“Te Tino e lagona ne ia a ‵talo, ka o‵mai ki a koe a vaegā tino valevale katoa.”—Salamo 65:2.

Nisi tino e ‵talo atu me e fai ei ke ‵lei olotou lagonaga, e tiga loa e se tali‵tonu latou me isi se tino e fakalogologo mai ki olotou ‵talo. Kae ko te ‵talo, e sē se faifaiga masani fua telā e fai ei ke ‵lei ‵tou lagonaga, kae e fesoasoani mai ki a tatou i ‵tou fakalavelave. E fakatalitonu mai te Tusi Tapu me i a “Ieova * e pili ki a latou kolā e ka‵laga atu ki a ia, ki a latou kolā e ka‵laga atu ki a ia i te munatonu. . . . E lagona ne ia te lotou ‵tagi mō se fesoasoani.”—Salamo 145:18, 19.

Tela la, e mafai o mautinoa i a tatou me e lagona ne Ieova te Atua a ‵talo a ana tino tapuaki. E fai mai a ia mo te alofa penei: “Kae ka ka‵laga mai koutou ki a au kae o‵mai o ‵talo ki a au, kae ka fakalogo atu au ki a koutou.”—Ielemia 29:12.

“Tumau faeloa i te ‵talo.”—Loma 12:12.

E fakamalosi mai te Tusi Tapu ki a tatou ke “‵talo faeloa” kae ke “‵talo faeloa . . . i taimi katoa.” E manino ‵lei, me e manako a Ieova te Atua ke ‵talo atu tatou ki a ia.—Mataio 26:41; Efeso 6:18.

Kaia e manako ei te Atua ke ‵talo atu tatou ki a ia? Mafaufau la: E mata, ka se manako se mātua ke fai atu te tamaliki penei, “E mafai koe o fesoasoani mai, e Teti”? E tonu, kāti ko oti ne iloa ne te tamana a manakoga mo lagonaga o tena tama, kae kafai e lagona ne ia a pati konā, e fakaasi atu i ei ki a ia me e talitonu tena tama ki tou tagata kae e pili atu foki ki a ia. I se auala tai ‵pau, kafai e ‵talo atu tatou ki a Ieova te Atua, e fakaasi atu ne tatou a te ‵tou tali‵tonu ki a ia mo te ma‵nako ke fakapili‵pili atu ki a ia.—Faataoto 15:8; Iakopo 4:8.

“‵Pei atu . . . otou manavasega katoa ki luga i a ia, me e atafai a ia ki a koutou.”—1 Petelu 5:7.

A te Atua e manako ke ‵talo atu tatou ki a ia, me e alofa kae atafai mai a ia ki a tatou. E iloa faka‵lei ne ia a ‵tou fakalavelave mo mea e manava‵se tatou ki ei, kae e manako a ia o fesoasoani mai ki a tatou.

I tena olaga kātoa, ne ‵talo atu te Tupu ko Tavita ki a Ieova te Atua mō se fesoasoani, kae fakaasi atu ki a Ia ana mafaufauga mo lagonaga. (Salamo 23:1-6) Ne pefea a lagonaga o te Atua ki a Tavita? A te Atua ne alofa ki a Tavita, kae ne fakalogologo ki ana ‵talo e uke. (Galuega 13:22) Tela la, a te Atua e fakalogologo mai ki ‵tou ‵talo, me e atafai mai eiloa a ia ki a tatou.

Konā a pati ne tusi ne se faisalamo e tokotasi i te Tusi Tapu. Ne talitonu a ia me ne lagona ne te Atua ana ‵talo, kae ne aoga malosi ki a ia a te mea tenā. Ne pili malosi atu a ia ki te Atua, kae ne maua ne ia te malosi ke fakafesagai atu ki puapuaga o te olaga mo te fanoanoa.—Salamo 116:1-9.

Kafai e tali‵tonu tatou me e lagona ne te Atua ‵tou ‵talo, ka tumau eiloa tatou i te fai‵pati atu ki a ia. Mafaufau ki te tala o Pedro, telā e nofo i te feitu ki matū o Sepania. Ne galo atu tena tama tagata telā ko 19 ana tausaga i se fakalavelave tupu fakafuasei i te motoka. Ona ko te fanoanoa, ne ‵ligi atu ne Pedro a mea katoa i tena loto ki te Atua, kae ne ‵talo faeloa a ia mō se fakamafanafanaga mo se fesoasoani. Se a te mea ne tupu? “Ne tali mai ne Ieova aku ‵talo e auala i fakamafanafanaga mo te fesoasoani telā ne maua ne au mo taku avaga mai taina Kelisiano,” ko pati a Pedro.

E tiga eiloa ne seki mafai ne ‵talo o toe fakafoki mai te ola o tena tama, ne fesoasoani atu a ‵talo ki te kāiga o Pedro i auala tāua. Ne toe fai mai tena avaga ko María Carmen, penei: “Ne fesoasoani mai a ‵talo ke kufaki au i te fanoanoa. Ne iloa ne au me ne malamalama a Ieova te Atua i a au, me i te taimi ne ‵talo atu ei au ki a ia, ne maua ne au se lagonaga filemu kae tokagamalie.”

E manino ‵lei me e fakaasi mai i te Tusi Tapu mo tala konei, me i te Atua e lagona ne ia ‵tou ‵talo. Kae e manino ‵lei foki me e se tali mai ne te Atua a ‵talo katoa. Kaia e tali fua i ei ne te Atua a nisi ‵talo kae e se ko ‵talo katoa?