Kenese 8:1-22

  • Ko fanaifo te vai (1-14)

    • Ko fakaeva atu se lupe (8-12)

  • Ko olo ki tua mo te vaka (15-19)

  • Te folafolaga a te Atua mō te lalolagi (20-22)

8  Kae ko te Atua ne saga atu ki* a Noa mo manu katoa o te vao mo manu ‵lata kolā ne ‵nofo mo ia i loto i te vaka,+ kae ne fai ne te Atua ke agi te matagi i luga i te lalolagi, kae ne kamata o fanaifo te vai.  Ne ‵pono a vai mai te vai ‵poko mo ‵pui o vai o te lagi, ne seki toe ‵to ei te vaiua mai te lagi.+  Tenā ne kamata ei o fanaifo malielie te vai mai te lalolagi. Mai tua o aso e 150, ne ‵masa ei te vai.  I te po 17 o te fitu o masina, ne kasa ei te vaka i luga i mauga o Alalata.  Kae ne gasolo malielie ifo eiloa o ‵masa te vai ke oko ki te sefulu o masina. I te po muamua o te sefulu o masina, ne ‵sae aka ei a taulu o mauga.+  Tela la, i te fakaotiga o aso e 40 ne ‵tala ne Noa a te famalama+ o te vaka telā ne faite ne ia  kae fakaeva atu se leveni; ne eva sāle atu ki tua kae ne toe foki mai, ke oko eiloa ki te taimi ne ‵masa pakupaku ei te vai mai te lalolagi.  Fakamuli ifo, ne fakaeva atu ne ia se lupe ke iloa aka me ko ‵masa ‵lei eiloa te vai i luga i te laukele io me ikai.  Ne seki ai se koga ne maua ne te lupe mo ana tu, kae ne toe foki mai ei ki te vaka me koi ‵soko eiloa te lalolagi kātoa i te vai.+ Ne ‵fola atu te lima o Noa ki tua kae puke mai ne ia te lupe ki loto i te vaka. 10  Ne toe faka‵tali a ia i aso e fitu kae toe fakaeva atu ne ia te lupe mai te vaka. 11  I te taimi ne foki mai ei te lupe ki a ia i te afiafi, ne lavea ne ia me e isi se lau olive ‵mata i tena gutu! Tenā ne iloa ei ne Noa me ko ‵masa a te vai.+ 12  Ne toe faka‵tali a ia i aso e fitu. Tenā ne toe fakaeva atu ei ne ia te lupe, kae ne seki toe foki mai eiloa ki a ia. 13  Nei la, i te 601 tausaga o te olaga o Noa,+ i te po muamua o te masina muamua, ne ‵masa pakupaku ei te vai mai te lalolagi; kae ne tapale kea‵tea ne Noa te ‵pono o te vaka kae lavea ne ia me ko malō te laukele. 14  I te po 27 o te lua o masina, ne malō ei te laukele kātoa. 15  Ne fai atu a te Atua ki a Noa: 16  “Ulu ki tua mo te vaka, ko koe mo tau avaga, au tama tāgata mo olotou avaga.+ 17  Aumai ne koe ki tua a mea ola katoa,+ ko manu eva mo manu vae fa mo manu ‵tolo katoa o te laukele, ko te mea ke malaku i luga i te laukele kae ke fanafanau ke gasolo o uke i luga i te lalolagi.”+ 18  Tenā ne ulu ei a Noa fakatasi mo ana tama tāgata,+ tena avaga mo avaga a ana tama ki tua mo te vaka. 19  A mea ola katoa, ko manu ‵tolo katoa mo manu eva katoa, ko mea ola katoa kolā e gasue‵sue i te lalolagi, ne ulu ki tua mo te vaka i olotou itukāiga.+ 20  Tenā ne faite ei ne Noa se fatafaitaulaga+ ki a Ieova kae puke ne ia a nisi manu vae fa kolā e ‵ma mo nisi manu eva kolā e ‵ma+ kae ofo atu a taulaga ‵sunu i luga i te fatafaitaulaga.+ 21  Kae ne kamata o ‵sogi ne Ieova se mea manogi gali kae fakafiafia. Tenā ne fai aka ei a Ieova i tena loto: “Ka se toe fakamalaia eiloa ne au te laukele+ ona ko te tagata, me i manakoga o te loto o te tagata e ma‵sei faeloa mai te taimi koi foliki ei o fano ki mua;+ kae ka se toe fakamasei ne au a mea ola katoa e pelā mo te mea ko oti ne fai ne au.+ 22  Mai te taimi nei o fano ki mua ka se toe gata eiloa te ‵tokiga o fuaga mo te ‵tauga o fuataga i te lalolagi, te ‵moko mo te ‵vela, te tau ‵vela mo te tau ‵moko, mo te ao mo te po.”+

Fakamatalaga mai lalo

Epelu, “ne masaua.”