Ki te Kau i Efeso 2:1-22

  • Ne fakaola fakatasi mo te Keliso (1-10)

  • Ko fakaseai te ‵pui e ‵vae i ei (11-22)

2  E se gata i ei, ko te Atua ne fakaola ne ia koutou, e ui eiloa koutou ne ‵mate i otou amioga solitulafono mo agasala,+  kolā ne sa‵sale mua koutou i ei i te olaga masani o te lalolagi tenei,+ e ‵tusa mo te pule a te takitaki o te ea,+ ko te agaga+ telā e galue nei i tino sē faka‵logo.  Ao, ne aofia tatou i a latou kolā ne sa‵sale e ‵tusa mo manakoga o ‵tou foitino,+ i te faiga o mea e manako ki ei te foitino mo ‵tou mafaufauga,+ kae ko tatou ne fa‵nau mai e pelā me ko fanau o te kaitaua o te Atua+ e pelā eiloa mo tino katoa.  Kae ko te Atua e lasi tena alofa fakamagalo,+ ona ko te lasi o tena alofa ki a tatou,+  ne fai ei ne ia ke ola fakatasi tatou mo Keliso, e ui eiloa ko ‵mate tatou i ‵tou agasala+​—e auala i tena alofa tauanoa ko ‵sao ei koutou.  E se gata i ei, ne fai ne ia ke ola tatou kae fakasaga‵saga fakatasi ne ia tatou i te lagi i te ‵kau fakatasi mo Keliso Iesu,+  ko te mea ke fakaasi mai ne ia i te olaga telā ka oko mai a te maumea sē fuafuagina o tena alofa tauanoa i tena aga‵lei ki a tatou i te ‵kau fakatasi mo Keliso Iesu.  Ona ko te alofa tauanoa tenei, ne faka‵sao ei koutou e auala i te fakatuanaki,+ kae e se fai penā ona ko otou galuega, a te mea tenā ko te meaalofa eiloa a te Atua.  Ikai, e se maua te mea tenā mai te faiga o galuega,+ ko te mea ke seai se pogai e faipati fakamatamata ei se tino. 10  A tatou ko galuega* a te Atua kae ne faite tatou+ ke ‵kau fakatasi mo Keliso Iesu+ i te faiga o galuega ‵lei, kolā ko leva ne fakatoka ne te Atua ke sa‵sale tatou i ei. 11  Tela la, ke masaua me i a koutou, tino o fenua fakaa‵tea kolā ne fa‵nau mai i te feitu faka-te-foitino, ko tino kolā ne fakaigoa me ne “tino seki pilitome” ne tino kolā ne fakaigoa me ne “tino pilitome,” se mea telā ne fai ne tino ki olotou foitino. 12  I te taimi tenā, a koutou ne ‵nofo e aunoa mo Keliso, ne ‵vae kea‵tea mai te fenua o Isalaelu, ne seki aofia i feagaiga o te folafolaga;+ ne seki ai se otou fakamoemoega kae ne ‵nofo i te lalolagi e aunoa mo te Atua.+ 13  Kae nei la, i te otou ‵kau fakatasi mo Keliso Iesu, a koutou kolā ne ‵mao ‵ki mai te Atua ko ‵pili mai e auala i te toto o Keliso. 14  Me i a ia ko ‵tou filemu,+ ko ia telā ne fai ne ia a potukau e lua ke tasi+ kae fakaseai a te ‵pui* telā ne ‵pono i te lā va.+ 15  E auala i tena foitino ne fakaseai ei ne ia te māfuaga o te fai fili, ko te Tulafono telā e aofia i ei a fakatonuga mo fakamasinoga, ko te mea ke fai a potukau e lua kolā e ‵kau fakatasi mo ia mo fai se tino fou e tokotasi+ kae maua ei te filemu, 16  ko te mea ke faka‵lei katoatoa a te avā potukau o tino i se foitino e tasi ki te Atua e auala i te pou fakasaua,*+ me ko oti ne tamate ne ia te māfuaga o te fai fili+ e auala i a ia eiloa. 17  Kae ne vau a ia o folafola atu a te tala ‵lei o te filemu ki a koutou kolā ne ‵mao ‵ki, mo te filemu ki a latou kolā e ‵pili mai, 18  me e auala i a ia ko mafai ei ne tatou, ko te avā potukau o tino, o fesokotaki ki te Tamana e auala i te agaga e tasi. 19  Tela la, ko se toe fai koutou mo fai ne tino ‵fou mo tino fakaa‵tea,+ kae ko koutou ko tino ‵tonu o te fenua+ o tino tapu kae ko tino foki o te kaufale o te Atua,+ 20  kae ko oti ne ati aka koutou i luga i te fakavae o apositolo mo te kau pelofeta,+ kae ko Keliso Iesu eiloa ko te fatu tulimanu fakavae.+ 21  Mai i te otou ‵kau fakatasi mo ia, ko ati aka ei a vaega kese‵kese o te fale kātoa+ ke fai mo fai te faletapu o Ieova.*+ 22  E ati fakatasi aka foki koutou i te otou ‵kau fakatasi mo ia ke fai mo koga e nofo ei te Atua e auala i tena agaga.+

Fakamatalaga mai lalo

Io me “ko fua o Ana galuega.”
Ne fakasino atu ki te ‵pui i te faletapu telā ne ‵pono ei a Tino o Fenua Fakaa‵tea ke mo a ma ulu ki loto i te koga ateatea telā ne saoloto fua i ei a tino Iutaia.
Onoono ki te FP.
Onoono ki te MF A5.