Te Tusi a Ioane 5:1-47

  • Ne faka‵lei se tagata masaki i Petesa (1-18)

  • Ko tuku atu te pulega ki a Iesu ne tena Tamana (19-24)

  • Ka lagona ne tino ‵mate te leo o Iesu (25-30)

  • Molimau ‵tonu e uiga ki a Iesu (31-47)

5  Fakamuli ifo, ne fai se ‵kaiga fiafia+ a tino Iutaia, kae ne fanatu a Iesu ki Ielusalema.  E isi se vai koukou i te Mataloa o Mamoe+ i Ielusalema e taku i te ‵gana Epelu ko Petesa mo koga sa‵sale e lima i ana tafa.  E ta‵kato sāle i konā a tino ma‵saki e tokouke, tino ‵kivi, tino ‵pili mo tino kolā e ‵mate olotou vae mo lima. 4 * ——  Kae ne nofo atu i konā se tagata telā ne masaki i tausaga e 38.  I te laveaga ne Iesu te tagata tenei e takato i konā kae iloa ne ia me ko leva ne masaki a ia, fai atu ei a Iesu ki te tagata tenā: “E manako koe ke ‵lei koe?”+  Ne tali atu te tagata masaki: “Tou ‵malu, e seai se tino e tuku ne ia au ki lalo i te vai i te taimi e ‵lepu ei; kae kafai e fanaifo au kae ko mua atu te suā tino i a au.”  Fai atu ei a Iesu ki a ia: “Tu ki luga! Puke tou papa* kae sasale.”+  Ne ‵lei fakavave te tagata tenā, ne puke tena papa* kae kamata o sasale. A te aso tenā ko te Sapati. 10  Ne fai atu a tino Iutaia ki te tagata telā ne faka‵lei aka: “A te mea tenei ko te Sapati, kae e tapu ma ave ne koe tou papa.”*+ 11  Kae ne tali atu a ia ki a latou: “A te tino telā ne faka‵lei ne ia au ne fai mai ki a au, ‘Puke tou papa* kae sasale.’” 12  Ne fesili atu latou ki a ia: “Ko oi te tino ne fai atu ki a koe, ‘Puke tou papa* kae sasale’?” 13  Kae ne seki iloa ne te tagata telā ne faka‵lei aka a te tino tenā, me ko oti ne fanatu a Iesu i loto i te vaitino kolā ne ‵nofo atu i konā. 14  Mai tua ifo, ne maua ne Iesu a tou tagata i te faletapu kae fai atu ki a ia: “Kiloke, a koe nei ko ‵lei. Sa toe agasala, ko te mea ke se tupu ki a koe se mea telā e masei atu.” 15  Ne fano te tagata tenā kae fakailoa atu ki tino Iutaia me ko Iesu telā ne faka‵lei ne ia a ia. 16  Ona ko te pogai tenei ne fakasaua ei ne tino Iutaia a Iesu, me ne fai ne ia a mea konei i te Sapati. 17  Kae ne tali atu a ia ki a latou: “A toku Tamana e galue faeloa ke oko mai eiloa ki te taimi nei, kae ko au foki e galue faeloa.”+ 18  Tenei te pogai ne kamata ei o ‵sala malosi a tino Iutaia ke tamate a ia, i te mea e se gata fua i te soli ne ia o te Sapati kae ne taku foki ne ia i te Atua ko tena Tamana,+ kae fai foki ke ‵pau lāua mo te Atua.+ 19  Tela la, ne fai atu a Iesu ki a latou: “Au e fai ‵tonu atu ki a koutou, e se mafai ne te Tama o fai se mea i tena loto eiloa, kae ko mea fua kolā e lavea ne ia e fai ne te Tamana.+ Me i so se mea e fai ne te Tamana, e fai foki ne te Tama. 20  Me e alofa te Tamana ki te Tama+ kae e fakaasi atu ki a ia a mea katoa kolā e fai ne ia. Ka fakaasi atu foki ki a ia a galuega e sili fakafia atu i mea konei, ko te mea ke ofo koutou.+ 21  E pelā mo te Tamana e faka‵tu aka ne ia a tino ‵mate kae fakaola ne ia latou,+ e penā foki te Tama e fakaola ne ia so se tino e loto a ia ki ei.+ 22  E seai se tino e fakamasino ne te Tamana, me ko oti ne tuku atu ne ia ki te Tama ke fai katoa ne ia te fakamasinoga,+ 23  ko te mea ke fakaaloalo a tino katoa ki te Tama, e pelā eiloa mo te lotou fakaaloalo ki te Tamana. So se tino e se fakaaloalo ki te Tama e se fakaaloalo foki ki te Tamana telā ne uga mai ne ia a ia.+ 24  Au e fai ‵tonu atu ki a koutou, so se tino e lagona ne ia aku pati kae talitonu ki te Atua telā ne uga mai ne ia au ka maua ne ia te ola se-gata-mai,+ kae ka se fakamasinogina a ia kae ko sao atu a ia mai te mate ki te ola.+ 25  “Au e fai ‵tonu atu ki a koutou, ka oko mai te itula, kae ko oko nei ki ei, ka lagona ei ne tino ‵mate a te leo o te Tama a te Atua kae ko tino kolā e faka‵logo ki ei ka ola. 26  E pelā mo te Tamana e maua ne ia te malosi ke tuku atu te ola,+ ne tuku atu foki ne ia ki te Tama a te malosi ke tuku atu te ola.+ 27  Kae ko oti ne tuku atu ne ia ki a ia te pule ke fai te fakamasinoga,+ me i a ia ko te Tama a te tagata.+ 28  Sa ofo koutou i te mea tenei, me ka oko mai eiloa te itula e lagona ei ne tino katoa kolā e i loto i tanuga* a tena leo+ 29  ko ulu mai ei ki tua. Ko latou kolā ne fai mea ‵lei ka toe‵tu mai ki te ola, kae ko latou kolā ne fai mea ma‵sei ka toe‵tu mai ki te fakamasinoga.+ 30  E se mafai ne au o fai se mea e tasi i toku loto eiloa. Au e fakamasino e ‵tusa mo mea e lagona ne au, kae e amiotonu taku fakamasinoga,+ me e se fai ne au i toku loto eiloa, kae ko te loto o ia telā ne uga mai ne ia au.+ 31  “Kafai e molimau au e uiga ki a au eiloa, e se tonu taku molimau.+ 32  E isi se suā tino telā e molimau e uiga ki a au, kae e iloa ne au me i te molimau telā e tuku mai ne ia e uiga ki a au e tonu.+ 33  Ko oti ne uga atu ne koutou a tāgata ki a Ioane, kae ne molimau a ia e uiga ki te mea tonu.+ 34  Kae e se talia ne au se molimau mai se tagata, kae e fai atu ne au a mea konei ko te mea ke ‵sao koutou. 35  A te tagata tenā se moli telā e ka kae maina, kae ne fia‵fia malosi koutou i se taimi toetoe i tena mainaga.+ 36  E sili atu taku molimau i lō Ioane, me i galuega kolā ne tuku mai ne toku Tamana ke fakataunu ne au, ko galuega kolā e fai nei ne au, e fai pelā me se molimau me ne uga mai au ne te Tamana.+ 37  Kae ko te Tamana telā ne uga mai ne ia au ko oti ne molimau mai e uiga ki a au.+ E seki lagona aka eiloa ne koutou a tena leo i se taimi io me ne lavea ne koutou ana foliga,+ 38  e se nofo foki tena muna i loto i a koutou, me e se tali‵tonu koutou ki te tino telā ne uga mai ne ia. 39  “E suke‵suke koutou ki Tusitusiga Tapu+ me e mafau‵fau koutou me e maua ne koutou i ei a te ola se-gata-mai; kae konei eiloa a mea* ne molimau mai e uiga ki a au.+ 40  Kae e se ma‵nako koutou o ‵mai ki a au+ ke maua ne koutou a te ola. 41  E se talia ne au a tavaega mai tino, 42  kae e iloa ‵lei ne au me e se nofo i loto i a koutou a te alofa o te Atua. 43  Au ne vau i te igoa o toku Tamana, kae e se talia ne koutou au. Moi fai ne vau se isi tino i tena igoa eiloa, penei ko oti ne talia ne koutou te tino tenā. 44  E mafai pefea o tali‵tonu koutou, me e talia ne koutou a tavaega mai nisi tino kae e se ‵sala atu koutou ki tavaega mai i te Atua tonu e tokotasi?+ 45  Sa mafau‵fau me ka ‵moli ne au a koutou ki te Tamana; e isi se tino telā e ‵moli ne ia koutou, ko Mose,+ telā e fakamoe‵moe koutou ki ei. 46  E tonu, moi ne tali‵tonu koutou ki a Mose penei ko tali‵tonu mai foki koutou ki a au, me ne tusi mai te tino tenā e uiga ki a au.+ 47  Kae kafai e se tali‵tonu koutou ki ana tusitusiga, ka tali‵tonu la pefea koutou ki aku pati?”

Fakamatalaga mai lalo

Onoono ki te MF A3.
Io me “moega.”
Io me “moega.”
Io me “moega.”
Io me “moega.”
Io me “moega.”
E fakasino atu a te pati Eleni ki tanuga kolā e fakamasaua ei a tino kolā ko oti ne ‵mate.
Telā ko Tusitusiga Tapu.