Salamo 33:1-22

  • ‵Viki atu ki te Mafuaga

    • “Usu atu ki a ia se pese fou” (3)

    • Te faitega o mea e auala i te muna a Ieova mo te agaga (6)

    • E fia‵fia te fenua o Ieova (12)

    • A mata o Ieova e kilokilo mai (18)

33  Ka‵laga mo te fia‵fia, koutou tino amio‵tonu, ona ko Ieova.+ Se mea ‵lei eiloa mō tino fai mea ‵tonu ke ‵viki atu ki a ia.   Fakafetai atu ki a Ieova fakatasi mo te kitala;Usu a pese o vikiga ki a ia fakatasi mo te mea fakatagitagi e sefulu a uka i ei.   Usu atu ki a ia se pese fou;+Ke tātā a uka mo te apo, fakatasi mo te ka‵laga fia‵fia.   Me i te muna a Ieova e fai mea tonu,+Kae ko mea katoa e fai ne ia e fakatuagagina.   E fiafia a ia ki te amiotonu mo te fakamasinoga tonu.+ A te lalolagi ko ‵fonu i te alofa fakamaoni o Ieova.+   E auala i te muna a Ieova ne faite ei a te lagi,+Kae e auala i te mānava* mai tena gutu ne faite ei a mea katoa i luga i ei.*   E fakamaopoopo mai ne ia a vai o te tai e pelā me se ‵pui vaitafe;+E tuku ne ia te tai sou ki loto i fale ‵teu koloa.   Ke ma‵taku te lalolagi kātoa ki a Ieova.+ A tino katoa e ‵nofo i te laukele ola ‵lei ke ofo eiloa i a ia.   Me ne faipati atu a ia, kae ne taunu a te mea tenā;+Ne fakatonu atu a ia, kae ne tu mai a te mea tenā.+ 10  Ko oti ne faka‵numi ne Ieova a togafiti* a atufenua;+Ko oti ne fakamakosu ne ia a palani* a tino.+ 11  Kae ko fakaikuga* a Ieova ka tumau ki te se-gata-mai;+A mafaufauga o tena loto ka oko atu ki kautama katoa. 12  Ke fiafia te fenua telā ko Ieova te lotou Atua,+Ko tino kolā ko oti ne filifili ne ia ke fai mō ia.+ 13  E kilo ifo a Ieova mai te lagi;Lavea ei ne ia a tama tāgata katoa a tāgata.+ 14  Mai tena koga nofoE onoono ifo a ia ki tino katoa i te lalolagi. 15  Ko ia ne faite ne ia olotou loto katoa;E iloilo ne ia olotou galuega katoa.+ 16  E seai se tupu e fakaola ne se kautau lasi;+A te tagata mafi e se fakaola ne tena malosi.+ 17  A te solofanua se fakamoemoega sē tonu mō te fakaolataga;*+A te lasi o tena malosi e se fakamautinoa i ei te sao kea‵tea. 18  Kiloke! A mata o Ieova e kilokilo ki a latou kolā e ma‵taku ki a ia,+Ki a latou kolā e fakatali‵tali ki tena alofa fakamaoni, 19  Ke faka‵sao latou mai te mateKae tausi ke ola latou i te taimi o te oge.+ 20  A matou e ‵nofo fakatalitali ki a Ieova. A ia ko te ‵tou fesoasoani mo te ‵tou talita.+ 21  E fia‵fia omotou loto ona ko ia,Me e tali‵tonu matou ki tena igoa tapu.+ 22  Ke tumau eiloa a tou alofa fakamaoni i luga i a matou, e Ieova,+I te taimi e ‵nofo fakatalitali ei matou ki a koe.+

Fakamatalaga mai lalo

Io me “agaga.”
Epelu, “olotou kautau katoa.”
Io me “pati fakatonutonu.”
Io me “mafaufauga.”
Io me “pati fakatonutonu.”
Io me “mō te manumaloga.”