Galuega a Apositolo 10:1-48

  • Te fakaasiga a Konelio (1-8)

  • Te fakaasiga a Petelu e uiga ki manu ko oti ne faka‵ma (9-16)

  • Ko āsi atu Petelu ki a Konelio (17-33)

  • Ko folafola atu ne Petelu te tala ‵lei ki Fenua Fakaa‵tea (34-43)

    • “Te Atua e se fakailoga tino” (34, 35)

  • Ko maua ne Fenua Fakaa‵tea te agaga tapu kae papatiso (44-48)

10  E isi se tagata e nofo i Kaisaleia e igoa ki a Konelio, se ofisa o te kautau, telā e taku ko te kautau a Italia.  A ia se tagata lotu telā e mataku ki te Atua e pelā foki mo tena kāiga kātoa, kae ne avatu ne ia ki tino a meaalofa e uke kae ‵talo faeloa ki te Atua.  Kāti ko te iva o itula+ o te aso,* ne lavea faka‵lei ne ia i se fakaasiga se agelu a te Atua e fanatu ki a ia kae fai atu: “Konelio!”  Ne kilo ‵tonu atu a Konelio ki a ia mo te mataku, kae fesili atu: “Te Aliki, se a te mea e manako koe ki ei?” Ana muna ki a ia: “Ko oti ne oko aka au ‵talo mo au meaalofa ki mua o te Atua e pelā me se fakamasauaga.+  Tela la, uga atu nei ne tino ki Iopa o puke mai se tagata e igoa ki a Simona telā e fakaigoa foki ki a Petelu.  A te tagata tenei se mālō a Simona, se tagata faite mea ki pa‵kili o manu, kae ko tena fale e pili ki te tai.”  I te taimi eiloa ne fano kea‵tea ei te agelu telā ne faipati atu ki a ia, ne kalaga atu a ia ki ana tavini e tokolua mo se sotia e tokotasi, se tagata lotu, mai i ana tino fesoasoani,  kae ne fakaasi atu ne ia a mea katoa ki a latou kae uga atu ke olo ki Iopa.  I te suā aso, kae koi ma‵laga atu latou kae ko pili atu ki te fakai, ne fanaka a Petelu ki te tuafale kāti i te ono o itula,* o ‵talo i ei. 10  Kae ne fiakai malosi a ia. I te taimi koi fakatoka ei ne latou a meakai, ne oko atu ki a ia se fakaasiga+ 11  kae ne lavea ne ia te lagi e matala mo se mea e fanaifo mai te lagi e pelā me se laugatu lino lasi e tukutuku ifo i ana feitu e fa ki te lalolagi; 12  kae i loto i ei ko vaegā manu kese‵kese, ko manu vae fa mo manu ‵tolo o te laukele mo manu eva o te lagi. 13  Tenā ne oko atu ei se leo ki a ia: “Petelu, tu ki luga, ‵ta kae kai!” 14  Kae ne fai atu a Petelu: “Ikai, e te Aliki, me i a au e seki kai aka eiloa ki se mea lailai kae e se ‵ma penā.”+ 15  Ne toe faipati atu a te leo ki a ia, i te lua o taimi: “Sa toe taku ne koe me e lai‵lai a mea kolā ko oti ne faka‵ma ne te Atua.” 16  Ne toe lagona ne ia a te leo tenā i te tolu o taimi, ko te mea eiloa ko avaka a te mea tenā ki te lagi. 17  Kae koi ‵numi te mafaufau o Petelu e uiga ki te fakaasiga ne lavea ne ia, i konā eiloa ne fesili atu a tāgata kolā ne uga mai ne Konelio me tefea te fale o Simona kae ne ‵tu atu latou i te mataloa o te ‵pui o te fale.+ 18  Ne ka‵laga atu latou kae fesili atu me ko Simona telā e fakaigoa foki ki a Petelu e nofo i konā. 19  Kae koi mafaufau a Petelu e uiga ki te fakaasiga kae fai atu te agaga tapu+ ki a ia: “Kiloke! E tokotolu a tāgata kolā e ‵sala mai ki a koe. 20  Tela la, tu ki luga, fano ki lalo kae olo mo latou, ke mo a eiloa koe e fakalotolotolua, me ne uga mai ne au a latou.” 21  Tenā ne fanaifo ei a Petelu ki tāgata konei kae fai atu: “Tenei au, te tino e ‵sala koutou ki ei. Kaia ne o‵mai ei koutou ki konei?” 22  Olotou muna: “A Konelio,+ se ofisa o te kautau, se tagata amiotonu kae mataku ki te Atua kae e taku ‵lei foki ne tino Iutaia katoa, ne tuku atu ki a ia te fakatonuga a te Atua e auala i se agelu tapu ke uga mai se fekau ke fanatu koe ki tena fale ko te mea ke fakalogologo a ia ki au pati kolā ka fai atu.” 23  Ne ‵kami ne ia a latou ki loto kae talimalo atu ki a latou. I te suā aso ne tu a ia ki luga, olo ei mo latou, kae ne tau‵tali atu i a ia a nisi taina kolā ne ‵nofo i Iopa. 24  I te aso mai tua ifo, ne oko atu a ia ki Kaisaleia. Ne fakatalitali eiloa a Konelio ki a latou kae ko oti ne fakamaopoopo mai ne ia ana kāiga mo ana taugasoa ‵pili. 25  I te uluatuga a Petelu ne fakafetaui atu a Konelio ki a ia, kae fakasiga ifo ki ana vae o ifo atu ki a ia. 26  Kae ne fakatu aka a ia ne Petelu, kae fai atu: “Tu ki luga, au foki se tagata fua.”+ 27  Kae koi sau‵tala lāua ne ulu a ia ki loto kae ne maua atu ne ia a tino e tokouke e maopoopo mai i ei. 28  Ne fai atu a ia ki a latou: “E iloa ‵lei ne koutou me e tapu i te tulafono ke ‵kau fakatasi io me fakapilipili atu se tino Iutaia ki se tino mai se isi fenua,+ kae ko oti ne fakaasi mai ne te Atua ke se toe taku ne au se tino me e lailai io me e se ‵ma.+ 29  Tenā te pogai ne loto fiafia ei au o vau i te taimi ne uga atu ei te fekau ki a au. Tela la, au e fesili atu ki a koutou me kaia ne fai atu ei koutou ke vau au.” 30  Tenā ne fai atu ei a Konelio: “I te fa o aso ko ‵teka i te itula eiloa tenei, ko te iva o itula,* ne ‵talo au i toku fale kae ne tu mai i oku mua se tagata e malapu‵lapu ana gatu, 31  kae ne fai mai: ‘Konelio, ko oti ne lagona kae talia tau ‵talo kae e masaua ne te Atua au meaalofa. 32  Tela la, uga atu se fekau ki Iopa kae ‵kami mai a Simona telā e fakaigoa foki ki a Petelu. A te tagata tenei se mālō i te fale o Simona, te tino faite mea ki pa‵kili o manu, kae e nofo pili ki te tai.+ 33  Tenā ne uga fakavave atu ei taku fekau ki a koe, kae e ‵lei i a koe ne vau eiloa. Tela la, i te taimi tenei ko maopoopo atu matou katoa i mua o te Atua ke fakalogo‵logo ki mea katoa kolā ne fakatonu atu ne Ieova* ke fai mai ne koe.” 34  Ne kamata a Petelu o faipati atu, ana muna: “Nei la, ko malamalama faka‵lei au i te Atua e se fakailoga tino,+ 35  kae ko te tino mai so se fenua telā e mataku ki a ia kae fai mea tonu e talia eiloa ne ia.+ 36  Ne fai atu tena muna ki tino Isalaelu ke folafola atu ki a latou te tala ‵lei o te filemu+ e auala i a Iesu Keliso​—a ia tenei ko te Aliki o tino katoa.+ 37  E iloa ne koutou a te mataupu ne sau‵tala faeloa ki ei i Iuta kātoa, telā ne kamata i Kalilaia+ mai tua o te papatisoga ne talai atu ne Ioane: 38  e uiga ki a Iesu mai Nasaleta, te auala ne fakaeke ei a ia ne te Atua ki te agaga tapu+ mo te ‵mana, kae ne fano a ia i loto i te fenua kātoa o fai a mea ‵lei kae faka‵lei a tino katoa kolā ne fakapuapuaga ne te Tiapolo,+ ona ko te Atua ne fakatasi atu ki a ia.+ 39  Kae ko molimau matou ki mea katoa kolā ne fai ne ia i te fenua o tino Iutaia mo Ielusalema; kae ne tamate ne latou a ia i luga i te pou.* 40  Ne toe fakatu aka a ia tenei ne te Atua i te tolu o aso+ kae talia ne ia ke fakaasi* atu a ia, 41  e se ki tino katoa, kae ki molimau kolā ko leva ne filifili ne te Atua, e pelā foki mo matou, kolā ne ‵kai kae inu fakatasi mo ia mai tua o tena toe fakatuakaga mai te mate.+ 42  Ne fakatonu mai foki a ia ki a matou ke talai atu ki tino kae ke tuku atu se molimau+ maea me tenei te tino ne ‵tofi ne te Atua ke fai mo famasino o tino ola mo tino ‵mate.+ 43  Ne molimau mai a pelofeta katoa ki a ia,+ me ko so se tino e fakatuanaki ki a ia ka fakamagalo ana agasala e auala i tena igoa.”+ 44  Kae koi faipati a Petelu e uiga ki mea konei, ne oko ifo te agaga tapu ki a latou katoa kolā ne fakalogo‵logo ki te muna.+ 45  Kae ko tino tali‵tonu kolā ko oti ne pilitome* kae ne olo atu mo Petelu ne ofo, me ko ‵ligi atu foki a te meaalofa faivasaga ko te agaga tapu ki luga i tino o fenua fakaa‵tea. 46  Me ne lagona ne latou me ko fai‵pati latou ki ‵gana kese‵kese kae tavae atu ki te Atua.+ Tenā ne fai atu ei a Petelu: 47  “E a, e isi se tino e mafai ne ia o taofi a latou konei ke mo a ma papatiso+ ki te vai, ko latou kolā ko oti ne maua ne latou te agaga tapu e penei eiloa mo tatou?” 48  Tenā ne fakatonu atu ei a ia ke papatiso latou i te igoa o Iesu Keliso.+ Oti aka, fakamolemole atu ei latou ke nofo mai a ia i nai aso.

Fakamatalaga mai lalo

Telā kāti ko te 3:00 i te fakaafiafi.
Telā kāti ko te 12:00 i te tutonu.
Telā kāti ko te 3:00 i te fakaafiafi.
Onoono ki te MF A5.
Io me “lakau.”
Io me “lavea.”
Io me “tino fakamaoni.”