to oe huru i te tahi fetii piri aore ra hoa.
-
Eiaha e vaiiho i to oe huru ia haaparuparu atu. A uiui, ‘Mea tano anei ia manaˈo vau mai tera no ˈu?’
-
Eiaha e haapeapea, riri aore ra inoino hanoa. A faaohipa i to oe puai no te tahi atu ohipa maitai aˈe. c
Manaˈo faufaa: E pinepine, e haaparuparu te taata eiaha no to ratou tupuraa, no to ratou râ huru i mua i te reira.
a E nehenehe te huru o vetahi e taui no te tahi maˈi o te titauhia i te rapaauraa a te mau taote. I roto i te A ara mai na!, aita e faaitoitohia ra ia farii i te tahi ravea rapaauraa taa ê. Na te taata taitahi e hiˈopoa maite i te reira hou a rave ai i te faaotiraa.
b I roto i te Bibilia, e pure te rahiraa o te mau salamo ta Davida i papai.
c No te ite atu â, a hiˈo i te tumu parau matamua “Te ahoaho: Ravea no te faaiti mai” i roto i te vea A ara mai na! Tiurai-Atete 2014.
E au atoa outou . . .
TE PAHONO RA TE BIBILIA
Ua hepohepo vau: E nehenehe anei te Bibilia e tauturu mai?
E toru ravea ta te Atua no te tauturu i te feia e hepohepo ra.
TE PAHONO RA TE BIBILIA
Ia pure au i te Atua e tauturu mai anei oia?
Te tâuˈa ra anei te Atua ia fifi tatou?
A ARA MAI NA!
E aau “fanaˈo rahi” anei to oe?
Noa ˈtu te mau fifi, a hiˈo e nafea ia maitai noa to feruriraa a oaoa ˈtu ai.
