Te Lua o Tusi a Petelu 3:1-18
3 Aku fagasele, tenei te lua o aku tusi ki a koutou, e pelā eiloa mo taku tusi muamua, e fakaala ne au otou mafaufau e auala i se fakamasauaga,+
2 ko te mea ke masaua ne koutou a pati kolā ne fai* atu muamua ne pelofeta tapu mo te fakatonuga a te Aliki mo te Fakaola e auala i otou apositolo.
3 Muamua la ke iloa ne koutou te mea tenei, me i aso fakaoti ka o‵mai a tino fakatauemu mo olotou pati fakatauemu, e ‵tusa eiloa mo olotou manakoga+
4 kae fai mai: “Ne folafola mai i a ia ka toe fakatasi mai, tefea nei la a ia?+ Mai te taimi ne ‵moe ei a ‵tou tupuga i te mate, e seai eiloa se ‵fuliga ne lavea atu ki mea katoa talu mai te taimi ne kamata ei o faite a mea.”+
5 Me ne seki ma‵nako ke iloa ne latou te manatu tonu tenei, me ne iai te lagi mai i aso mua eiloa mo te laukele telā ne sae aka i te vai kae ne sikomia foki ne te vai e ‵tusa mo te muna a te Atua;+
6 kae e auala i mea konā, ne fakamaseigina a te lalolagi i te taimi tenā i te lofiaga i te vai.+
7 Kae e auala i te muna foki eiloa tenā, a te lagi mo te lalolagi konei e iai nei e taofi eiloa penā mō te afi kae tausi ke oko ki te aso o te fakamasinoga mo te fakaseaiga o tino sē amioatua.+
8 E tiga te feitu tenā, ke mo a ma puli i a koutou a te mea tenei, e taina fagasele, a te aso e tasi e ‵pau mo te afe tausaga ki a Ieova* kae ko te afe tausaga e ‵pau mo te aso e tasi.+
9 A Ieova* e se tuai e uiga ki ana folafolaga,+ e pelā mo te manatu o nisi tino me e tuai, kae ko ia e kufaki ona ko koutou me e se manako a ia ke fakaseai se tino e tokotasi kae e manako ke sala‵mo a tino katoa.+
10 Kae ko te aso o Ieova*+ ka oko mai e pelā me se tino kaisoa,+ telā ka fakaseai atu ei a te lagi+ mo tena ‵gulu fakamataku, kae ko mea i te lagi mo te lalolagi ka liu suavai ona ko te lasi o te ‵vela kae ka tuku faka‵sau atu ei te lalolagi mo ana galuega.+
11 Ona ko mea katoa konei ka fakaseai atu i te auala tenei, mafaufau me e ‵tau o fai koutou mo fai ne vaegā tino pefea. E ‵tau o fai koutou mo tino kolā e ‵malu olotou amioga kae tapuaki fakamaoni ki te Atua,
12 kae koi fakatali‵tali kae olioli faeloa koutou ki te oko* mai o te aso o Ieova,*+ telā ka fakaseai ei a te lagi+ i te afi kae ka liu suavai a mea katoa i ei ona ko te lasi o te ‵vela!
13 Kae e isi se lagi fou mo se lalolagi fou kolā e fakatali‵tali tatou ki ei e ‵tusa mo tena folafolaga,+ kae e maua i ei te amiotonu.+
14 Tela la, e aku fagasele, kae koi fakatali‵tali koutou ki mea konei, fai te ‵toe mea e mafai o fai ke maua atu koutou ne ia e seai ne otou pona io me ne lailaiga kae e filemu.+
15 E se gata i ei, mafaufau ki te kufaki o te ‵tou Aliki e pelā me ko te fakaolataga, e pelā eiloa mo te tusi a te ‵tou taina pele ko Paulo ne tusi atu foki ki a koutou e ‵tusa mo te poto telā ne tuku atu ki a ia,+
16 ne faipati e uiga ki mea konei e pelā eiloa mo ana pati i ana tusi katoa. Kae e isi ne mea i loto i ei e faigata o malamalama i ei, kae ko mea konei e ‵fuli fakakotua ne tino va‵lea kae e se tumau, e pelā foki mo mea e fai ne latou ki te ‵toega o mea i Tusitusiga Tapu, kae ka fakaseai fua i ei latou.
17 Tela la, e aku fagasele, ona ko te mea ko leva ne iloa ne koutou a te mea tenei, ke fakaeteete ke mo a ma takitaki‵segina koutou fakatasi mo latou ona ko te mea ‵se a tino solitulafono kae ‵to kea‵tea mai i otou tulaga ‵mautakitaki.+
18 Ikai, kae ke ola faeloa koutou i te alofa tauanoa mo te poto e uiga ki te ‵tou Aliki mo te ‵tou Fakaola ko Iesu Keliso. Ke i luga i a ia te ‵malu i te taimi nei ke oko atu eiloa ki te se-gata-mai. Amene.
