Eaha to roto?

Mau faaho'iraa ê

Tapura tumu parau

Ite no Iehova

Tahiti

A ara mai na!  |  Tetepa 2015

Ua tapea papu i ta ’na faaotiraa

Ua tapea papu i ta ’na faaotiraa

E 11 matahiti to Song Hee i to to ’na mama iteraa mea puu to ’na tua. Ua hi‘opoa te tahi taote ia ’na e ua itehia e ma‘i ivi tua parauhia scoliose to ’na. Mea puu aore ra mea fefe te tupuraa o te ivi tua. Ua ino roa te ma‘i o Song Hee i titauhia ’i ia tâpûhia o ’na. Aita râ Song Hee i farii i te pâmuraa toto. Ua ani te feia pia i te vea A ara mai na! ia ’na ia faatia mai i tei tupu.

I te iteraahia to oe ma‘i, ua tauturu anei te mau taote ia oe?

I te hoê maororaa e toru matahiti, e piti taote tei haapao noa i to ’u ma‘i. Ua puu roa ’tu â râ te tupuraa o to ’u ivi tua. Ua rahi roa te reira. Ua haamata hoi to ’u ivi tua i te taumi i to ’u mafatu e mahaha e ua haafifi i to ’u hutiraa aho. Ua titauhia iho â ia tâpûhia vau.

Ua farii anei oe i te tâpûraa?

E. Ua parauhia mai e tâpûraa atâta tera. Ua naea 116 faito te puu o to ’u ivi tua, mea rahi roa tera. No ’u, mea taa ê atu â te fifi. No ta ’u mau tiaturiraa niuhia i nia i te Bibilia, eita vau e farii i te pâmuraa toto. *

Ua itehia anei hoê taote o tei farii i te tâpû ia oe?

Ua farerei mâua to ’u mama hoê taote taa maitai i Floride, Marite. I to ’u parauraa ia ’na eita vau e farii i te pâmuraa toto, ua pahono mai oia eita hoê noa ’‘e taote e farii i te tâpû ia ’u mai te peu mai tera te faanahoraa. Hau atu â, ua na ô atoa oia eita ana‘e vau e tâpûhia, e pohe au na mua ’‘e te 20 matahiti. E 14 noa hoi matahiti to ’u i tera taime.

Ua faataa anei oe i te tumu o tena faaotiraa?

E. Ua parau atu vau, ua niuhia ta ’u mau tiaturiraa i nia i te Bibilia ma te faaite mea mo‘a te toto taata e animara. * I tahito, e haapohehia te tahi Iseraela ia amu oia i te toto! * Ua faaite atoa vau ia ’na i te Ohipa 15:19, 20. Ua parauhia i te mau Kerisetiano: ‘Eiaha e amu i te toto.’ Te auraa, eita e nehenehe e amu aore ra e pâmu i te reira i roto i te tino o te tahi taata.

Eaha te huru o tera taote?

Ua onoono oia i te faaohipa i te pâmuraa toto. Ua maere au ua parauhia mai eita te fare ma‘i faaaufau ia ’u i te mau haamâu‘araa o te tâpûraa ia farii au i te pâmuraa toto.

Iae, eaha ïa ta orua to oe mama i faaoti?

E au ra aita hoê a‘e taote e farii i te tâpû ia ’u ma te ore e faaohipa  i te pâmuraa toto. Ua tapea papu noa râ mâua mama i tera faaotiraa. Taa ê atu i te reira, te vai ra te tahi atu â fifi. I mua i te ture, aitâ i naea ia ’u te faito matahiti no te faaoti no ’u. Noa ’tu te ino roa ’tura to ’u ea, ua afaihia tera ohipa i te tiripuna. Aua‘a, ua horoa mai te auvaha ture o Floride 30 mahana no te imi hoê taote tâpû o te haapao i to ’u hinaaro.

Ua itehia mai anei hoê?

E! Na te tomite tuatiraa e te fare ma‘i a te mau Ite no Iehova o to ’u fenua i ite mai hoê taote taa ê no te ma‘i ivi tua i New York. Ua farii maitai oia i te tâpû e te farerei ia ’u. Ua nehenehe mâua e haapao i te titauraa a te tiripuna na mua ’‘e te taio mahana i horoahia mai. *

Ua tupu maitai anei te tâpûraa?

E! Ua tuu te taote Robert Bernstein i te mau auri no te faaafaro i to ’u ivi tua. E piti taime vau i te tâpûraahia. Ua ravehia na mua hoê e te tahi atu e piti hebedoma i muri a‘e.

No te aha e piti tâpûraa?

Mai te peu e tahe rahi te toto i te tâpûraa matamua, e taime to to ’u tino no te hamani atu â i te mau toropuru ura na mua ’‘e te piti o te tâpûraa. Aita hoê a‘e fifi i itehia e mea iti roa te toto i tahe i roto i tera na tâpûraa. Aua‘a, ua faaineine maitai te pǔpǔ tâpû, mea aravihi e haapao atoa i ta ratou ohipa. Ua itoito oioi atoa mai to ’u tino e aita hoê a‘e fifi i itehia i muri a‘e i te tâpûraa. Eita e ore no te mea aita i faaohipahia te pâmuraa toto. *

I muri a‘e, eaha te huru o to oe taote tâpû?

E tia i te mau taote ia haapao i te mau hinaaro atoa o te taata ma‘i

Ua oaoa roa oia e ua na ô: “E ere te tuhaa a te taote te tâpû-noa-raa.” No ’na, e tia i te mau taote ia haapao i te mau hinaaro atoa o te taata ma‘i, ta ’na mau tiaturiraa e te mea faufaa no ’na. E ere te mau Ite no Iehova ana‘e te rave i te faaotiraa mai tera.

^ par. 7 E Ite no Iehova te metua vahine o Song Hee. Hoê â tiaturiraa ta ’na e ta to ’na mama e ua bapetizohia Song Hee i 2012 i te 16raa o to ’na matahiti.

^ par. 11 Genese 9:3-5.

^ par. 11 Levitiko 17:10-14.

^ par. 17 E imi te mau tomite tuatiraa e te fare ma‘i a te mau Ite no Iehova i te mau taote o te farii i te rapaau ma te ore e faaohipa i te pâmuraa toto.

^ par. 21 I roto i te tahi papai no nia i te mau fifi o te pâmuraa toto, ua faaite te tomite Clinical Excellence a te pu no te ea i Nouvelle-Galles du Sud (Auteralia): “Ia pâmuhia te toto, hoê mea oraora te tuuhia i roto i te tino. Ua hamanihia te tino o te taata ia ore ia farii i te tahi mea ê o te ô atu i roto i te tino. Mea faufaa roa ia haapao maite i te reira no te paruru i te taata.”

No te ite atu â

PEE I TE MAU ARATAIRAA BIBILIA

E oraora maitai a‘e te mau Ite te patoi ra i te pâmuraa toto

Ua faaite te tahi mau vea no nia i te feia e patoi ra i te pâmuraa toto e e oraora maitai a‘e ratou e mea iti a‘e to ratou taime i te fare ma‘i.