Ki te Kau i Efeso 3:1-21
3 Ona ko te pogai tenei, ko fai ei au, Paulo, mo fai te pagota+ a Keliso Iesu mō koutou, tino o fenua fakaa‵tea—
2 māfai ko oti eiloa ne lagona ne koutou a te galuega fakasituati+ o te alofa tauanoa o te Atua telā ne tuku mai ki a au mō koutou,
3 me e auala i se fakaasiga, ne fakailoa mai ei ki a au a te mea ‵funa kae tapu tenei, e pelā eiloa mo taku tusi toetoe muamua.
4 Tela la, kafai e fai‵tau koutou ki te tusi tenei, ko matea ei ne koutou toku malamalama i te mea ‵funa kae tapu+ a Keliso.
5 Ne seki fakaasi atu a te mea ‵funa tenei i nisi kautama ki tama a tāgata e pelā mo te mea ko fakaasi mai nei ki ana apositolo tapu mo te kau pelofeta e auala i te agaga,+
6 ko te mea ke fai a tino o fenua fakaa‵tea, i te ‵kau fakatasi mo Keliso Iesu e auala i te tala ‵lei, mo fai a sui mo tino o tena foitino+ kae ke ‵kau fakatasi mo tatou i te folafolaga.
7 Au ne fai mo tavini o te mea tenei e ‵tusa mo te meaalofa faivasaga o te alofa tauanoa o te Atua telā ne tuku mai ki a au e auala i te fakagaluegaga o tena ‵mana.+
8 Ne tuku mai ki a au, telā se tagata e malalo ifo i te ‵toe tino fatauva eiloa i tino tapu katoa,+ a te alofa tauanoa tenei,+ ko te mea ke folafola atu ne au ki fenua fakaa‵tea te tala ‵lei e uiga ki te maumea sē fuafuagina o te Keliso
9 kae e ‵tau o fai ke lavea ne tino katoa a te auala e fakagalue aka ei te mea ‵funa+ kae tapu telā ne ‵funa i tausaga e uke ko ‵teka ne te Atua, telā ne faite ne ia a mea katoa.
10 Ne fai penei ko te mea ke fakaasi atu nei e auala i te fakapotopotoga+ a te poto o te Atua i ana vaega kese‵kese ki malo mo pulega katoa i te lagi.+
11 E fai a te mea tenei e ‵tusa mo te fuafuaga se-gata-mai telā ne fai ne ia i te soko tasi mo Keliso+ Iesu te ‵tou Aliki,
12 e auala i a ia ko maua ei ne tatou a te saolotoga o fai‵pati atu kae olo atu ki mua o te Atua+ mo te loto tali‵tonu e auala i te ‵tou fakatuanaki ki a ia.
13 Tela la, e fakatagi atu au ke mo a ma ‵fiu koutou ona ko oku puapuaga mō koutou, me e fai eiloa a mea konei mo fai otou tavaega.+
14 Ona ko te mea tenei e totuli ei au i mua o te Tamana,
15 telā ne māfua* mai i ei a kāiga katoa i te lagi mo te lalolagi.
16 Au e ‵talo ko te mea ke tuku atu ne ia ki a koutou, e auala i te lasi o tena ‵malu sili, ke fakama‵losi atu otou loto+ e auala i te ‵mana o tena agaga,
17 kae e auala i te otou fakatuanaki ko mafai ei o nofo a Keliso i otou loto fakatasi mo te alofa.+ Ke ‵mautakitaki eiloa otou aka+ kae ke tumau i luga i te fakavae,+
18 ko te mea ke mafai ne koutou fakatasi mo tino tapu katoa o malamalama katoatoa i te lauefa, te loa, te maluga, mo te ‵poko o te munatonu,
19 kae ke iloa ne koutou a te alofa o Keliso+ telā e sili fakafia atu i te poto, ko te mea ke faka‵fonu koutou ki uiga o te Atua.
20 E ‵tusa mo tena ‵mana telā e galue i loto i a tatou,+ e mafai ei ne ia o fai a mea e uke atu i lō mea kolā e fakamolemole io me e mafau‵fau tatou ki ei,+
21 ke i luga i a ia te ‵malu e auala i te fakapotopotoga penā foki loa mo Keliso Iesu i kautama katoa ki te se-gata-mai, se-gata-mai eiloa. Amene.
Fakamatalaga mai lalo
^ Io me “maua tena igoa mai i a ia.”
