Ki te Kau i Efeso 6:1-24
6 Tama‵liki, faka‵logo ki otou mātua+ i te ‵kau fakatasi mo te Aliki, me se faiga amiotonu a te mea tenei.
2 “Āva ki tou tamana mo tou mātua”+ ko te tulafono muamua telā e aofia i ei se folafolaga:
3 “Ko te mea ke ‵lei koutou* kae ke ola leva koutou i te lalolagi.”
4 Kae ko koutou e tamana, sa fakaitaitagina otou tama‵liki,+ kae ke puti aka faeloa latou i polopolokiga+ mo fakatakitakiga* a Ieova.*+
5 Pologa, faka‵logo ki otou matai faka-te-foitino,+ mo te ma‵taku mo te pole‵pole mo te fakamaoni i otou loto, e pelā eiloa mo te otou faka‵logo ki a Keliso,
6 e se i te taimi fua e onoono mai ei latou ko te mea fua ke fakafiafia atu ki tino,+ kae e pelā me ne pologa a Keliso i te faiga o te loto o te Atua mo te loto kātoa.+
7 Ke ga‵lue koutou mo se kilokiloga ‵lei, e pelā eiloa me e ga‵lue koutou mō Ieova,*+ kae e se mō tino,
8 me e iloa ne koutou me i so se mea ‵lei e fai ne se tino, ka toe maua eiloa ne ia te mea tenā mai i a Ieova,*+ faitalia me ko ia se pologa io me se tino saoloto.
9 E penā foki koutou e matai, ke fai faeloa ne koutou penā ki a latou, sa fakamatakutakugina, me e iloa ne koutou i te lotou Matai telā ko te otou Matai e nofo i te lagi,+ kae e se fakailoga tino a ia.
10 Kae ko te ‵toe mea, ke maua faeloa ne koutou a te ‵mana+ i te Aliki mo tena malosi sē fuafuagina.
11 Fakapei ki luga i a koutou a vaega katoa o te gatu tau+ mai te Atua ko te mea ke tu ‵mautakitaki koutou o ‵teke atu a togafiti ma‵sei a te Tiapolo;
12 me i a tatou e taua,+ e se mo tino kolā e faite ki ‵kano mo ivi,* kae e taua atu ki malo, pulega, mo takitaki o te lalolagi pouliuli tenei, mo agaga ma‵sei+ i te lagi.
13 Ona ko te mea tenei, ke fakapei ki luga i a koutou a vaega katoa o te gatu tau mai te Atua,+ ko te mea ke mafai o ‵teke atu koutou māfai e oko mai a te aso masei, kae kafai ko oti ne fakataunu ne koutou a mea katoa, ka tu ‵mautakitaki eiloa koutou.
14 Tela la, ke tu ‵mautakitaki koutou mo te fusi o te munatonu e ‵sai i otou taugasulu,+ kae ‵pei ki te ufi fatafata o te amiotonu,+
15 kae pei a taka i otou vae ke toka o folafola atu te tala ‵lei o te filemu.+
16 I tafa o mea katoa konei, puke ki te talita lasi o te fakatuanaki,+ telā ka mafai o tamate ne koutou ki ei a matasana ‵ka a te tino masei.+
17 Ke talia foki a te puloutau o te fakaolataga,+ mo te pelu o te agaga, telā ko te muna a te Atua,+
18 kae mai te fakaaogaga o vaegā ‵talo+ mo fakatagi katoa, ke ‵talo faeloa koutou i taimi katoa i te agaga.+ Ko te mea ke fai penā, ke ala faeloa koutou kae ‵talo mō tino tapu katoa.
19 ‵Talo foki mō au, ke tuku mai a pati ki a au i te taimi e fakamaga ei toku gutu, ko te mea ke mafai ne au o faipati mo te loto toa o fakailoa atu te mea ‵funa kae tapu e uiga ki te tala ‵lei,+
20 telā e galue ei au e pelā me se sui+ o te Atua telā e pikifao, ko te mea ke faipati atu au e uiga ki ei mo te loto toa e pelā eiloa mo te mea e ‵tau o fai ne au.
21 Ko te mea ke iloa foki ne koutou a mea e uiga ki a au, mo aku mea e fai, ka fakailoa atu eiloa ne Tukasi,+ se taina fagasele mo te tavini fakamaoni i te Aliki, a mea katoa konā ki a koutou.+
22 Ko uga atu ne au a ia ki a koutou mō te pogai eiloa tenei, ko te mea ke iloa ne koutou a mea e uiga ki a matou kae ke fakamafanafana atu a ia ki otou loto.
23 Ke i luga i taina katoa te filemu mo te alofa fakatasi mo te fakatuanaki mai te Atua te Tamana mo te Aliki ko Iesu Keliso.
24 Ke i luga i a latou katoa kolā e tumau te lotou a‵lofa ki te ‵tou Aliki ko Iesu Keliso a te alofa tauanoa.
Fakamatalaga mai lalo
^ Io me “Ko te mea ke manuia koutou.”
^ Io me “akoakoga; takitakiga.” Eleni, “tukuga o te mafaufau ki loto.”
^ Eleni, “toto mo ‵kano.”
