MATAUPU 08
Ke Fai Koe mo Taugasoa o Ieova
E manako a Ieova ke iloa faka‵lei ne koe a ia. Kaia? E fakamoemoe a ia me ko te uke o au mea e tauloto e uiga ki a ia, ana auala mo tena fuafuaga, ka momea aka tou fia fai taugasoa ki a ia. E mata, e mafai eiloa o fai koe mo taugasoa o te Atua? (Faitau te Salamo 25:14.) Ne a au mea e mafai o fai ko te mea ke fai mo ana taugasoa? E tali aka ne te Tusi Tapu a fesili konā kae fakaasi mai i ei me i te fai taugasoa mo Ieova ko te ‵toe fesokotakiga tāua eiloa e ‵tau o maua.
1. Se a te ‵kamiga ko tuku atu ne Ieova?
“Fakapilipili atu ki te Atua, kae ka fakapilipili mai a ia ki a koutou.” (Iakopo 4:8) Se a te uiga o te mea tenei? Ko ‵kami koe ne Ieova ke fai mo ana taugasoa. Ona ko te mea e se lavea ne tatou te Atua, e faigata ki nisi tino ke tali‵tonu me e mafai o fai taugasoa latou mo te Atua. Kae e fakaasi mai ne Ieova i tena Muna, ko te Tusi Tapu, a mea e ‵tau o iloa ne tatou e uiga ki a ia ko te mea ke fakapili‵pili tatou ki a ia. Kafai e fai‵tau tatou ki te fekau a te Atua i te Tusi Tapu, ka gasolo eiloa o ‵pili te ‵tou va fakataugasoa mo Ieova, faitalia me e seki lavea ne tatou a ia.
2. Kaia e ‵tau o fai a Ieova mo fai tou toe taugasoa pili?
E sili atu te alofa o Ieova ki a koe i lō so se isi tino. E manako a ia ke fiafia koe kae ‵talo atu mō tena fesoasoani. E mafai ne koe o “‵pei atu” ou “manavasega katoa ki luga i a ia, me e atafai a ia ki a koutou.” (1 Petelu 5:7) E toka faeloa Ieova o fesoasoani, fakamafanafana kae fakalogologo ki ana taugasoa.—Faitau te Salamo 94:18, 19.
3. Se a te mea e manako Ieova ke fai ne ana taugasoa?
E alofa a Ieova ki tino katoa, “kae e pili Tena va fakataugasoa mo te tino fai mea tonu.” (Faataoto 3:32) E manako Ieova ke taumafai ana taugasoa o fai a mea ‵lei i tena kilokiloga kae ‵kalo keatea mai mea ma‵sei. E mafau‵fau a nisi tino me e se mafai o ola latou e ‵tusa mo tulaga o Ieova ki mea ‵lei mo mea ma‵sei. Kae ko Ieova e loto malamalama. E talia ne ia a tino katoa kolā e a‵lofa ki a ia kae fai te ‵toe mea e mafai ke fakafiafia atu ki a ia.—Salamo 147:11; Galuega 10:34, 35.
KELI MALOSI IFO
Tauloto ki nisi mea e ‵tau o fai ke fai koe mo taugasoa o Ieova mo te pogai e ‵tau ei o fai a ia mo tou toe Taugasoa pili.
4. Apelaamo ko te taugasoa o Ieova
A te tala i te Tusi Tapu o Apelaamo (telā e fakaigoa foki ki a Apelamo) e tuku mai i ei a nai fakamatalaga ki te uiga o te fai taugasoa mo te Atua. Faitau e uiga ki a Apelaamo i te Kenese 12:1-4. Ko sau‵tala ei ki fesili konei:
-
Se a te mea ne manako a Ieova ke fai ne Apelaamo?
-
Se a te tautoga ne fai atu ne Ieova ki a Apelaamo?
-
Ne saga atu pefea a Apelaamo ki fakatonuga a Ieova?
5. Mea e manako a Ieova ke fai ne ana taugasoa
E fakamoe‵moe sāle tatou ke fai ne ‵tou taugasoa a nisi mea.
-
Ne a nisi mea e manako koe ke fai atu ne ou taugasoa?
Faitau te 1 Ioane 5:3, ko sau‵tala ei ki te fesili tenei:
-
Ne a mea e manako Ieova ke fai ne ana taugasoa?
Ke faka‵logo ki a Ieova, kāti e ‵tau o ‵fuli ‵tou amioga io me ko ‵tou uiga. Faitau te Isaia 48:17, 18, ko sau‵tala ei ki te fesili tenei:
-
Kaia e manako ei a Ieova ke fai ne ana taugasoa a ‵fuliga?
6. Mea e fai ne Ieova mō ana taugasoa
E fesoasoani a Ieova ki ana taugasoa ke mafai ne latou o fa‵ki i fakalavelave. Pei te VITIO, ko sau‵tala ei ki te fesili tenei.
-
Ne fesoasoani atu pefea a Ieova ki te fafine i te vitio ke manumalo i ana mafaufauga mo lagonaga sē ‵lei?
Faitau te Isaia 41:10, 13, ko sau‵tala ei ki fesili konei:
-
Se a te tautoga a Ieova ne fai ki ana taugasoa katoa?
-
Se a tau faka‵tau, ka fai a Ieova mo taugasoa ‵lei? Kaia?
7. A te fai taugasoa mo Ieova e aofia i ei a fesokotakiga
E gasolo o ‵pili a va fakataugasoa māfai e fesokotaki sāle a tino i ei. Faitau te Salamo 86:6, 11, ko sau‵tala ei ki fesili konei:
-
E fesokotaki atu pefea tatou ki a Ieova?
-
E fesokotaki mai pefea a Ieova ki a tatou?
MEA E FAI MAI NE NISI TINO: “E se mafai o maua se va pili mo te Atua.”
-
Se a te tusi faitau e mafai o fakaaoga ne koe ke fakaasi atu me e mafai o fai taugasoa tatou mo Ieova?
MANATU AOGA
E fia fai taugasoa Ieova ki a koe, kae ka fesoasoani atu ke fakapilipili atu koe ki a ia.
Fesili
-
E fesoasoani atu pefea a Ieova ki ana taugasoa?
-
Kaia e fakatonu atu ei a Ieova ki ana taugasoa ke fai a ‵fuliga?
-
Se a tau faka‵tau, e mata, ko tō ‵mafa a mea e manako a Ieova ke fai ne ana taugasoa? Kaia e fai mai ei koe penā?
NISI FAKAMATALAGA
E aoga pefea ki tou olaga a te fai taugasoa mo te Atua?
“Ieova—Se Atua Telā e Tāua ke Iloa ne Tatou” (Te Faleleoleo Maluga, Fepuali 15, 2003)
Tauloto ki auala e mafai o ati aka se va fakataugasoa mo te Atua.
Onoono ki te auala ne mafaufau se fafine me ne fakasao a ia ne tena va fakataugasoa mo Ieova.
Fakalogologo ki lagonaga ne fakaasi mai ne talavou e uiga ki a Ieova.