Salamo 94:1-23

  • Se ‵talo mō te taui ma sui a te Atua

    • “Ka pefea te leva o tino amio ma‵sei?” (3)

    • A fakatonutonuga a Ioa e aumai ei te fiafia (12)

    • A te Atua ka se tuku tiaki ne ia ana tino (14)

    • ‘E fakamāfua ne ia a fakalavelave i te igoa o te tulafono’ (20)

94  Te Atua o te taui ma sui, ko Ieova,+Te Atua o te taui ma sui, ke maina mai!   Tu ki luga, e te Famasino o te lalolagi.+ Toe taui atu ki tino fakamaua‵luga a te mea e ‵tau o maua ne latou.+   Ka pefea te leva o tino amio ma‵sei, e Ieova,Ka pefea te leva e fia‵fia ei a tino amio ma‵sei?+   E fai‵pati valevale fua latou mo te fakamata‵mata;A tino fai mea ‵se katoa e fai‵pati fia sili e uiga ki a latou eiloa.   E tuki pala ne latou ou tino, e Ieova,+Kae fakasaua atu ou tino.   E tamate ne latou a te fafine ko mate tena avaga mo te tino fakaa‵tea,Kae tamate ne latou a tama‵liki e seai ne olotou tamana.   Olotou muna: “E se lavea ne Ioa;+A te Atua o Iakopo e se fia saga atu ki ei.”+   Ke malamalama i te mea tenei, e te tino sē mafaufau;Koutou e tino va‵lea, ko te taimi fea ka fakaasi atu ei ne koutou te ‵loto o te malamalama?+   A te Atua telā ne faite ne ia te taliga, e a, e se lagona ne ia? A te Atua telā ne faite ne ia te mata, e a, e se lavea ne ia?+ 10  A te Atua telā e fakatonutonu ne ia a atufenua, e a, e se mafai ne ia o fai a polopolokiga ‵mafa?+ A ia ko te Atua telā e tuku mai ne ia te iloaga ki tino!+ 11  E iloa ne Ieova a mafaufauga o tāgata,Me i a latou se mānavaga fua.+ 12  E fiafia te tagata e fakatonutonu ne koe, e Ioa,+Telā e akoako ne koe ki tau tulafono,+ 13  Ke tuku atu ki ei a te tulaga filemu i aso o te puapuaga,Ke oko ki te taimi e keli ei se lua mō tino amio ma‵sei.+ 14  Me i a Ieova ka se tuku tiaki ne ia ana tino,+Io me tiaki ne ia tena tofi.+ 15  Me ka toe fai a fakamasinoga i te amiotonu,Kae ko tino fai mea tonu i te loto ka tau‵tali i ei. 16  Ko oi ka tu mō au o ‵teke a tino amio ma‵sei? Ko oi ka tu mō au o ‵teke a tino fai mea ‵se? 17  Moi fai ne seki fesoasoani mai a Ieova ki a au,Penei ko pili fua au o galo atu.+ 18  Kafai e fai aka au: “A toku vae ko ‵mole,” A tou alofa fakamaoni, e Ieova, e ‵lago mai faeloa ki a au.+ 19  Kafai ko uke a mea e manavase au ki ei,E fakamafanafana kae fakafiafia ne koe au.+ 20  E mata, e mafai o ‵kau fakatasi mo koe se nofogaaliki* o te faitogafitiMāfai e fakaaoga te tulafono ke fakamāfua mai i ei a fakalavelave?+ 21  E fai ne latou a taua fakasaua ki te tino amiotonu+Kae fakasala a te tino e seai sena ‵se ki te mate.+ 22  Kae ko Ieova ka fai mo fai toku lafiga tokagamalie,A toku Atua ko toku kaupapa e faka‵lafi au ki ei.+ 23  Ka fai ne ia olotou faifaiga ma‵sei ke ‵foki eiloa ki a latou.+ Ka fakaseai ne ia latou e auala i olotou amioga matagā. A Ieova te ‵tou Atua ka fakaseai ne ia latou.+

Fakamatalaga mai lalo

Io me “pule; famasino.”