Te Tusi i te Lua ki te Kau Kolinito 6:1-18
6 I te ‵tou ga‵lue fakatasi mo ia,+ e fakamalosi atu foki matou ke mo a ma talia fua ne koutou a te alofa tauanoa o te Atua kae e se lavea ne koutou tena aoga.+
2 Me ne fai mai a ia: “Ne lagona ne au a koe i te taimi tonu, kae ne fesoasoani atu au ki a koe i te aso o te fakaolataga.”+ Kiloke! Tenei eiloa te taimi tonu. Kiloke! Tenei eiloa te aso o te fakaolataga.
3 E seai eiloa se mea e fai ne matou ke siga ei se tino, ko te mea ke seai se mea ‵se e maua aka i te motou galuega;+
4 kae e fakaasi atu ne matou i feitu katoa i a matou ko tavini a te Atua,+ e auala i te fa‵ki i mea e uke, i puapuaga, i te sē lava o mea e ‵tau o maua, i mea faiga‵ta,+
5 i ‵kiniga, i te ‵pei ki falepuipui,+ i ‵tekemaiga, i galuega ‵mafa, i te sē ti moe i po, i te seai ne meakai i nisi taimi;+
6 i te ‵ma o amioga, i te iloa, i te kufaki,+ i te atafai,+ i te agaga tapu, i te alofa e aunoa mo te loi,+
7 i te faipati ‵tonu, i te ‵mana o te Atua;+ e auala i meatau o te amiotonu+ i te feitu fakaatamai mo te feitu fakamaui,
8 e auala i te ‵malu mo te masiasi, e auala i lipoti ma‵sei mo lipoti ‵lei. E fai ne tino a matou e pelā me ne tino fakaloi‵loi tino kae tela la, e fakamaoni eiloa matou,
9 e pelā me e se iloa kae e lauiloa eiloa matou, e pelā me ko ‵mate,* kae kiloke! a matou konei e ola,+ e pelā me ne fakasala* kae e se ave o tamate,+
10 e pelā me e fanoa‵noa kae e fia‵fia faeloa, e pelā me e ma‵tiva kae fai i ei a tino e tokouke ke mau‵mea, e pelā me e seai ne omotou mea kae e maua ne matou a mea katoa.+
11 Ko oti ne fai‵pati atu matou ki a koutou, e tino Kolinito, kae ko oti foki ne ‵tala atu omotou loto ki a koutou.
12 E se fakatapula ne matou a te motou a‵lofa atafai ki a koutou,+ kae e fakatapula ne koutou te otou a‵lofa atafai ki a matou.
13 Tela la, ke tali atu ki ei—ko faipati atu au e pelā me faipati ki aku tama‵liki—‵tala otou loto ke ma‵tala ‵lei.+
14 Ke mo a ma se paleni koutou i te otou ‵kau fakatasi mo tino sē tali‵tonu.+ E a, e fetaui pefea te amiotonu mo te solitulafono?+ Io me e mafai pefea o māfuta fakatasi te mainaga mo te pouliga?+
15 E se gata i ei, e mafai pefea o fealofani a Keliso mo Pelialo?*+ Io me e mafai pefea o ‵pau a mea e maua ne te tino talitonu* mo te tino sē talitonu?+
16 Kae e fealofani pefea a te faletapu o te Atua mo tupua?+ Me i a tatou ko te faletapu o te Atua ola;+ e pelā eiloa mo pati a te Atua ne fai mai: “Ka nofo atu au i a latou,+ kae sasale i va o latou, kae ka fai au mo fai te lotou Atua, kae ko latou mo fai oku tino.”+
17 “‘Tela la, olo kea‵tea mai i a latou, kae ‵vae koutou kea‵tea,’ ko muna a Ieova,* ‘kae sa toe puke ki mea sē ‵ma’”;+ “‘ko puke mai ei ne au koutou ki loto.’”+
18 “‘Kae ka fai au mo fai te otou Tamana,+ kae ko koutou ka fai mo aku tama tāgata mo aku tama fāfine,’+ ko muna a Ieova* te Atua Malosi Katoatoa.”
Fakamatalaga mai lalo
^ Io me “ko ‵tau o tamate.”
^ Io me “polopoloki.”
^ Mai i se pati Epelu e fakauiga ki te “E Seai Sena Aoga.” E fakasino atu ki a Satani.
^ Io me “se tino fakamaoni.”
