E ‵Fuli Ne Te Tusi Tapu A Olaga O Tino

SE A te mea ne fakamalosi atu ki se tagata ke toe foki ki te lotu telā ne puti aka ei a ia kae ne takasese atu keatea mai i ei? Ne maua pefea ne se tamataene a te alofa fakatamana telā ne manako malosi a ia ki ei i tena olaga kātoa? Faitau ki fakamatalaga a tino konei.

“Ne ‵tau o toe foki au ki a Ieova.”—ELIE KHALIL

TAUSAGA NE FANAU I EI: 1976

TENA FENUA: KUPELU

TENA TALA FAKASOLOPITO: SE TAMA FAKAMĀUMĀU MEA

TOKU OLAGA MUA: Ne fanau au i Kupelu kae ne puti aka i Ausetalia. A oku matua ne Molimau a Ieova, kae ne fai ne lāua te ‵toe mea e mafai o fai ke ati aka toku alofa ki a Ieova mo tena Muna, ko te Tusi Tapu. Kae i tausaga o toku olaga tamaliki talavou, ne kamata o ‵teke atu au. Ne tele ‵muni atu au i po ki oku nisi taugasoa tamaliki talavou. Ne kaisoa ne matou a motoka kae iku atu ki fakalavelave e uke.

Muamua la, ne fai ‵muni ne au a mea konā ona ko toku manavase i te mea ma fakafanoanoa atu ki oku matua. Kae ne galo malielie atu eiloa toku manavase tenā. Ne fai taugasoa au ki tino kolā ne ma‵tua fakafia atu i a au kae e se a‵lofa ki a Ieova, kae ne ma‵sei ‵ki olotou fakamalosiga ki a au. Fakamuli loa, ne fai atu au ki oku mātua me ko se toe fia aofia au i te lā talitonuga. Ne taumafai eiloa lāua mo te kufaki o fesoasoani mai, kae ne ‵teke atu au ki lā taumafaiga katoa. Ne logo‵mae malosi oku mātua i ei.

I te taimi ne fanatu keatea au mai te fale, ne kamata o tofotofo au ki vailakau tapu, ke oko ki te ‵tokiga mo te ‵togiatuga o aofaki ‵lasi o maluana. Ne ola au i se olaga fai valevale kae fakamāumāu a taimi e uke ki te pa‵tī i fale tuisi. Ne ati aka foki ne au se uiga ita vave. Kafai ne taku mai io me ne fai mai ne se tino se mea e se fiafia au ki ei, e fanaka toku kaitaua, kae pakalaga sāle atu kae tā ne au a tino. A te ‵tonuga loa, ne fai ne au a mea katoa kolā ne akoako mai ke se fai e pelā me se Kelisiano.

TE AUALA NE ‵FULI EI TOKU OLAGA NE TE TUSI TAPU: Ne pili ‵ki toku va taugasoa mo se tino aveave ‵funa a vailakapu, telā ne galo atu tena tamana kae koi foliki a ia. E masani o sau‵tala māua ke oko ki te valuapo. I nisi po konā, ne fakaasi mai ana lagonaga e uiga ki te misi malosi ne ia o tena tamana. Ona ko te mea ne tupu aka au mo te iloaga e uiga ki te fakamoemoega o te toetuga, ne kamata o faipati atu au ki tou tagata e uiga ki a Iesu—me ne faka‵tu aka ne ia a tino ‵mate kae tauto mai me ka fai ne ia te mea tenā i aso mai mua nei. (Ioane 5:28, 29) “Mafaufau la māfai e toe fetaui koe mo tou tamana,” ne fai atu au. “E mafai ne tatou katoa o ola ki te se-gata-mai i te Palataiso i te lalolagi nei.” Ne otia te loto o toku taugasoa i manatu konā.

I nisi taimi, ne faka‵sae aka ne toku taugasoa a mataupu e uiga ki aso fakaoti io me ko te akoakoga ko te Tolutasi. Ne fakaaoga ne au tena Tusi Tapu kae fakaasi atu a tusi fai‵tau kese‵kese kolā e fakaasi mai i ei te munatonu e uiga ki a Ieova te Atua, Iesu, mo aso fakaoti. (Ioane 14:28; 2 Timoteo 3:1-5) Ko te momea aka o toku faipati e uiga ki a Ieova ki toku taugasoa, ko te momea aka foki o toku mafaufau ki a Ieova.

Ne kamata malielie o ola aka a fuaga o muna‵tonu i te Tusi Tapu kolā ko ‵mate i toku loto—ko fuaga kolā ne taumafai malosi oku mātua ke ‵toki. E pelā mo nisi taimi ne kau atu au ki se pa‵tī kae fakaaoga a vailakau tapu, ne kamata o mafaufau fakavave au ki a Ieova. Ne fai mai oku taugasoa e tokouke me e a‵lofa latou ki te Atua, kae e se fetaui olotou pati konā mo olotou amioga. Ona ko toku sē fia fai penā, ne iloa aka ne au a te mea e ‵tau o fai. Ne ‵tau o toe foki au ki a Ieova.

E tonu, a te iloa atu o te mea e ‵tau o fai mo te faiga o te mea tenā ne mea e lua kolā e ‵kese ‵ki. Ne faigofie o fai a nisi ‵fuliga; ne fakagata ne au te fakaaogaga o vailakau tapu e aunoa mo se fakalavelave. Ne fulitua atu au ki oku taugasoa mua, kae kamata o sukesuke ki te Tusi Tapu mo se toeaina Kelisiano.

Ko oko eiloa i te faigata a nisi ‵fuliga. Kae maise ko te pule faka‵lei atu ki toku kaitaua. I nisi taimi ne manuia au kae i nisi taimi ko takavale au i ei. Ne ma‵sei sāle oku lagonaga ona ko toku mafaufau me ko seai se aoga aku taumafaiga. Ona ko te loto vāivāi, ne fanatu au ki te toeaina ne fai ne ia taku akoga. Ona ko tena kufaki mo te atafai, ne fai eiloa a ia mo fai se fakamalosiga tonu ki a au. I te taimi e tasi, ne tuku mai ne ia se mataupu i Te Faleleoleo Maluga e uiga ki te tāua ke se ‵fiu vave. * Ne sau‵tala māua ki nisi mea e mafai ne au o fai māfai ko kamata o kaitaua. Ona ko te mataupu tenā mo ‵talo e uke ki a Ieova, ne mafai ne au o pule malielie atu ki toku kaitaua. Fakamuli loa, i a Apelila 2000, ne papatiso au e pelā me se Molimau a Ieova. Kae ne fia‵fia malosi eiloa oku mātua i ei.

TE AUALA NE MAUA EI NE AU A MEA AOGA: Ko maua nei ne au se loto lagona filemu kae ‵ma, me ko se toe fakalailai ne au toku foitino ki vailakau tapu io me ko amioga fai valevale. Faitalia me ne a aku mea e fai, me e galue, kau atu ki se fakatasiga Kelisiano, io me tafao malie aka, ko fiafia atu nei au. Ko maua ne au se kilokiloga ‵lei ki te olaga.

E fakafetai au ki a Ieova mō oku matua kolā ne seki puli lele i a laua a au. E mafaufau foki au ki pati a Iesu i te Ioane 6:44: “E seai se tino e mafai o vau ki a au seiloga ke talia a ia ne te Tamana.” E otia malosi toku loto ke mafaufau me ne mafai o toe foki atu au ki a Ieova me ne toe ‵futi mai ne ia a au ki a ia.

“Ne manako malosi au ki se tamana.”—MARCO ANTONIO ALVAREZ SOTO

TAUSAGA NE FANAU I EI: 1977

TENA FENUA: CHILE

TENA TALA FAKASOLOPITO: SE TINO I TE POTUKAU USUUSU PESE FAKASAUA

TOKU OLAGA MUA: Ne puti aka au ne toku mātua i Punta Arenas, se fa‵kai gali i te Strait of Magellan kae pili ki te mata i te feitu ki saute o Amelika ki Saute. Ne ma‵vae oku mātua kae ko lima fua oku taugasoa, telā ne maua ne au a lagonaga fakaa‵lofa. Ne manako malosi au ki se tamana.

Ne sukesuke toku mātua ki te Tusi Tapu mo Molimau a Ieova, kae ne ave sāle ne ia au ki fakatasiga i te Fale Tapuaki. Kae ne seki fia fano sāle au ki fakatasiga, telā ne masani o tagi pakalaga sāle au i te auala ki ei. I te taimi ko 13 ei oku tausaga, ne fakagata katoatoa ne au toku kau atu ki ei.

I te taimi tenā, ne fiafia sāle au ki pese, kae ne iloa aka ei ne au toku atamai i ei. I te kātoaga o toku 15, ne kamata o usuusu atu ne au a pese fakasaua i ‵kaiga fia‵fia, koga inu meainu ma‵losi, mo nisi maopoopoga. A te ‵kau fakatasi mo tino ata‵mai i pese ne fakamalosi aka ei toku fiafia ki vaegā pese. Ne kamata o tauloto au ki pese i se akoga i te motou fa‵kai. I te taimi ko 20 ei oku tausaga, ne fanatu au ki te laumua, ko Santiago, ke faka‵soko atu i ei aku akoga. Ne tumau loa toku aofia i se potukau usuusu pese fakasaua.

Kae ne maua eiloa ne au i te taimi kātoa tenei a lagonaga sē aoga. I te taumafai ke fakafeoloolo aka a lagonaga konā, ne inu malosi sāle au ke konā kae fakaaoga vailakau tapu mo oku taugasoa usuusu, kolā ne fai mo fai toku kāiga. Ne maua ne au se uiga ‵teke, telā ne lavea faka‵lei atu i oku foliga. Ne pei sāle au ki gatu lanu ‵uli, faka‵loa toku talafa, kae faka‵loa foki oku laulu toeitiiti ko oko ifo ki oku tega.

I nisi taimi, ne aofia au i fusuga kae fakasala i te tulafono ona ko toku uiga tenā. I te taimi e tasi ne konā ei au, ne fai taua atu au ki tāgata aveave ‵funa vailakau tapu mō te fakalavelave mai ki a au mo oku taugasoa. Ne logo‵fio eiloa au ne ta ne tāgata konei, telā ne ‵fati ei oku kauvae.

Kae ko te ‵toe mea fakalogo‵mae, ne māfua mai eiloa i oku taugasoa ‵pili. I te aso e tasi, ne iloa aka ne au me ne fia‵fai taku famau mo toku taugasoa pele i te fia o tausaga, kae ne ‵funa ne oku taugasoa katoa a te mea tenā mai i a au. Ne logo‵mae malosi au i ei.

Ne toe foki atu au ki Punta Arenas, ne kamata o akoako atu ne au a pese kae galue pelā me se tino tātā pese. Ne tumau foki toku usuusu kae fai ne au a ‵kopi o pese i se potukau usuusu pese fakasaua. Ne fetaui au mo se tamafine matagali ko Sussan, kae ne kamata o ‵nofo tasi māua. Fakamuli ifo, ne iloa aka ne Sussan me ne talitonu tena mātua ki te Tolutasi kae ne seki talitonu au ki ei. Tela la, ne fesili mai tou fafine, “Se a la te mea tonu?” Ne tali atu au me ne iloa ne au i te Tolutasi se akoakoga ‵se kae ne seki mafai ne au o fakamaoni atu mai te Tusi Tapu. Kae ne iloa ne au a tino e mafai o fesoasoani mai. Ne fai atu au me e mafai o fakaasi atu ne Molimau a Ieova a te munatonu mai te Tusi Tapu. Tenā ne fai ei ne au se mea telā ne seki fai aka loa ne au mō se fia o tausaga—ne ‵talo atu au ki te Atua kae akai atu mō tena fesoasoani.

I nai aso mai tua ifo, ne lavea ne au se tagata pelā me e iloa ne au, kae fesili atu au me ko ia se Molimau a Ieova. E tiga eiloa ne foliga polepole a ia ona ko oku foliga, ne tali mai eiloa ne ia mo te atafai aku fesili e uiga ki fakatasiga i te Fale Tapuaki. Ne talitonu au me tenei eiloa te tali ki taku ‵talo. Ne fanatu au ki te Fale Tapuaki kae sagasaga i nofoga ki tua ko te mea ke se matea au ne se tino. Kae ne kamata o masaua au ne tino e tokouke mai i aso ne fanatu sāle ei au kae koi foliki. Ne talimālō kae ‵sai mai latou mo te a‵lofa telā ne maua ne au se matugā lagonaga filemu. E pelā loa me ko toe foki mai au ki toku kāiga. I te taimi ne fetaui māua mo te tagata ne fai ne ia taku akoga i te Tusi Tapu i taku folikiga, ne fakamolemole atu au ke toe fai ne ia taku akoga.

TE AUALA NE ‵FULI EI TOKU OLAGA NE TE TUSI TAPU: I te aso e tasi, ne faitau au ki te Faataoto 27:11, telā e fai mai: “Ke poto koe, e taku tama, kae fai toku loto ke fiafia.” Ne ofo au i te mafaufau atu me e mafai ne se tino fatauva o fai ke fiafia a te loto o te Mafuaga o te iunivesi. Ne fatoa iloa aka ne au me i a Ieova ko te vaegā Tamana telā ne ‵sala au ki ei i toku olaga kātoa!

Ne manako au o fakafiafia toku Tamana faka-te-lagi kae fai tena loto, kae ko oti ne fai au mo pologa i te fia o tausaga ki vailakau tapu mo meainu ma‵losi. Ne malamalama au i te akoakoga a Iesu i te Mataio 6:24, telā e fai mai me “e seai se tino e mafai o tavini ki matai e tokolua.” I te taimi koi faigata ei ke fai ne au a ‵fuliga, ne pokotia au i te akoakoga fakavae i te 1 Kolinito 15:33: “A taugasoa ma‵sei e fakama‵sei ne latou a amioga ‵lei.” Ne iloa aka ne au me e se mafai o fakagata aku faifaiga ma‵sei māfai e tumau toku fano sāle ki koga mo taugasoa mua. Ne manino ‵lei a pati fakatonutonu i te Tusi Tapu: Ne ‵tau o fai ne au a ‵fuliga ‵lasi ke ‵vae keatea mai i mea kolā e fakavāivāi mai ki a au.—Mataio 5:30.

Ona ko toku fiafia malosi ki pese, ne fai ei mo fai te ‵toe mea faigata ke fakagata toku usuusu mo te fakalogologo ki pese fakasaua. Kae mai te fesoasoani o oku taugasoa i te fakapotopotoga, ne mafai ei o saoloto fakamuli au mai i ei. Ne fakagata toku inu malosi mo te fakaaogaga o vailakau tapu. Ne ‵kati oku laulu, kae ‵vele toku talafa, kae fakagata toku pei fua ki gatu ‵lanu uli. I te taimi ne fai atu au ki a Sussan me ko manako au o ‵kati oku laulu, ne momea aka eiloa tena fia logo. Ana muna, “Ka fanatu au i a koe ke lavea atu a mea e fai i te Fale Tapuaki!” Ne fiafia malosi tou fafine ki ana mea ne lavea, kae e seki leva kae fai foki tena akoga faka-te-Tusi Tapu. Ne avaga fakamuli māua mo Sussan. I te 2008, ne papatiso maua e pelā me ne Molimau a Ieova. Ne fia‵fia māua ke toe ‵kau fakatasi mo toku mātua i te tavini atu ki a Ieova.

TE AUALA NE MAUA EI NE AU A MEA AOGA: Ko oti ne sao au mai i se lalolagi telā e maua i ei a te fiafia fakaloiloi mo taugasoa amio ‵pelo. Koi fiafia au ki pese, kae ko filifili faka‵lei nei aku pese. Ko fakaaoga ne au toku atamai ke aoga ki toku kāiga mo nisi tino, kae maise eiloa a talavou. E manako au ke fesoasoani atu ke iloa ne latou me i te ukega o mea e tuku mai ne te lalolagi e foliga ‵gali, kae ka oti aka ne “kaiga [fua] ko oko eiloa i te uke.”—Filipi 3:8.

Ko maua ne au a taugasoa fakamaoni i te fakapotopotoga Kelisiano, telā e lasi a te alofa mo te filemu i ei. E sili atu i ei, mai te fakapilipili atu ki a Ieova, ne fatoa maua ne au toku Tamana.

[Fakamatalaga fakaopoopo]

[Ata]

“Ne mafai o toe foki atu au ki a Ieova me ne toe ‵futi mai ne ia au ki a ia”