Ki te Kau i Efeso 1:1-23

  • Alofaaga (1, 2)

  • Fakamanuiaga faka-te-agaga (3-7)

  • Fakamaopoopo a mea katoa i a Keliso (8-14)

    • “Te pulega” i te taimi ne fuafuagina (10)

    • Fakamailogagina ki te agaga e pelā me se “fakamautinoaga telā ko leva ne fai” (13, 14)

  • Fakafetai atu a Paulo ki te Atua mō te fakatuanaki o te kau Efeso kae ‵talo mō latou (15-23)

1  Au ko Paulo, se apositolo a Keliso Iesu e ‵tusa mo te loto o te Atua, ki tino tapu i Efeso+ kolā e fakamaoni i te ‵kau fakatasi mo Keliso Iesu:  Ke i luga i a koutou a te alofa tauanoa mo te filemu o te Atua te ‵tou Tamana mo te Aliki ko Iesu Keliso.  Ke vikia te Atua te Tamana o te ‵tou Aliki ko Iesu Keliso, me ko oti ne fakamanuia ne ia tatou ki fakamanuiaga faka-te-agaga katoa i te lagi i te ‵kau fakatasi mo Keliso,+  me ne filifili ne ia tatou ke ‵kau fakatasi mo ia* kae koi tuai o fakavae* te lalolagi, ko te mea ke tapu kae ‵ma+ tatou i mua o te Atua i te alofa.  Me ko leva ne fai tena filifiliga+ ke fai tatou mo fai ana tama puke+ e auala i a Iesu Keliso, e ‵tusa mo te mea e fiafia a ia ki ei mo te faiga foki o tena loto,+  ko te mea ke vikia tena alofa tauanoa+ telā ne fakaeke ne ia ki luga i a tatou mo te kaimalie e auala i tena tama fagasele.+  E auala i a ia ko fakasaoloto ei tatou ne te togiola e auala i tena toto,+ ao, ko te fakamagaloga o ‵tou agasala,+ e ‵tusa mo te lasi o tena alofa tauanoa.  Ne fakaasi mai ne ia ki a tatou a te lasi o te alofa tauanoa tenei i te tukumaiga o te poto katoatoa mo te malamalama  e auala i te fakailoa mai ki a tatou a te mea ‵funa kae tapu+ o tena loto. Ne fai ne ia a te mea tenei e ‵tusa mo te mea e fiafia a ia ki ei telā ne fuafua eiloa ne ia 10  ke fakagalue aka te pulega i te fakaotiga o taimi ne fuafuagina, ko te mea ke fakamaopoopo fakatasi a mea katoa i a Keliso, ko mea i te lagi mo mea i te lalolagi.+ Ao, e auala i a ia 11  telā ko ‵kau fakatasi mo tatou kolā ne ‵tofi mo fai ne sui,+ kae ko leva ne filifili e ‵tusa mo te fuafuaga a te tino telā e fakataunu ne ia a mea katoa kolā e fakaiku aka ne ia e ‵tusa mo tena loto, 12  ko te mea ko tatou kolā ne ‵mua o fakamoe‵moe ki a Keliso ke tavini atu mō te vikiga o tena ‵malu. 13  Kae ne fakamoe‵moe foki koutou ki a ia i te otiga ne lagona ne koutou a te munatonu, ko te tala ‵lei e uiga ki te otou fakaolataga. I te otiga ne tali‵tonu koutou, ne fakamailogagina koutou+ e auala i a ia fakatasi mo te agaga tapu telā ne folafola mai, 14  ko te fakamautinoaga telā ko leva ne fai mai* e uiga ki te ‵tou tofi,+ mō te fakasaolotoga o tino o te Atua+ e auala i te togiola,+ ke avatu i ei a vikiga mo tavaega ki a ia. 15  I taku logoga e uiga ki te otou fakatuanaki ki te Aliki ko Iesu mo te alofa ne fakaasi atu ne koutou ki tino tapu katoa, tenā te pogai 16  e se gata ei aku fakafetai mō koutou. E taku faeloa ne au koutou i aku ‵talo, 17  ko te mea ke tuku atu ne te Atua o te ‵tou Aliki ko Iesu Keliso, te Tamana o vikiga, a te agaga o te poto mo fakaasiga i te iloaga tonu e uiga ki a ia.+ 18  Ko oti ne fakamaina ne ia otou loto,* ko te mea ke iloa ne koutou me se a te fakamoemoega telā ne kalagagina ei koutou, me ne a foki a koloa tāua kolā e tausi ne ia e pelā me se tofi mō tino tapu,+ 19  mo te lasi o tena ‵mana telā e fakaasi mai ki a tatou tino tali‵tonu.+ E fai eiloa penā ona ko te fakagaluegaga o tena malosi sē fuafuagina, 20  telā ne fakagalue ne ia i a Keliso i te taimi ne fakatu aka ei a ia mai te mate kae fakasagasaga a ia i tena feitu fakaatamai+ i te lagi, 21  ke maluga atu i malo mo pulega mo malosi pule mo pulega a aliki mo igoa katoa,+ e se gata fua i te olaga tenei kae e penā foki i te olaga telā ka oko mai. 22  Ne tuku foki ne ia a mea katoa mai lalo i ana vae+ kae ne ‵tofi ne ia ke fai mo ulu o mea katoa e uiga ki te fakapotopotoga,+ 23  telā ko tena foitino,+ kae e ‵fonu i a ia telā e faka‵fonu ne ia a mea katoa.

Fakamatalaga mai lalo

Telā ko te Keliso.
Onoono ki te fml i te 1Pe 1:20.
Io me “ne tupe ko leva ne ‵togi (tupe mautinoa); se fakapatonuga (tautoga) o te mea ka oko mai.”
Eleni, “mata o otou loto.”