Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Faleleoleo Maluga  |  Mati 2014

Lotu ‵Kau Fakatasi—E Mata, ko te Auala o te Atua?

Lotu ‵Kau Fakatasi—E Mata, ko te Auala o te Atua?

“E mata, e fai ne lotu ke fealofani io me ke mavae‵vae tatou?” Ne fai atu te fesili tenā ki tino fai‵tau o The Sydney Morning Herald. Mai tino kolā e ne tali atu, a te tokoukega o latou—kāti se 89 pasene—ne mafaufau me e fai ne lotu ke mavae‵vae tatou.

KAE ko tino kolā e ‵lago atu ki lotu ‵kau fakatasi, e ‵kese olotou kilokiloga ki te mataupu tenei. “Fakaasi mai aka se lotu telā e se fia fakaasi atu ne ia a te alofa atafai . . . , e se fia saga atu foki ki te tulaga o te enivalomene . . . , kae e se fia fakatāua foki ne ia a te uiga talimālō,” ko te fesili a Eboo Patel, ko te tino telā ne kamata ne ia a Lotu ‵Kau Fakatasi a te Kau Talavou.

A te ‵tonuga loa, e ga‵lue tasi a te Lotu Puta, Katolika, Polotesano, Hinitu, Musilimu, mo nisi lotu e uke ke ‵kau atu latou ki kautau ke ‵teke atu ki te mativa, saolotoga o tino, galuega ke fakatapu a paula i lalo i te laukele, io me ke ‵saga atu o faka‵lei a te tulaga o te lalolagi. Ko oti ne ‵kau fakatasi a lotu kese‵kese o sau‵tala ki te auala e mafai ei o ati aka a te malamalama mo te fakatau fakamalosi. E fakamanatu ne latou te kese‵kese o olotou lotu ki te fakaaogaga o moli gako, faigāmea, pese, ‵talo, mo nisi mea aka penā.

E mata, a te ‵kau fakatasi o lotu ko te auala ke faka‵lei aka a kinauga i va o lotu? E mata, a lotu ‵kau fakatasi ko te auala ka aumai ei ne te Atua se lalolagi tai ‵lei atu?

TE ‵KAU FAKATASI—NE A MEA E IKU MAI I EI?

E faipati fakamatamata mai se fakapotopotoga lasi e tasi o lotu ‵kau fakatasi me e ‵kau atu ki a latou a sui o lotu kese‵kese e silia atu i te 200 kae e 76 a fenua e malosi ‵ki i ei a latou. A te lotou fakamoemoega ko te “fakamalosi aka o te kufaki mo te ga‵lue fakatasi o lotu ‵kau fakatasi i aso katoa.” Kae ne fakamaoni mai ei me e faigofie atu a pati i lō faiga. E pelā mo tino kolā e fakatoka ne latou te mea tenei, a te lotou galuega ko te filifili faka‵lei aka o pati e ‵tau o fakaaoga i luga i olotou feagaiga fakavae ke mo a ma fakaitaita atu ki lotu e uke mo potukau fakalotu kolā ne saina i te feagaiga fakavae. Kaia? E tasi te manatu tāua telā e se lotoma‵lie latou ki ei me e mata, e ‵tau o aofia a te Atua i te feagaiga fakavae. Tela la, ne ‵kalo keatea eiloa latou mai i so se mea telā e fakasino atu io me e taku i ei a te Atua.

Kafai e se aofia lele eiloa te Atua i ei, se a te aoga o te fakatuanaki? E se gata i ei, se a loa te ‵kese o gasuesuega a lotu ‵kau fakatasi mai i nisi fakapotopotoga kolā ne faka‵tu aka ke fesoasoani atu ki tino? Konā eiloa a pogai ne taku ei ne te lotu ‵kau fakatasi telā ne taku atu muamua a ia eiloa, ki “se fakapotopotoga telā e fakamalosi aka fua i ei a te ‵kau fakatasi” kae e sē se fakapotopotogā lotu.

E MATA, E ‵TAU FUA O ‵SAGA ATU A LOTU KI TE FAKAMALOSI AKA O UIGA ‵LEI?

“I faifaiga katoa kolā e fakaasi mai ne lotu, e tasi eiloa te fekau e tauave ne latou: ko te alofa, te alofa atafai mo te fakamagalo,” ko muna a Dalai Lama, se soko lauiloa o lotu ‵kau fakatasi. Ana muna: “A te mea tāua me e ‵tau o fai a uiga konei mo vaega o ‵tou olaga i aso katoa.”

A te ‵tonuga loa, a te tāua o vaegā uiga e pelā mo te alofa, te alofa atafai, mo te fakamagalo e se ne uiga e ‵tau o toe faka‵mafa atu te lotou tāua.  Ne fai mai a Iesu i te mea telā e taku ki te Tulafono Fakaaulo: “Tela la, a mea katoa kolā e ma‵nako koutou ke fai atu ne tino ki a koutou, e ‵tau foki o fai ne koutou ki a latou.” (Mataio 7:12) Kae e mata, a te fakatuanaki tonu ko te fakamalosiakaga fua o te mea ‵lei?

Ne fai mai te apositolo ko Paulo e uiga ki tino e tokouke i ana aso kolā ne fai mai me e tavini atu latou ki te Atua, penei: “E molimau atu au me e lasi te lotou toaga ki te Atua, kae e se fakavae te toaga tenā ki akoakoga ‵tonu.” Se a te fakalavelave? “Ona ko te sē iloa ne latou a te amiotonu o te Atua,” ko muna a Paulo, ne “kausaki atu fua ke fakatumau te lotou amiotonu.” (Loma 10:2, 3) A te sē lava o te malamalama i mea e manako a te Atua ke fai ne latou, te lotou loto finafinau—mo te fakatuanaki—ne seai eiloa se aoga.Mataio 7:21-23.

TE KILOKILOGA A TE TUSI TAPU KI LOTU ‵KAU FAKATASI

Ne fai mai a Iesu: “E fia‵fia a latou kolā e uiga filemu.” (Mataio 5:9) Ne fai eiloa ne Iesu a mea kolā ne talai atu ne ia mai te ‵teke atu ki faifaiga fakasaua kae avatu se fekau o te filemu ki tino kolā e lotu kese‵kese. (Mataio 26:52) A latou kolā ne talia ne latou ka takitaki atu ki se feagaiga tumau o te alofa. (Kolose 3:14) Kae e mata, ne fakamoemoe a Iesu ke faka‵lei aka fua a va o tino mai i olotou tupuakaga kese‵kese ko te mea ke mafai o ‵nofo filemu latou? E mata, ne kau atu a ia ki nisi tino i olotou faifaiga fakalotu?

Ne ‵teke malosi atu a takitaki lotu o te tamā potukau fakalotu a te kau Falesaio mo Satukaio ki a Iesu—ne taumafai foki eiloa ke tamate tou tagata. Ne saga atu pefea a ia? Ne fakatonu atu a Iesu ki ana soko: “Tuku ei latou penā. A latou ne tino ‵kivi.” (Mataio 15:14) Ne ita fitifiti a Iesu ma ‵kau fakatasi mo vaegā tino penā ke fakatu aka ei a te kautaina faka-te-agaga.

I se taimi mai tua ifo, ne fakatu aka se fakapotopotoga Kelisiano i Kolinito, i Eleni—se fa‵kai telā ne lauiloa i te uke mo te kese‵kese o tuu fakalotu i ei. Ne ‵tau o pefea a faifaiga a Kelisiano i se vaegā fakanofonofoga penā? Ne tusi atu a te apositolo ko Paulo ki a latou: “Ke mo a ma se paleni koutou i te otou ‵kau fakatasi mo tino sē tali‵tonu.” Kaia e se ‵tau ei o fai penā? Ne fai mai a Paulo: “E mafai pefea o fealofani a Keliso mo Pelialo? Io me e mafai pefea o ‵pau a mea e maua ne te tino fakamaoni mo te tino sē talitonu?” Oti aka, fai atu ne ia a pati fakatonutonu konei: “Tela la, olo keatea mai i a latou, kae ‵vae keatea mai i a latou.”2 Kolinito 6:14, 15, 17.

E manino ‵lei, me e ‵teke atu te Tusi Tapu ki lotu ‵kau fakatasi. Kae kāti ko mafaufau koe penei, ‘E mafai pefea o maua te ‵kau fakatasi tonu?’

TE ATIAKAGA O TE ‵KAU FAKATASI TONU

A te International Space Station—se poto fou fakaofoofogia i mea tau fesokotakiga telā e fakatamilomilo i te lalolagi—ko te ikuga o taumafaiga ke ‵kau fakatasi a atufenua e nofo ki te 15. E mata, e mafai o fakaataata ne koe i tou mafaufau me ne mafai o fakaoti faka‵lei te galuega talai moi ne seki lotoma‵lie a fenua kolā ne aofia i ei ki te palani ke fakaaoga?

Tenā eiloa te mea e manakogina ke fai ne gasuesuega o lotu ‵kau fakatasi i aso nei. E tiga eiloa ne fakasalalau atu a te ga‵lue fakatasi mo te āva, e se mafai eiloa o lotoma‵lie latou ki te palani ke fakaaoga mō te atiakaga o te fakatuanaki. Ne iku atu eiloa ki te momea aka te lotou mavae‵vae i mea tau amioga mo akoakoga.

E aofia i te Tusi Tapu a tulaga o te Atua, kolā e fai pelā me ko te palani e ‵tau o tau‵tali ki ei. E mafai o ati aka ‵tou olaga ki mea e fai mai i te Tusi Tapu. A latou kolā ne aofia i ei ko oti ne manumalo i te fakailoga tino mai fenua kese‵kese mo tino mai lotu kese‵kese kae ko oti ne fakamasani ke ga‵lue fakatasi i te filemu mo te ‵kau fakatasi. Ne ‵valo mai penei te Atua, ana muna: “Ka ‵fuli ne au [“a ‵gana a tino ki se ‵gana ‵ma,” NW], kae ka ‵talo mai latou ki a au eiloa, kae se ki nisi atua. A latou ka faka‵logo eiloa ki a au.” E maua eiloa a te ‵kau fakatasi mai te “‵gana ‵ma,” ko tulaga o te Atua i te faiga o tapuakiga.Sefanaia 3:9; Isaia 2:2-4.

E ‵kami atu eiloa koe mo te alofa ne Molimau a Ieova ke āsi atu ki se Kingdom Hall telā e pili atu ki a koe ko te mea ke lavea ne koe a te filemu mo te ‵kau fakatasi telā e maua atu i ei.Salamo 133:1.