Cifukwa Wuli Tikwenera Kunweka na Minthondwe?

“Mazgu ghakuti minthondwe ghakususkana na fundo za sayansi.”—RICHARD DAWKINS, FORMER PROFESSOR FOR PUBLIC UNDERSTANDING OF SCIENCE.

“Purofesa munyake wakati: “Nchamahara kugomezga kuti minthondwe yingacitika ndipo ici cikususkana yayi na vigomezgo vya cisopa. Minthondwe ni nthowa iyo Ciuta wakulongolera citemwa cake kweniso mazaza pa vilengiwa vyake.”—ROBERT A. LARMER, PROFESSOR OF PHILOSOPHY.

“KASI mukugomezga kuti minthondwe yingacitika?” Ivyo waliyose wangaghanaghana vingaŵa vyakupambana nga umo tawonera pacanya apa. Kweni kasi imwe mungazgora wuli fumbo ili?

Panji mungazgora mwakukayikira kuti “Enya nkhugomezga.” Panji mungaghanaghana kuti para munthu wangazgora nthena vingalongora kuti wakutemwa vya masalamusi panji ngwambura kusambira. Ndimo ŵanandi ŵakughanaghanira.

Ndipouli, mungakhorwa kuti minthondwe yikucitika nadi. Mungagomezga minthondwe iyo yili kulembeka mu Baibolo nga uwo Mozesi wakacita, kugaŵa maji pa Nyanja Yiswesi. Mungagomezgaso kuti mazuŵa ghano napo minthondwe yikucitika. Nakuti lipoti lasonosono apa likulongora kuti ŵanthu ŵanandi ku vyaru vya kumanjiliro gha dazi ŵacali kugomezga minthondwe. Mwaciyelezgero, ku America ŵanthu 75 pa 100 ŵaliwose kweniso ku Britain ŵanthu 38 pa 100 ŵaliwose ŵakugomezga minthondwe.” (The Cambridge Companion to Miracles, edited by Graham H. Twelftree) Ndipouli Mbakhristu pera yayi awo ŵakugomezga kuti minthondwe yikucitika. Buku linyake likuti “visopa vyose” vikugomezga vinthu vyamunthondwe. (Britannica Encyclopedia of World Religions).

Panji imwe mungaŵa mu gulu lacitatu la awo ŵangazgora kuti: “Nkhumanya yayi nakuti nilije navyo nchito, minthondwe yindanicitikirepo!” Kweni kasi cifukwa wuli mukwenera kunweka kuti mumanye vya minthondwe?

 Wonani ciyelezgero ici: Yelezgerani kuti muli na nthenda yambura kukonda munkhwala. Usange mungaŵazga nkhani yinyake mu magazini ya vyacipatala yakukhwaskana na munkhwala uphya uwo ungacizga nthenda yinu, kasi mungafwilirapo yayi kuti musange unenesko? Mwakuyana waka, Baibolo likulayizga kuti sonosono apa kucitikenge minthondwe yapadera comene. Waliyose wazamukhwaskika na minthondwe iyi. Kasi nchakuzirwa yayi kupatura nyengo kuti mumanye usange layizgo ili ndaunenesko?

Ndipouli, pambere tindasande minthondwe iyo Ciuta walayizga, tiyeni tisande dankha fundo zitatu izo ŵanthu ŵakutemwa kususka pa nkhani iyi.

[Bokosi pa peji 3]

KASI MUNTHONDWE NI VICI?

Munthondwe nchakucitika cakuzizwiska ico cikucitika na nkhongono zakuluska za ŵanthu.