Ikai, ka se fakaseai, ‵sunu ki te afi, io me sui ki se mea, a te paneta ko te Lalolagi. E akoako mai te Tusi Tapu me ne fai ne te Atua a te lalolagi ke ‵nofo i ei a tino ki te se-gata-mai.

• “A tino amio‵tonu ka fai mō latou te lalolagi, kae ka ‵nofo latou i ei ki te se-gata-mai.”​—Salamo 37:29.

• “Ko oti ne faka‵mautakitaki ne [te Atua] te lalolagi ki ana fakavae; ka se fakagasue eiloa mai tena koga ke oko ki te se-gata-mai, se-gata-mai eiloa.”​—Salamo 104:5.

• “Te lalolagi e tumau eiloa ki te se-gata-mai.”​—Failauga 1:4.

• “Te Atua telā ne fakafoliga ne ia te lalolagi, te Atua telā ne faite ne ia kae faka‵mautakitaki ne ia, . . . ne seki faite fua ne ia ke se aoga, kae ne faite ke ‵nofo i ei a tino.”​—Isaia 45:18.

Ka se talia ne te Atua ke fakamasei katoatoa ne tino a te lalolagi e auala i te fakalailaiga o te ea, taua, io me ko nisi auala aka. I lō te fai penā, ka “fakamasei [ne ia] a latou kolā e fakamasei ne latou te lalolagi.” (Fakaasiga 11:18) Ka fai pefea ne ia te mea tenā?

Ka sui ne te Atua a pulega a tāgata, kolā e se mafai ne latou o puipui te lalolagi, ki se Malo ‵lei katoatoa faka-te-lagi. (Tanielu 2:​44; Mataio 6:​9, 10) A te Malo tenā ka pule i ei a te Tama a te Atua, ko Iesu Keliso. (Isaia 9:​6, 7) I te taimi ne nofo ei i te lalolagi, ne fakaaoga ne Iesu a te ‵mana fakavavega ki malosi o te natula. (Maleko 4:​35-​41) E pelā me ko te Tupu i te Malo o te Atua, ka pule katoatoa atu a Iesu ki te lalolagi kātoa mo mea katoa i ei. Ka toe faite, io me fakafou, a tulaga i te lalolagi, ke ‵pau eiloa mo te tulaga i te fatoaga o Etena.​—Mataio 19:28; Luka 23:43.

Ikai, e se penā loa. A vaegā manatu ‵se penā e māfua i te sē maina i te 2 Petelu 3:7, telā e fai mai: “A te lagi mo te lalolagi konei e iai nei e taofi eiloa penā mō te afi.” Mafaufau la ki manatu tāua e lua kolā e fesoasoani mai ke maina tatou i te uiga o pati konā:

1. E fakaaoga i te Tusi Tapu a tugapati “te lagi,” “te lalolagi,” mo “te afi” ke fakasino atu ki mea e uke atu i lō se mea fua e tasi. E pelā mo te Salamo 33:8, e fai mai: “Ke ma‵taku te lalolagi kātoa ki a Ieova.” I konei, a te “lalolagi” e fakasino atu ki tino.

2. E fakaasi mai i te mataupu kātoa o te 2 Petelu 3:7 a te uiga o te lagi, te lalolagi, mo te afi kolā e taku mai i ei. I te fuaiupu e 5 mo te 6 e faka‵pau i ei ki te Lolo i aso o Noa. I te taimi tenā ne fakaseai atu te lalolagi mua, kae ne seki galo atu ‵tou paneta. I lō te fai penā, ne fakaseai atu i te Lolo a tino io me ko te “lalolagi” amio fakasaua. (Kenese 6:​11) Ne fakaseai atu foki i ei a te vaegā “lagi”​—ko tino kolā ne pule atu ki te lalolagi o tino i te taimi tenā. Tela la, ne fakaseai atu a tino ma‵sei, e se ko ‵tou paneta. Ne ‵sao atu a Noa mo tena kāiga i te fakaseaiga o te lalolagi tenā kae ne ‵nofo i te lalolagi mai tua o te Lolo.​—Kenese 8:​15-​18.

E pelā mo vai i te Lolo, a te fakaseaiga, io me ko te “afi” i te 2 Petelu 3:7 ka aumai i ei te gataga ki te lalolagi o tino ma‵sei, kae e se ko te paneta ko te Lalolagi. E folafola mai te Atua e uiga ki “se lagi fou mo se lalolagi fou” kolā “e maua i ei te amiotonu.” (2 Petelu 3:​13) A te “lalolagi fou,” io me ko tino ‵fou, ka pule atu ki ei a te “lagi fou,” io me ko te pulega fou​—te Malo o te Atua. Mai lalo i te pulega a te Malo tenā, ka fai te lalolagi mo fai se Palataiso filemu.​—Fakaasiga 21:​1-4.