Te Tusi Muamua a Petelu 5:1-14

  • Tausi te lafu a te Atua (1-4)

  • Ke loto maulalo kae matapulapula (5-11)

    • Fakaeke ki te Atua a mea katoa e manava‵se koutou ki ei (7)

    • Tiapolo e pelā me se leona fekai (8)

  • Pati fakaoti (12-14)

5  Tela la, e pelā me se taina toeaina, telā ne molimau ki logo‵maega o Keliso, kae kau atu foki ki te ‵malu telā ka fakaasi mai,+ e fai atu ne au te fakatagi* tenei ki toeaina i a koutou:  Tausi faka‵lei te lafu mamoe a te Atua+ tenā e tausi ne koutou, i te tavini atu e pelā me ne ovasia,* e se i te fai fitoi, kae i te loto fiafia i mua o te Atua;+ e se ona ko te fia fai mea i se auala sē tonu,+ kae i te fiafia tonu;  e se i te pule atu e pelā me ne aliki ki luga i a latou kolā ko fai mo tofi o te Atua,+ kae ke fai e pelā me ne fakaakoakoga ‵lei ki te lafu mamoe.+  Kae kafai ko oti ne fakaasi mai te tausi mamoe pule,+ ka maua ne koutou te foualiki ‵malu telā e se mafai o mago.+  E penā foki koutou e tamataene, faka‵logo ki toeaina ma‵tua.*+ Kae ke fakapei ki luga i a koutou katoa te loto maulalo i otou faifaiga te suā tino ki te suā tino, me i te Atua e ‵teke ki tino fakamaua‵luga, kae e tuku atu ne ia te alofa tauanoa ki tino loto mau‵lalo.+  Tela la, ke loto mau‵lalo koutou mai lalo i lima ma‵losi o te Atua, ko te mea ke fakamaluga aka ne ia koutou i te taimi tonu,+  i te taimi e ‵pei atu ei ne koutou otou manava‵sega katoa ki luga i a ia,+ me e atafai a ia ki a koutou.+  Ke ‵poto kae matapula‵pula koutou!+ A te otou fili ko te Tiapolo e livaliva sāle e pelā me se leona fekai, o salasala ke folo ne ia se tino.+  Kae ke tumau koutou i te ‵teke atu ki a ia,+ ke ‵mautakitaki i te fakatuanaki, me iloa ne koutou i vaegā logo‵maega konei e pokotia foki i ei otou taina i te lalolagi kātoa.+ 10  Kae kafai ko oti ne logo‵mae koutou i se taimi toetoe, a te Atua o te alofa tauanoa, telā ne kalagagina ne ia koutou ki tena ‵malu se-gata-mai+ i te ‵kau fakatasi mo Keliso, ka fakakatoatoa ne ia otou akoakoga. Ka faka‵mautakitaki ne ia koutou,+ ka fakamalosi ne ia koutou,+ ka tuku ne ia koutou i luga i se fakavae telā e ‵mautakitaki. 11  Ke i luga i a ia te ‵mana ki te se-gata-mai. Amene. 12  Ko tusi atu ne au ki a koutou a nai pati konei e auala i a Suliano,*+ te taina fakamaoni, ko te mea ke fakamalosi atu ki a koutou kae ke tuku atu se molimau fakamaoni me tenei eiloa te alofa tauanoa tonu o te Atua. Ke tumau la koutou i ei. 13  Ko ‵moli atu a alofaaga o te fafine telā e nofo i Papelonia, se tino filifilia foki penā mo koutou, e pelā foki mo Maleko,+ taku tama. 14  Fakatalofa atu te suā tino ki te suā tino i te sogi o te alofa. Ke i luga i a koutou katoa kolā e ‵kau fakatasi mo Keliso a te filemu.

Fakamatalaga mai lalo

Io me “fakamalosiga.”
Io me “onoono faka‵lei atu ki ei.”
Io me “ki toeaina.”
E fakaigoa foki ki a Sila.