Te Tusi a Mataio 26:1-75

  • Aofaga a faitaulaga ke tamate a Iesu (1-5)

  • Ko ‵ligi atu se sausau ki luga i a Iesu (6-13)

  • Te ‵toe Paseka mo tena fakatogafitiga (14-25)

  • Te kamataga o te ‵Kaiga a te Aliki i te Afiafi (26-30)

  • Ko ‵valo mai te fakafitiga a Petelu (31-35)

  • Ko ‵talo a Iesu i Ketesemane (36-46)

  • Ko puke fakapagota a Iesu (47-56)

  • Ko fakamasino i mua o te Sanetulini (57-68)

  • Ko fakafiti ne Petelu a Iesu (69-75)

26  I te otiga ne fai atu ne Iesu a mea katoa konei, ne fai atu a ia ki ana soko:  “E iloa ne koutou me e toe lua nei aso kae fai te Paseka,+ kae ka tuku atu a te Tama a te tagata ke tamate i luga i se pou.”+  Tenā ne maopoopo ei a faitaulaga pule mo toeaina i te koga ateatea o te fale o te faitaulaga sili ko Kaiafa,+  kae ne fai‵pati fakatasi latou ki se togafiti+ ke puke a Iesu o tamate.  Kae ne fai aka latou penei: “E se ‵tau o fai te mea tenā i te aso o te fakamanatuga i te mea ma fakatupu ei ne tino se fakalavelave.”  I te taimi ne nofo atu ei a Iesu i Petania i te fale o Simona te lepela,+  ne fanatu se fafine ki a ia i konā mo se fagu* sinu manogi kae ‵togi ‵mafa, kae kamata o ‵ligi atu ki tena ulu kae koi kai a ia.*  I te laveaga ne ana soko te mea tenei, ne ita latou kae fai atu: “Kaia e fakamāumāu ei te mea tenei?  Me e mafai o fakatau atu a te mea tenei ke maua mai i ei a tupe e uke ko tuku atu ei ki tino ma‵tiva.” 10  Ne iloa ne Iesu te mea tenei, fai atu ei ki a latou: “Kaia e taumafai ei koutou o fakalavelave atu ki te fafine tenei? Ne fai ne ia se mea ‵lei ki a au. 11  Me e ‵nofo faeloa koutou mo tino ma‵tiva,+ ka ko au e se ‵nofo faeloa mo koutou.+ 12  I te ‵miliga ne te fafine a te sinu manogi tenei ki toku foitino, ne fai ne ia ke fakatoka ei au mō te tanuga.+ 13  Au e fai ‵tonu atu ki a koutou, i so se koga o te lalolagi e talai atu ei te tala ‵lei tenei, ka fakamatala atu foki i ei a te mea ne fai ne te fafine tenei e pelā me se fakamasauaga ki a ia.”+ 14  Tenā ne fanatu ei se tokotasi mai te toko Sefululua, telā e igoa ki a Iuta te Isikaliota,+ ki faitaulaga pule+ 15  kae fai atu: “Se a toku ‵togi e tuku mai ne koutou ke fakatogafiti ne au a ia?”+ Ne lotoma‵lie latou ke tuku atu ki a ia e 30 tupe siliva.+ 16  Mai te taimi tenā o fano ki mua, ne salasala faeloa a ia ki se avanoaga ‵lei ke fakatogafiti ne ia a Iesu. 17  I te aso muamua o te ‵kaiga o Falaoa sē Faka‵fete,+ ne olo atu ei a soko ki a Iesu, kae fai atu: “Tefea te koga e manako koe ke fakatoka ne matou ke kai koe i ei i te Paseka?”+ 18  Ana muna: “Olo ki te tagata i te fakai kae fai atu ki ei, ‘Muna a te Faiakoga: “Ko pili mai toku taimi tonu; ka fakamanatu ne au te Paseka fakatasi mo oku soko i tou fale.”’” 19  Ne fai eiloa ne soko te fakatonuga a Iesu ki a latou, fakatoka ei latou mō te Paseka. 20  I te okoga ki te afiafi po,+ ne saga‵saga fakatasi a ia mo soko e toko 12 i te taipola.+ 21  Kae koi ‵kai latou, ne fai atu a ia: “Au e fai ‵tonu atu ki a koutou, au ka fakatogafiti ne se tokotasi o koutou.”+ 22  Ne fanoa‵noa malosi latou i te mea tenei, kamata ei latou o fesili taki tokotasi atu ki ei: “Te Aliki, e a ko au?” 23  Ne tali atu a ia: “A te tino telā e ufi fakatasi mā falaoa ki loto i te pōla, ko ia tenā ka fakatogafiti ne ia au.+ 24  E tonu, a te Tama a te tagata ka fano kea‵tea, e pelā loa mo mea ne tusi e uiga ki a ia, kae kalofa eiloa+ a te tagata telā e fakatogafiti ne ia te Tama a te tagata!+ E ‵lei atu moi ne seki fanau mai te tagata tenā.”+ 25  Ne tali atu a Iuta, telā ko pili o fakatogafiti ne ia tou tagata, ana muna: “Te Faiakoga, e a, ko au?” Ne fai atu Iesu ki a ia: “Tenā eiloa ko fai mai ne koe.” 26  Kae koi ‵kai latou, ne puke ne Iesu se falaoa, kae i te otiga ne fai te fakafetai, ne tofitofi ne ia+ kae tuku atu ki ana soko, ana muna: “Puke, kai. E fakauiga te mea tenei ki toku foitino.”+ 27  Ne puke a ia ki te ipu, fai ne ia te fakafetai kae tuku atu ki a latou, ana muna: “Inu katoa koutou ki ei,+ 28  me fakauiga te mea tenei ki toku ‘toto+ o te feagaiga,’+ telā ka ‵ligi ki tua mō tino e tokouke+ ke fakamagalo ei agasala.+ 29  Kae e fai atu au ki a koutou: Ka se toe inu eiloa au ki te uaina tenei, ke oko eiloa ki te aso ka inu fakatasi ei au mo koutou ki te uaina fou i te Malo o toku Tamana.”+ 30  Fakamuli ifo, i te otiga ne usu ne latou a pese o vikiga,* olo ei latou ki te mauga o Olive.+ 31  Tenā ne fai atu ei a Iesu ki a latou: “Ka tiaki katoa ne koutou au i te po tenei, me e fai mai te tusi: ‘Ka tamate ne au te tausi mamoe, kae ka mafuta valevale a mamoe i te lafu.’+ 32  Kae kafai ko toetu aka au, ka mua atu au i a koutou ki Kalilaia.”+ 33  Ne tali atu a Petelu ki a ia: “E ui eiloa e tiaki ne latou katoa konei a koe, kae e se mafai ne au o tiaki koe!”+ 34  Muna a Iesu ki a ia: “Au e fai ‵tonu atu ki a koe, i te po eiloa tenei, koi tuai o tagi te moa, kae ko oti ne fakafiti fakatolu ne koe au.”+ 35  Ne fai atu a Petelu ki a ia: “Kafai foki loa e ‵tau o ‵mate fakatasi tāua, ka se mafai lele eiloa o fakafiti ne au a koe.”+ Ne fai atu foki penā a nisi soko katoa. 36  Ne olo atu a Iesu mo latou ki te koga e igoa ki a Ketesemane,+ kae fai atu ki ana soko: “‵Nofo i konei ke fano au o ‵talo i te koga telā.”+ 37  Ne ave ne ia a Petelu mo tama tāgata e tokolua a Sepetaio, kae ne kamata a ia o mafatia malosi kae fi‵ta.+ 38  Tenā ne fai atu ei a ia ki a latou: “Ko mafatia malosi eiloa au ke oko ki te mate. ‵Nofo i konei kae ke matapula‵pula koutou fakatasi mo au.”+ 39  Ne tai momea atu a ia ki mua, totuli ifo ki lalo mo ana mata e ‵fuli ki lalo kae ‵talo:+ “Toku Tamana, kafai e mafai, ave kea‵tea te ipu+ tenei mai i a au. Kae ke se fai la toku loto ka ko tou loto.”+ 40  Ne toe foki atu a ia ki ana soko kae maua atu ne ia a latou e ‵moe, fai atu ei a ia ki a Petelu: “E a, ko se mafai eiloa ne koutou o ‵pula fakatasi mo au i se itula e tasi?+ 41  Ke tumau i te matapula‵pula+ kae ‵talo faeloa,+ ko te mea ke se fakaosoosogina koutou.+ E manako ki ei te loto, kae ko vāivāi te foitino.”+ 42  Ne toe fano a ia o ‵talo i te lua o taimi: “Toku Tamana, kafai e se mafai o ave kea‵tea a te ipu tenei seiloga ke inu au ki ei, ke fai eiloa te mea e loto koe ki ei.”+ 43  Ne toe foki mai a ia kae maua atu ne ia a latou e ‵moe, me ko se mafai eiloa o ‵pula olotou mata. 44  Ne tiaki ne ia latou kae toe fanatu o ‵talo i te tolu o taimi, kae toe fai atu foki ne ia a pati konā. 45  Tenā ne toe foki mai ei a ia ki ana soko kae fai atu ki a latou: “A koutou e ‵moe kae malō‵lo i se vaegā taimi penei! Kiloke! Ko pili mai te itula ka tuku atu ei te Tama a te tagata i se auala faitogafiti ki lima o tino agasala. 46  ‵Tu ki luga, ‵tou olo. Kiloke! A te tino ka fakatogafiti ne ia au ko pili mai.” 47  Kae koi faipati a ia, kiloke! ne oko mai a Iuta, se tokotasi o te toko Sefululua, fakatasi mo te vaitino mo olotou pelu mo pago, ne uga mai latou ne faitaulaga pule mo toeaina.+ 48  Ko oti ne tuku atu ne te tino faitogafiti ki tino konā se fakailoga, ana muna: “A te tino e sogi au ki ei, ko ia tenā; puke atu a ia.” 49  Ne fanatu ‵tonu a ia ki a Iesu kae fai atu: “Talofa, te Faiakoga!” sogi atu ei ki ei. 50  Kae ne fai atu a Iesu ki a ia: “Toku tagata, se a te mea ne vau koe o fai?”+ Tenā ne o‵mai ei latou o puke a Iesu o ave fakapagota. 51  Kae kiloke! ne tapale ne se tino e tokotasi i te kau a Iesu a tena pelu kae ‵kati ne ia te taliga o te pologa a te faitaulaga sili, tō ei kea‵tea.+ 52  Ne fai atu a Iesu ki te tino tenā: “Fakafoki tau pelu ki tena koga,+ me i so se tino e fakaaoga ne ia te pelu ka mate foki i te pelu.+ 53  Se a tau faka‵tau, e se mafai o fakatagi atu au ki toku Tamana ke uga mai ne ia e sili atu i te 12 o kautau o agelu i te taimi eiloa tenei?+ 54  I te feitu tenā, ka fakataunu la pefea a mea ne fai mai i Tusitusiga Tapu me e ‵tau eiloa o fai penei?” 55  I te taimi tenā ne fai atu ei a Iesu ki te vaitino: “A koutou na e o‵mai mo otou pelu mo pago o puke au e pelā me se tagata kaisoa? I aso takitasi ne nofo faeloa au i te faletapu o akoako atu i ei,+ kae ne seki puke eiloa au ne koutou.+ 56  Kae ko ‵tupu katoa a mea konei ke fakataunu ei a tusitusiga a pelofeta.”+ Tenā ne tiaki ei a ia ne ana soko katoa kae ‵tele kea‵tea.+ 57  Ne takitaki atu ne latou kolā ne puke fakapagota ne latou a Iesu ki a Kaiafa,+ te faitaulaga sili, kae ko maopoopo mai foki i konā a failautusi mo toeaina.+ 58  Ne tautali atu faeloa a Petelu i a ia mai i se koga tai ‵mao, ke oko eiloa ki te koga ateatea i loto i te fale o te faitaulaga sili, kae i te uluatuga ki loto, ne saga‵saga fakatasi a ia mo tavini o te fale ke onoono aka me ne a mea ka ‵tupu.+ 59  Ko te taimi eiloa tenā ne salasala ei a faitaulaga pule mo tino katoa o te Sanetulini* ki ne molimau sē ‵tonu e uiga ki a Iesu ko te mea ke tamate a ia.+ 60  Kae e seai se lotou mau ne maua, e ui eiloa te tokouke o molimau ‵pelo kolā ne ‵tu atu i olotou mua.+ Fakamuli ifo, ne olo atu se tokolua ki mua 61  kae fai atu: “Ne fai mai te tagata tenei, ‘E mafai ne au o lepe te faletapu o te Atua kae toe fakatu aka i aso e tolu.’”+ 62  Mai te mea tenā ne tu aka te faitaulaga sili kae fai atu ki a ia: “E a, e seai sau tali? Ne a mea kolā e molimau mai ki ei a tino konei e uiga ki a koe?”+ 63  Kae ne seki faipati eiloa a Iesu.+ Tenā ne fai atu ei te faitaulaga sili ki a ia: “Au e fai atu ki a koe ke tauto mai koe i mua o te Atua ola me i a koe ko te Keliso te Tama a te Atua!”+ 64  Muna a Iesu ki a ia: “Tenā eiloa ko fai mai ne koe. Kae e fai atu au ki a koutou: Mai te taimi nei o fano ki mua, ka lavea ne koutou a te Tama a te tagata+ e sagasaga i te feitu fakaatamai o te tino i o ia te malosi+ kae vau foki i kaumana o te lagi.”+ 65  Tenā ne saesae ei ne te faitaulaga sili ana gatu, kae fai atu: “Ko muna masei a ia ki te Atua! Kaia e toe ‵sala ei tatou ki nisi molimau? Kiloke! Ko oti eiloa ne lagona ne koutou ana muna ma‵sei e uiga ki te Atua. 66  Se a te otou faka‵tau?” Ne tali atu latou: “E ‵tau o mate a ia.”+ 67  Ne puapuaki ne latou ana mata+ kae fusufusu ne latou a ia.+ Ne laupāpā ne nisi tino ana mata,+ 68  kae fai atu: “Te Keliso, kafai koe se pelofeta, taku mai ki a matou me ko oi ne ta ne ia koe?” 69  Kae koi sagasaga a Petelu i te koga ateatea, kae ne fanatu se pologa fafine ki a ia, kae fai atu: “A koe foki ne ‵nofo mo Iesu te Kalilaia!”+ 70  Ne fakafiti ne ia te mea tenā i mua o latou katoa, ana muna: “E se iloa ne au te mea e faipati koe ki ei.” 71  I tena auala ki tua i te mataloa, ne lavea a ia ne te suā tamafine kae fai atu ki tino i konā: “A te tagata tenei ne ‵nofo fakatasi mo Iesu te Nasaleta.”+ 72  Kae ne toe fakafiti ne tou tagata te mea tenā, kae tauto atu: “E se iloa lele ne au te tagata tenā!” 73  E seki leva kae olo atu a tino kolā ne takatu‵tu i konā kae fai atu ki a Petelu: “E tonu eiloa, a koe foki se tino e tokotasi i a latou, me e iloagofie koe i tau ‵gana.”* 74  Tenā ne kamata ei a ia o tauto atu: “Ke malaia eiloa au māfai au e loi! E se iloa ne au te tagata tenā!” I konā foki eiloa ko te moa loa ko tagi. 75  Kae ne masaua ne Petelu a pati a Iesu ne fai atu: “Koi tuai o tagi te moa, kae ko oti ne fakafiti fakatolu ne koe au.”+ Fano ei a ia ki tua kae tagi mautuutu i ei.

Fakamatalaga mai lalo

Eleni, “fagu alapasa.” Se fagu foliki e faite mai i se fatu e maua i tafa o Alabastron, i Aikupito.
Io me “fakapale i te taipola.”
Io me “pese ‵lotu; salamo.”
Onoono ki te FP.
Io me “gaugaleo.”