Te Tusi a Ioane 6:1-71
6 Mai tua ifo, fanatu ei a Iesu ki te suā feitu o te Vai o Kalilaia, io me ko Tipelia.+
2 Kae ne tau‵tali atu faeloa a te vaitino i a ia,+ me ne lavea ne latou a galuega ‵mana ne fai ne ia i te faka‵leiga o tino ma‵saki.+
3 Ne fanaka a Iesu ki luga i se mauga, kae ne sagasaga a ia i konā fakatasi mo ana soko.
4 Ko pili o oko ki te Paseka,+ te ‵kaiga fia‵fia o tino Iutaia.
5 I te kiloakaga a Iesu kae lavea ne ia te vaitino ko olo atu ki a ia, fai atu ei a ia ki a Filipo: “Tefea te koga ka ‵togi ei ne tatou a falaoa ke ‵kai ei a tino konei?”+
6 Kae ne fai atu fua ne ia a pati konei ke tofotofo aka ei a tou tagata, me ne iloa ne ia te mea telā ka fai ne ia.
7 Ne tali atu a Filipo ki a ia: “E se lava te lua selau tenali* ke ‵togi ki ei a falaoa ke maua ne tino taki tokotasi ne mu mea mai i ei.”
8 Ne fai atu tena soko e tokotasi, ko Anitelea te taina o Simona Petelu, ki a ia:
9 “E isi se tamaliki tagata i konei e lima ana falaoa mo tamā ika e lua. Kae se a te aoga o mea konā ki tino e tokouke konei?”+
10 Ne fai atu a Iesu: “Fai ki tino ke saga‵saga ki lalo.” Ona ko te uke o mouku i te koga tenā ne saga‵saga ifo ei a tino ki lalo, kāti e toko 5,000 te aofaki o tāgata i ei.+
11 Ne puke ne Iesu a falaoa, kae i te otiga ne fai te fakafetai, tufa atu ei ne ia ki tino kolā e saga‵saga i konā; ne fai foki ne ia penā ki tamā ika, kae ne ‵kai latou i ei ke ma‵kona.
12 Kae i te taimi ne ma‵kona ei latou, fai atu ei a ia ki ana soko: “‵Luku mai a toegā meakai, ko te mea ke seai se mea e māumāu.”
13 Tenā ne ‵luku mai ei ne latou kae faka‵fonu a tapola e 12 ki meakai ‵toe a tino kolā ne ‵kai ki falaoa e lima.
14 I te laveaga ne tino a galuega ‵mana ne fai ne ia, fai aka ei olotou pati: “Tenei eiloa te Pelofeta telā ne ‵tau o vau ki te lalolagi.”+
15 I te iloaga ne Iesu me ka o‵mai latou o puke a ia mo fai te lotou tupu, fano+ tokotasi+ ei a ia ki te mauga.
16 I te okoga ki te afiafi, ne olo atu ana soko ki te tai,+
17 ne ‵sopo ki te pōti kae olo atu ki te suā feitu ki Kapanaumi. Ko pouli i te taimi tenei kae e seki oko atu eiloa a Iesu ki a latou.+
18 Ne kamata foki o sou te namo me ko agi malosi te matagi.+
19 I te pūluga o te lotou pōti, kāti ko tolu io me ko fa maila* te ‵mao, kae ne lavea atu ne latou a Iesu e sasale i luga i te tai kae ko pili mai eiloa ki te pōti; kae ne ma‵taku ei latou.
20 Kae ne fai atu a ia ki a latou: “Ko au fua tenei, sa ma‵taku!”+
21 Ne fia‵fia latou o fakasopo a ia ki loto i te pōti, kae ne oko fakavave eiloa te pōti ki te koga telā ne ma‵nako latou o olo ki ei.+
22 I te suā aso, ne lavea ne te vaitino kolā ne ‵nofo i te suā feitu o te tai me ko seai se isi pōti i konā kae se tamā vaka fua, kae ko Iesu ne seki sopo i te pōti fakatasi mo ana soko, me ko ana soko fua ne olo i ei.
23 Kae ne oko atu a pōti mai Tipelia ki tafa o te koga telā ne ‵kai ei latou ki falaoa i te otiga ne fai ne te Aliki te fakafetai.
24 Tela la, i te laveaga ne te vaitino i a Iesu mo ana soko ko ‵galo i konā, ne ‵sopo latou ki olotou pōti kae olo atu o ‵sala a Iesu i Kapanaumi.
25 I te mauaga ne latou a ia i te suā feitu o te tai, fai atu ei latou ki a ia: “Te Faiakoga,*+ anafea ne oko mai ei koe ki konei?”
26 Ne tali atu a Iesu ki a latou: “Au e fai ‵tonu atu ki a koutou, a koutou e se ‵sala mai ki a au ona ko te mea ne lavea ne koutou a galuega ‵mana, kae ona ko koutou ne ‵kai ki falaoa, ma‵kona ei koutou.+
27 Sa ga‵lue ke maua a meakai kolā e se tumau, kae ke maua a meakai kolā e tumau mō te ola se-gata-mai,+ telā ka tuku atu ne te Tama a te tagata ki a koutou; me ko oti ne tuku atu ne te Atua te Tamana a te fakamailoga o tena taliaga ki luga i te tino tenei.”+
28 Tenā ne fai atu ei latou ki a ia: “Se a te mea e ‵tau o fai ne matou ke fakataunu a galuega a te Atua?”
29 Ne tali atu a Iesu ki a latou: “Tenei te galuega a te Atua, ke fakaasi atu faeloa te otou fakatuanaki ki te tino telā ne uga mai ne ia.”+
30 Tenā ne fai atu ei latou ki a ia: “Se a te fakailoga ka fai ne koe+ ko te mea ke lavea ne matou ko tali‵tonu ei matou ki a koe? Se a te galuega e fai ne koe?
31 Ne ‵kai omotou tupuga ki te manai i te koga lavaki,+ e pelā eiloa mo muna ne tusi i te tusi: ‘Ne tuku atu ne ia a falaoa mai te lagi ke ‵kai ei latou.’”+
32 Ne fai atu ei a Iesu ki a latou: “Au e fai ‵tonu atu ki a koutou, ne seki tuku atu ne Mose ki a koutou a te falaoa mai te lagi, kae e tuku atu ne toku Tamana ki a koutou a te falaoa tonu mai te lagi.
33 Me i te falaoa a te Atua ko te tino telā ne fanaifo mai te lagi ke tuku atu te ola ki te lalolagi.”
34 Fai atu ei latou ki a ia: “Te Aliki, tuku mai faeloa te falaoa tenā ki a matou.”
35 Ne fai atu a Iesu ki a latou: “Au ko te falaoa o te ola. So se tino e vau ki a au ka se toe fiakai eiloa, kae ko so se tino e fakaasi atu faeloa ne ia te fakatuanaki ki a au ka se toe fiainu eiloa.+
36 Kae e fai atu au ki a koutou, ko oti ne lavea ne koutou au kae e se tali‵tonu eiloa koutou.+
37 A tino katoa kolā e tuku mai ne te Tamana ki a au ka o‵mai ki a au, kae ka se ‵tuli eiloa ne au kea‵tea a te tino telā e vau ki a au;+
38 me i a au ne fanaifo mai te lagi+ o fai te loto o ia telā ne uga mai ne ia au kae e se ko toku loto eiloa.+
39 Tenei te loto o ia telā ne uga mai ne ia au, ko te mea ke se galo se tino i a latou katoa kolā ne tuku mai ne ia ki a au, kae e ‵tau o faka‵tu+ aka ne au a latou i te aso fakaoti.
40 Tenei te loto o toku Tamana, ko tino katoa kolā e lavea ne latou te Tama kae fakaasi atu faeloa te fakatuanaki ki a ia ka maua eiloa ne latou te ola se-gata-mai,+ kae ka toe faka‵tu+ aka ne au a latou i te aso fakaoti.”
41 Tenā ne kamata ei o mui‵mui a tino Iutaia e uiga ki a ia me ne fai atu a ia: “Au ko te falaoa telā ne fanaifo mai te lagi.”+
42 Kae ne fai aka latou, penei: “E se ko Iesu tenei te tama a Iosefa, telā e iloa ne tatou a tena tamana mo tena mātua?+ E pefea o fai mai a ia, ‘Au ne fanaifo mai te lagi’?”
43 Ne tali atu a Iesu ki a latou: “Sa mui‵mui koutou.
44 E seai se tino e mafai o vau ki a au seiloga ke aumai a ia+ ne te Tamana, telā ne uga mai ne ia au, kae ka toe fakatu aka ne au a ia i te aso fakaoti.+
45 E tusi mai a te kau Pelofeta penei: ‘Ka akoako eiloa a latou katoa ne Ieova.’*+ So se tino ne fakalogo kae tauloto mai i te Tamana, e vau eiloa ki a au.
46 E seai se tino kai lavea ne ia te Tamana+ kae na ko te tino telā ne vau mai te Atua; tenei te tino ne lavea ne ia te Tamana.+
47 Au e fai ‵tonu atu ki a koutou, so se tino e talitonu e maua ne ia te ola se-gata-mai.+
48 “Au ko te falaoa o te ola.+
49 Ne ‵kai otou tupuga ki te manai i te koga lavaki kae ui i ei ne ‵mate eiloa latou.+
50 Tenei te falaoa ne fanaifo mai te lagi, kae ko so se tino e kai ki ei ka se mate.
51 Au ko te falaoa o te ola telā ne fanaifo mai te lagi. So se tino e kai ki te falaoa tenei ka ola ki te se-gata-mai; kae e tonu eiloa i te falaoa telā ka tuku atu ne au ko toku foitino ke sui ei a ola o tino i te lalolagi.”+
52 Ne fakatau kinau a tino Iutaia, kae fai aka, penei: “E mafai pefea o tuku mai ne te tagata tenei a tena foitino ke kai ne tatou?”
53 Fai atu ei a Iesu ki a latou: “Au e fai ‵tonu atu ki a koutou, ka se maua ne koutou te ola*+ seiloga ke ‵kai koutou ki ‵kano o te Tama a te tagata kae inu ki tena toto.
54 So se tino e kai ki oku ‵kano kae inu ki toku toto ka maua ne ia te ola se-gata-mai, kae ka toe fakatu+ aka ne au a ia i te aso fakaoti;
55 me i oku ‵kano ko te meakai tonu eiloa, kae ko toku toto ko te meainu tonu eiloa.
56 So se tino e kai ki oku ‵kano kae inu ki toku toto e tumau i te ‵kau fakatasi mo au, kae ko au e ‵kau fakatasi mo ia.+
57 E pelā mo te Tamana ola telā ne uga mai ne ia au kae ola foki au ona ko te Tamana, e penā foki a te tino telā e kai ki toku foitino, ka ola ona ko au.+
58 Tenei te falaoa ne fanaifo mai te lagi. E se fai pelā mo te taimi ne ‵kai ki ei otou tupuga kae oti ko ‵mate ei. So se tino e kai ki te falaoa tenei ka ola ki te se-gata-mai.”+
59 Ne faipati a ia ki mea konei i te taimi ne akoako ei a ia i loto i se sunako* i Kapanaumi.
60 I te lagonaga ne latou a te mea tenei, ne fai aka ana soko e tokouke penei: “E fakatakalia‵lia a pati konei; ko oi la e fia fakalogologo ki ei?”
61 Kae ne iloa ne Iesu i ana soko e mui‵mui e uiga ki te mea tenei, fai atu ei a ia ki a latou: “E a, e ‵poi* koutou i te mea tenei?
62 E a la māfai e lavea ne koutou te Tama a te tagata e fanaka ki te koga telā ne nofo muamua ei a ia?+
63 Ko te agaga telā e tuku mai ne ia te ola;+ kae e seai eiloa se aoga o te foitino. A pati kolā ne fai atu ne au ki a koutou ko te agaga mo te ola.+
64 Kae e isi ne tino i a koutou e se tali‵tonu.” Me ne iloa ne Iesu i te kamataga, a tino kolā ne seki tali‵tonu mo te tino telā ka fakatogafiti ne ia a ia.+
65 Fai atu ei a ia: “Tenei te pogai ne fai atu ei au ki a koutou, e seai se tino e vau ki a au seiloga ke talia a ia ne te Tamana.”+
66 Ona ko te mea tenei ne toe ‵foki ei ana soko e tokouke ki mea ko oti ne tiakina ne latou+ kae ne seki toe sa‵sale fakatasi mo ia.
67 Ne fai atu a Iesu ki te toko Sefululua: “E a, e ma‵nako foki koutou o olo kea‵tea?”
68 Ne tali atu a Simona Petelu ki a ia: “Te Aliki, ko oi te tino ka olo matou ki ei?+ A muna o te ola se-gata-mai konā e nofo mo koe.+
69 Ko oti ne tali‵tonu kae iloa ne matou i a koe ko te Tino Tapu a te Atua.”+
70 Ne tali atu a Iesu ki a latou: “E a, e seki filifili ne au te toko sefululua o koutou?+ Kae e tokotasi i a koutou se tino gutu fatufatu.”*+
71 Ne faipati eiloa a ia e uiga ki a Iuta te tama a Simona te Isikaliota; me ka fakatogafiti ne te tino tenei a ia, e ui eiloa a ia se tokotasi o te toko Sefululua.+
Fakamatalaga mai lalo
^ Onoono ki te fml i te Mat 23:7.
^ Eleni, “seai se ola i loto i a koutou.”
^ Io me “se koga e maopoopo ei a tino.”
^ Eleni, “pa‵kū io me ‵siga.”
^ Io me “se tiapolo.”
