Kenese 12:1-20

  • Ko tiaki ne Apelamo a Halana o fano ki Kanana (1-9)

    • Ko tauto te Atua ki a Apelamo (7)

  • Apelamo mo Salai i Aikupito (10-20)

12  Kae ne fai atu a Ieova ki a Apelamo: “Tiaki tou fenua kae fano kea‵tea mai i ou kāiga mo kāiga o tou tamana ki te fenua telā ka fakaasi atu ne au ki a koe.+  Ka fai ne au koe mo fai se fenua takutakua, kae ka fakamanuia ne au a koe, kae ka fai ne au ke takutakua tou igoa, kae ka fai koe mo fai se fakamanuiaga ki tino katoa.+  Ka fakamanuia ne au a latou kolā e fakamanuia atu ki a koe, kae ka fakamalaia ne au a te tino telā e fakamalaia atu ki a koe,+ kae ko kāiga katoa o te lalolagi ka fakamanuiagina* e auala i a koe.”+  Ne fano a Apelamo e pelā eiloa mo te mea ne fai atu ne Ieova ki a ia, kae ne fanatu a Lota i a ia. Ko 75 tausaga o Apelamo i te taimi ne tiaki ei ne ia a Halana.+  Ne puke ne Apelamo tena avaga ko Salai+ mo Lota te tama a tena taina+ mo koloa katoa ne maua ne latou+ mo tino ne maua ne latou i Halana, kae ne faima‵laga atu latou ki te fenua ko Kanana. I te lotou okoga ki te fenua ko Kanana,+  ne fanatu a Apelamo i loto i te fenua kae oko atu ki te kogā koga ko Sekema,+ i tafa o lakau ‵lasi o Mole.+ I te taimi tenā, ne ‵nofo atu a tino Kanana i te fenua.  Tenā ne fakasae atu ei a Ieova ki a Apelamo kae fai atu: “Ka tuku atu ne au a te fenua+ tenei ki tau tama.”*+ Tenā ne faite ei ne ia i konā se fatafaitaulaga ki a Ieova, telā ne fakasae atu ki a ia.  Fakamuli ifo, ne fanatu a ia mai konā ki te koga maugā i te feitu ki saegala o Peteli+ kae fakatu tena faleie i konā, ko Peteli i te feitu ki togala kae ko Ai+ i te feitu ki saegala. Ne faite ne ia i konā se fatafaitaulaga ki a Ieova+ kae kamata o kalaga atu ki te igoa o Ieova.+  Mai tua ifo, ne tuku ifo ne Apelamo ana faleie, kae faimalaga atu o fano ki te Nekepi,*+ ne fakaga‵sue ana faleie mai te koga e tasi ki te suā koga. 10  Ne poko te oge i te fenua, kae ne fanaifo a Apelamo ki Aikupito o nofo i ei mō se vaitaimi,*+ me ko oko loa i te masei o te oge.+ 11  I te taimi ko pili atu ei a ia ki Aikupito, ne fai atu tou tagata ki tena avaga ko Salai: “Fakamolemole fakalogo mai! E iloa ne au i a koe se fafine taulekaleka.+ 12  Tela la, kafai e lavea ne tino Aikupito a koe, ka fai aka latou, ‘Tenei eiloa tena avaga.’ Tenā ko tamate ei ne latou au kae tuku koe ke ola. 13  Fakamolemole, fai atu ki a latou i a koe ko toku tuagane, ko te mea ke seai se mea e tupu ki a au ona ko koe, ko se tamate ei ne latou au.”+ 14  I te taimi eiloa ne oko atu ei a Apelamo ki Aikupito, ne lavea ne tino Aikupito a te taulekaleka o tou fafine. 15  Ne lavea foki ne pelenise a te Falao a tou fafine, kae kamata o tavae atu ne latou a ia ki te Falao, tenā ne avatu ei tou fafine ki te fale o te Falao. 16  Ne fai faka‵lei ne ia a Apelamo ona ko tou fafine, kae tuku atu ne ia a mamoe, pulumakau, asini tāgata mo asini fāfine, tavini tāgata mo tavini fāfine mo kamela.+ 17  Tenā ne ‵ta ei ne Ieova a te Falao mo tena kaukāiga ki mala fakama‵taku ona ko Salai, te avaga a Apelamo.+ 18  Kae ne ‵kami mai ne te Falao a Apelamo kae fai atu: “Se a te mea tenei ko fai ne koe ki a au? Kaia ne seki fai mai ei koe i a ia ko tau avaga? 19  Kaia ne fai mai ei koe, ‘A ia ko toku tuagane,’+ me toeitiiti kae puke ne au mo fai taku avaga? Tenei tau avaga. Puke tau avaga kae fano!” 20  Ne fakatonu atu a te Falao ki ana tāgata e uiga ki tou tagata, kae uga ne latou a ia kea‵tea fakatasi mo tena avaga mo ana mea katoa.+

Fakamatalaga mai lalo

Io me “ka maua ne latou se fakamanuiaga.”
Epelu, “fanau.”
Io me “ko saute,” telā ko te feitu ki saute o te Fenua o te Folafolaga.
Io me “nofo i ei e pelā me se tino fakaa‵tea.”