Te Lua o Tusi ki a Timoteo 3:1-17

  • Taimi faiga‵ta i aso fakaoti (1-7)

  • Tau‵tali faka‵lei ki te fakaakoakoga a Paulo (8-13)

  • “Tumau i mea kolā ne tauloto ne koe” (14-17)

    • Tusitusiga Tapu katoa ne māfua mai i te Atua (16)

3  Kae ke iloa ne koe te mea tenei, me ka oko mai eiloa a toe taimi faiga‵ta i aso fakaoti.+  Me i tino ka a‵lofa fua ki a latou eiloa, fia‵fai tupe, fai‵pati fakamata‵mata, fakamaua‵luga, muna ma‵sei, e se faka‵logo ki mātua, e se loto fakafetai, e se fakamaoni,  seai se alofa masani, e se lotoma‵lie ki so se feagaiga, e gutu fatu‵fatu, e seai se loto pulea, e amio fakasaua, e se fia‵fia ki te aga‵lei,  e faitogafiti, e ma‵keke olotou ulu, e ‵fonu i te fakamatamata, e va‵lea ki fakafiafiaga i lō te a‵lofa ki te Atua,  e foliga mai me e fakamaoni latou ki te Atua kae e fakafiti ne latou tena ‵mana;+ ‵kalo kea‵tea mai tino konei.  E ‵sae mai i a latou konei a tāgata faitogafiti kolā e ulu lēmū atu ki fale o tino kae fakakolekole ne latou a fāfine vāi‵vai kolā e ‵fonu i te agasala, kae e pulea ne olotou manakoga kese‵kese,  e tauloto faeloa latou kae e se mafai o maua ne latou a te iloaga tonu e uiga ki te munatonu.  E pelā eiloa mo te ‵teke atu o Ianea mo Iameli ki a Mose, e penā foki te ‵teke atu o latou konei ki te munatonu. A tāgata penā ko ma‵sei katoatoa olotou mafaufau, e se talia latou ne te Atua me e se sa‵sale latou e ‵tusa mo te fakatuanaki.  E tiga te feitu tenā, ka se toe ga‵solo latou ki mua, me ko matea faka‵lei ne tino te lotou va‵lea, e pelā eiloa mo te va‵lea o tāgata e tokolua konā.+ 10  Kae ko koe ne tautali fakapilipili atu i aku akoakoga, i te auala e ola ei au,+ i toku fakamoemoega, i toku fakatuanaki, i toku kufaki, i toku alofa, i toku fa‵ki, 11  i fakasauaga mo logo‵maega e pelā mo mea ne ‵tupu ki a au i Anitioka,+ i Ikonio,+ i Lusa.+ Ne kufaki au i fakasauaga konei, kae ne fakasao au ne te Aliki mai mea katoa konā.+ 12  Se mea tonu me i tino katoa kolā e ma‵nako o ola kae tapuaki fakamaoni atu ki te Atua i te ‵kau fakatasi mo Keliso Iesu ka fakasauagina foki.+ 13  Kae ko tino amio ma‵sei kae fakaloi‵loi tino ka gasolo aka mai te masei o na ma‵sei atu. E faka‵se ne latou a nisi tino kae e faka‵segina foki latou.+ 14  Kae ko koe, ke tumau i mea kolā ne tauloto ne koe kae talitonu ki ei,+ me e iloa ne koe a tino kolā ne akoako ne lāua a koe 15  me ne iloa ne koe a tusitusiga tapu+ mai tau folikiga,+ kolā e fai ei ke poto koe e uiga ki te fakaolataga e auala i te fakatuanaki ki a Keliso Iesu.+ 16  A Tusitusiga Tapu katoa ne māfua mai i te Atua,+ kae e aoga ki te akoako atu,+ ki te faiga o polopolokiga, ki te fakatonutonuga o mea ‵se, mo te faiga o polopolokiga i te amiotonu,+ 17  ko te mea ke poto ‵lei te tagata o te Atua, kae ke toka ‵lei a ia mō te faiga o galuega ‵lei katoa.

Fakamatalaga mai lalo