Te Tusi a Mataio 15:1-39

  • Ko fakaasi faka‵sau atu a tuu mo aganuu a tino (1-9)

  • E ‵mai mai i te loto a mea lai‵lai (10-20)

  • Te lasi o te fakatuanaki o te fafine Foinikia (21-28)

  • Ko faka‵lei ne Iesu a masaki e uke (29-31)

  • Fagai ne Iesu te toko 4,000 (32-39)

15  Ne olo atu ki a Iesu a Falesaio mo failautusi+ mai Ielusalema kae fai atu:  “Kaia e fakaseaoga ei ne ou soko a tuu mo aganuu a tino i aso mua? E pelā mo te mea tenei, e se ‵fulu olotou lima māfai ko pili o ‵kai.”+  Ne tali atu a ia ki a latou: “Kaia e fakaseaoga ei ne koutou a fakatonuga a te Atua ona ko otou tuu mo aganuu?+  E pelā mo te mea tenei, ne fai mai te Atua, ‘Āva ki tou tamana mo tou mātua,’+ kae ko ‘Te tino telā e taku fakamasei* ne ia tena tamana io me ko tena mātua e ‵tau o tamate.’+  Kae e fai mai koutou, ‘So se tino e fai atu ki tena tamana io me ko tena mātua penei: “So se mea a aku telā e mafai o aoga ki a koulua, ko taku meaalofa tenā ki te Atua,”+  ko se manakogina eiloa ke āva a te tino tenā ki tena tamana.’ Tela la, ko fakaseaoga ne koutou a te muna a te Atua ona ko otou tuu mo aganuu.+  Koutou ne tino ‵loi, ne fakasino tonu atu eiloa ki a koutou a te valoaga a Isaia i ana pati konei:+  ‘A tino konei e āva mai fua ki a au i olotou laugutu, kae ko olotou loto e ‵mao ‵ki mai i a au.  E seai se aoga e tapuaki mai ei latou ki a au, me e fakavae olotou akoakoga ki fakatonuga a tāgata.’”+ 10  I konā loa, ne kalaga atu a ia ki te vaitino ke fakapili‵pili mai kae fai atu ki a latou: “Faka‵logo mai kae taumafai ke malama‵lama koutou i te uiga o te mea tenei:+ 11  E se ko te mea telā e ulu ki te gutu e fakalailai ne ia se tagata, kae ko te mea telā e vau mai te gutu e fakalailai ne ia tou tagata.”+ 12  Tenā ne olo atu ei ana soko kae fai atu ki a ia: “E iloa ne koe me ne kaitāua ‵ki* a Falesaio i te lagonaga ne latou au pati konā?”+ 13  Ne tali atu a ia, ana muna: “A lakau katoa kolā e seki ‵toki ne toku Tamana telā i te lagi ka unu kea‵tea. 14  Tuku ei latou penā. A latou ne takitaki ‵kivi. Tela la, kafai e takitaki ne se tagata ‵kivi a te suā tagata ‵kivi, ka ‵to tokolua lāua ki loto i te lua.”+ 15  Ne tali atu a Petelu: “Fakamaina mai ki a matou a te tala fakatusa tenā.” 16  Ne fai atu a ia: “E a, e se maina foki koutou i ei?+ 17  E se iloa ne koutou me i mea katoa kolā e ulu ki te gutu, e olo i loto i te tinae, ko olo ei ki tua? 18  Kae ko so se mea telā e vau ki tua mai te gutu e vau ‵tonu eiloa mai te loto; konā la a mea e fakalailai ne latou te tagata.+ 19  E pelā mo te mea tenei, e māfua mai i te loto a mea ma‵sei katoa,+ ko te tatino, te mulilua, amioga fakatauavaga sē ‵tau,* te kaisoa, te molimau ‵pelo mo pati ma‵sei. 20  Konei la a mea e fakalailai ne latou se tagata; kae ko te kai e aunoa mo te ‵fulu o lima e seai se tagata e lailai i ei.” 21  Ne tiakina ne Iesu te koga tenā, fano ei ki Tulo mo Saitonu.+ 22  Kae kiloke! ne fanatu se fafine Foinikia mai te kogā koga tenā kae kalaga atu: “Te Aliki, te Tama a Tavita, ke alofa mai koe ki a au. A taku tama fafine ko pukea malosi ne te temoni.”+ 23  Kae ne seki ai se pati a Iesu ne fai atu ki te fafine tenā. Tenā ne olo atu ei ana soko kae kamata o fakamalosi atu ki a ia: “Uga atu a ia ke fano me ka fakalavelave mai faeloa a ia ki a tatou.” 24  Ne tali atu a ia: “Au ne seki uga mai ki se isi tino kae ki mamoe o te fenua o Isalaelu kolā ko ‵galo.”+ 25  Kae ne vau te fafine, kae kamata o ifo atu ki a ia, ana muna: “Te Aliki, fesoasoani mai ki a au!” 26  Ne tali atu a Iesu: “E sē se mea tonu ke puke a falaoa a tama‵liki kae ‵pei atu ki tamā kuli.” 27  Muna a te fafine: “Ao, e te Aliki, kae ko tamā kuli e ‵kai foki ki mea kolā e ma‵tutu ifo mai te taipola a olotou matai.”+ 28  Tenā ne tali atu ei a Iesu ki a ia: “Te fafine, ko oko eiloa te lasi o tou fakatuanaki; ke fai eiloa penā e ‵tusa mo te mea e manako koe ki ei.” Kae ne ‵lei ei tena tamaliki fafine i te itula eiloa tenā. 29  I tena fanatuga mai konā, ne oko atu a Iesu ki se koga e pili ki te Vai o Kalilaia,+ kae i tena otiga ne fanaka ki luga i te mauga, sagasaga ei a ia i konā. 30  Tenā ne olo atu ei ki a ia a te vaitino kae aumai ne latou a tino vae ma‵sei, e se katoatoa olotou foitino, e ‵kivi, e gūgū, mo nisi tino e tokouke, kae fakata‵kato ne latou i lalo i ana vae, kae ne faka‵lei ne ia a latou.+ 31  Tela la, ne ofo a te vaitino i te laveaga ne latou a tino gūgū ko fai‵pati, a tino vae ma‵sei ko sa‵sale mo tino ‵kivi ko ‵kite, tavae ei ne latou te Atua o Isalaelu.+ 32  Kae ne kalaga atu a Iesu ki ana soko kae fai atu: “Ko oko eiloa i toku alofa i te vaitino,+ me ko tolu nei aso ne ‵nofo ei au mo latou kae e seai eiloa ne olotou mea ne kai. E se manako au o uga atu latou kea‵tea kae fia‵kai* me kāti ka mata‵po latou i te auala.”+ 33  Fai atu ei ana soko ki a ia: “Tefea te koga mai te koga ‵mao tenei e maua ei ne tatou a meakai e lava ke fagai ki ei a tino e tokouke katoa konei ke ma‵kona?”+ 34  Ne fesili atu a Iesu ki a latou: “E fia otou falaoa?” Olotou muna: “E fitu, mo nai tamā ika.” 35  Tela la, i te otiga ne fakatonu atu ke saga‵saga te vaitino ki lalo, 36  ne puke ne ia a falaoa e fitu mo ika konā, kae i te otiga ne fai te fakafetai, ne tofitofi ne ia kae kamata o tuku atu ki ana soko, kae ne tuku atu ne ana soko ki te vaitino.+ 37  Ne ‵kai katoa latou kae ma‵kona, kae ko meakai kolā ne ‵toe ne faka‵fonu ki ei a tapola ‵lasi e fitu.+ 38  A tino kolā ne ‵kai e toko 4,000 tāgata, i tafa o fāfine mo tama‵liki fo‵liki. 39  I te otiga ne uga atu ne ia te vaitino ke olo, ne sopo a ia ki te pōti kae fanatu ki te kogā koga ko Makatani.+

Fakamatalaga mai lalo

Io me “takalialia.”
Io me “pa‵kū.”
Nisi uiga o te pati Eleni por·neiʹa. Onoono ki te FP.
Io me “liki‵liki.”