Baibolo Likusintha Umoyo wa Ŵanthu

Cifukwa wuli mwanakazi wa vilimika vya m’ma 60 wakaleka kusopa vikozgo? Nchivici cikapangiska kuti wasembe wa cisopa ca Cishinto waleke milimo yake pa tempele lakusoperapo mizimu na vilengiwa na kuŵa Mkhristu? Kasi mwanakazi uyo wakalereka na ŵanthu waka wakamazga wuli maghanoghano ghakuti ŵapapi ŵake ŵakamupata? Wonani ivyo ŵanthu aŵa ŵakuyowoya.

“Nkhuteŵeteraso vikozgo yayi.”​—ABA DANSOU

CILIMIKA ICO WAKABABIKIRA: 1938

UKO WAKABABIKIRA: BENIN

IVYO WAKACITANGA: KUSOPA VIKOZGO

UMO NKHAŴIRA KALE: Nkhakulira ku So-Tchahoué, mu muzi uwo mukaŵa visapa ndipo ukaŵa kufupi na nyanja. Ŵanthu ŵa mu muzi uwu mbalovi kweniso ŵakuŵeta ng’ombe, mbuzi, mberere, nkhumba, nkhuku na vinyake. Ku malo agha kulije misewu, ntheura ŵanthu ŵakukwera maboti na mawato para ŵakukhumba kuluta ku malo ghanyake. Ŵanandi nyumba zawo ni za makuni ndiposo utheka, nangauli ŵanyake ni za njerwa. Ŵanthu ŵanandi mbakavu comene. Kweni ucigeŵenga ngwakuzara yayi nga umo uliri mu matawuni.

Apo nkhaŵa mwana, adada ŵakatumizga ine na mukuru wane ku malo ghakusambizgira kusopa mizimu na vikozgo, uko ŵakatisambizga tuvigomezgo twakupambanapambana. Nkhati nakura, nkhasankha Dudua (Oduduwa), ciuta wa Ŵayoruba, kuŵa ciuta wane. Nkhamuzengera nyumba ndipo nyengo zose nkhamupanga sembe za viyawo, mafuta gha kanjeza, nkhonyo, nkhuku, nkhunda, na nyama zinyake zakupambanapambana. Sembe izi zikaŵa zakudura ndipo kanandi zikanimaliranga ndalama zane zose.

UMO BAIBOLO LIKASINTHIRA UMOYO WANE: Apo nkhamba kusambira Baibolo, nkhasambira kuti Yehova ndiyo ni Ciuta yekha waunenesko. Nkhasambiraso kuti wakuzomerezga yayi kusopa vikozgo. (Exodus 20:4, 5; 1 Ŵakorinte 10:14) Nkhamanya ico nkheneranga kucita. Ntheura nkhataya vikozgo vyose ndipo mu nyumba mwane nkhawuskamo cilicose cakukhwaskana na kusopa vikozgo. Nkhaleka kuluta ku ng’anga na kucitako mitheto ya mukaya ndiposo ya pa nyifwa.

Pakuti nkhaŵa na vilimika vya m’ma 60, cikaŵa cakusuzga comene kuleka vinthu ivi. Ŵabwezi ŵane, ŵabali ŵane na ŵazengezgani ŵane ŵakanisuska na kuniseka. Kweni nkhalomba kwa Yehova kuti wanipe nkhongono kuti nicite ico nchakwenelera. Lemba la Zintharika 18:10 likanipembuzga, ilo likuti: “Zina la Yehova ndi cigongwe cakukhora, murunji wakucimbilira kwenekuko na kuphokwa.”

Cinthu cinyake ico cikanovwira nkhufika pa maungano gha Ŵakaboni ŵa Yehova. Pa maungano ghawo, nkhakondwa comene kuwona kuti ŵanthu aŵa ŵakutemwana zanadi, ndipo ŵakuyezgayezga kulondezga ivyo Baibolo likuyowoya. Ivyo nkhawona vikanikhorweska kuti Ŵakaboni ŵa Yehova ndiwo ŵakusopa mwaunenesko.

 UMO NASANGIRA CANDULO: Cifukwa ca kulondezga fundo za mu Baibolo, nkhukolerana na ŵana ŵane. Nkhujipulikaso nga ŵanithura katundu uyo wakaniphyoranga. Nkhamaliranga vinthu vinandi ku vikozgo vyeneivyo vikanovwiranga yayi. Sono nkhusopa Yehova, uyo wali na nthowa yakumazgira masuzgo ghose. (Uvumbuzi 21:3, 4) Nili wakukondwa comene kuti nkhuteŵeteraso vikozgo yayi, kweni nkhuteŵetera Yehova. Mwa iyo nasanga civikiliro ceneco.

“Nkhapenjanga Ciuta kwambira waka pa wanici wane.”—SHINJI SATO

CILIMIKA ICO WAKABABIKIRA: 1951

UKO WAKABABIKIRA: JAPAN

IVYO WAKACITANGA: WAKAŴA WASEMBE WA CISHINTO

UMO NKHAŴIRA KALE: Nkhakulira mu tawuni ya Fukuoka Prefecture. Ŵapapi ŵane ŵakatemwanga kusopa ndipo kwambira waka pa wanici wane ŵakanisambizga kuti nisopenge ŵaciuta ŵa Cishinto. Apo nkhaŵa musepuka, nkhaghanaghanirapo kanandi waka umo ningazakaponera, ndipo nkhakhumbanga comene kovwira ŵanthu ŵakusuzgika. Nkhukumbuka apo nkhaŵa ku sukulu ya pulayimare msambizgi wakatifumba tose mu kilasi ivyo tikukhumba kuzakacita para takura. Ŵanyane ŵakakhumbanga kuzakacita vikuru, nga kuŵa ŵasayansi. Kweni ine nkhati nkhukhumba kuzakateŵetera Ciuta. Waliyose mu kilasi wakaniseka.

Nkhati namalizga sukulu ya sekondare, nkhanjira sukulu ya uliska. Panyengo iyo nkhasambiranga, nkhakumana na wasembe wa cisopa ca Cishinto uyo wakatemwanga kuŵazga buku linyake la cikopi cifipa. Zuŵa linyake wakanifumba kuti, “Sato, kasi ukulimanya buku ili?” Nkhati nawona cikopi, nkhazgora kuti, “ni Baibolo.” Iyo wakati, “Waliyose uyo wakukhumba kuŵa wasembe wa Cishinto wakwenera kuŵazga buku ili.”

Nyengo yeneyiyo nkhanyamuka na kukagura Baibolo. Baibolo lane nkhaliŵika pa malo ghawemi comene ndipo nkhalipweleleranga comene. Kweni nyengo ya kuliŵazgira yikanisoŵanga cifukwa nkhatangwanikanga na sukulu. Nkhati namalizga sukulu iyi nkhaŵa wasembe pa tempele la Cishinto. Ivyo nkhakhumbanga pa wanici vikafiskika.

Mwaluŵiro nkhabowozga kuti ivyo ŵasembe ŵa Cishinto ŵakacitanga vikaŵa vyakupambana comene na ivyo nkhaghanaghananga. Ŵasembe  ŵanandi ŵakatemwanga ŵanthu yayi nesi kupwelerako za iwo. Ŵanandiso ŵakaŵavya cipulikano. Wasembe munyake mulara wakaniphalira kuti: “Para ukukhumba kuti vikwendere makora pano, ukwenera kusambizga vinjeru vya ŵanthu. Nchakukanizgika kusambizga vinthu vyakukhwaskana na cipulikano.”

Mazgu agha ghakanigongoweska comene. Nangauli nkhalutilira kuŵa wasembe kweni nkhamba kusanda visopa vinyake. Ndipouli, pakaŵavya cisopa ico nkhawona kuti cikusambizga makora. Nkhagongoweskekanga waka apo nkhasandanga visopa vyakupambanapambana. Nkhaghanaghana kuti palije cisopa ico cikusambizga unenesko.

UMO BAIBOLO LIKASINTHIRA UMOYO WANE: Mu 1988, nkhakumana na Mubuda uyo wakaniciska kuti niŵazgenge Baibolo. Nkhakumbukiraso wasembe wa Cishinto uyo kumanyuma nayo wakaniciskapo nthena. Nkhalondezga ulongozgi uwu. Nkhati namba kuŵazga Baibolo, nkhamba kulitemwa comene. Nyengo zinyake nkhaŵazganga usiku wose mpaka ngwee.

Ivyo nkhaŵazga vikaniciska kuti nilombenge kwa Ciuta uyo wakuyowoyeka mu Baibolo. Nkhamba kulomba lurombo lwa fumu lwa pa Mateyu 6:9-13. Para pajumpha maora ghaŵiri ghalighose nkhalombanga lurombo ulu nanga ni para nkhucita mulimo wane pa tempele.

Nkhaŵa na mafumbo ghanandi ghakukhwaskana na ivyo nkhaŵazganga. Panyengo iyi nkhaŵa kuti natora, ndipo nkhamanyanga kuti Ŵakaboni ŵa Yehova ŵakusambizga ŵanthu vyakukhwaskana na Baibolo cifukwa cakuti ŵakenderapo muwoli wane. Nkhapenja yumoza wa Ŵakaboni ŵa Yehova na kumufumba mafumbo ghanandi. Nkhakondwa comene kuti mafumbo ghane ghose wakazgora kufumira mu Baibolo. Wakanisangira Kaboni munyake kuti wasambirenge nane Baibolo.

Nyengo yicoko waka yikati yajumphapo, nkhamba kufika ku maungano gha Ŵakaboni ŵa Yehova. Nangauli pakwamba nkhaŵamanya yayi, kweni ŵanyake ŵa iwo nkhaŵa kuti naŵacitirapo msinjiro kumanyuma. Kweni ŵakanitawuzga mwacitemwa na kunipokelera makora.

Pa maungano agha, nkhasambira kuti Ciuta wakukhumba kuti ŵafumu ŵatemwenge ŵawoli ŵawo na kucindika ŵamumbumba yawo. Panyengo iyi, nkhaŵa kuti nkhuŵika comene mtima pa mulimo wane wa usembe mwakuti nkhasuranga muwoli wane na ŵana ŵane ŵaŵiri. Nkhamba kumanya kuti nkhategherezganga comene ivyo ŵanthu awo ŵakizanga pa tempele ŵakayowoyanga, kweni nkhategherezganga yayi ivyo muwoli wane wakuyowoya.

Nkhati nalutilira kusambira, nkhamanya vinthu vinandi comene vyakukhwaskana na Yehova ivyo vikanovwira kusendelera kwa iyo. Lemba la Ŵaroma 10:13, likanicontha comene, ilo likuti: “Waliyose uyo wakucema pa zina la Yehova wazamuponoskeka.” Nkhapenjanga Yehova kwambira waka pa wanici wane, ndipo sono nkhamusanga.

Nkhamba kujipulika kuti nkhenerangaso kuŵa pa tempele la Cishinto yayi. Pakwamba, nkhafipanga mtima na ivyo ŵanji ŵaghanaghanenge usange nacileka cisopa ici. Kweni nkhaŵa kuti nasimikizga kale mu mtima wane kuti cisopa ici nicilekenge para nasanga Ciuta waunenesko kunyake. Ntheura mu 1989, nkhalondezga njuŵi yane. Nkhaleka cisopa ca Cishinto na kwamba kusopa Yehova.

Cikaŵa cipusu yayi kuleka cisopa ici. Ŵalaraŵalara ŵa cisopa ici ŵakanikalipira na kuyezga kunicicizga kuti nileke kuwukamo. Cikaŵaso cakusuzga comene kuphalira ŵapapi ŵane. Apo nkhalutanga ku nyumba kwawo, nkhaŵa na wofi ndipo mtima ukatimbanga comene kweniso makongono ghakati waka yii. Mu nthowa nkhalomba kwa Yehova kanandi waka kuti wanipe nkhongono.

Nati nafika ku nyumba ya ŵapapi ŵane, nkhawopanga kuŵaphalira. Maora ghanandi  ghakajumphapo. Paumaliro, nati nalomba kanandi waka, nkhaŵalongosolera vyose adada. Nkhaŵaphalira kuti nacileka cisopa ca Cishinto ndipo nasanga Ciuta waunenesko uyo nimuteŵeterenge. Adada ŵakakhuŵara comene ndipo ŵakakwiya. Ŵabali ŵane ŵanyake ŵakiza ku nyumba ndipo ŵakayezga kuninyengelera kuti nisinthe maghanoghano. Nkhakhumba yayi kukwiyiska mbumba yane, ndipouli, nkhamanya kuti kuteŵetera Yehova nchinthu cakwenelera. Nyengo yikati yajumphapo, ŵamumbumba yane ŵakanileka waka.

Nkhaleka kuluta ku cisopa ici, kweni maghanoghano ghakaŵa ghacali kwenekuko. Mulimo wa usembe ukaninjira comene. Nkhayezgayezga comene kuti niluweko waka kweni palipose apo nkhaŵanga nkhawonanga vinthu ivyo vikanikumbuskanga umoyo wane wakale.

Vinthu viŵiri vikanovwira kuti niluwe. Cakwamba, nkhapenja mwakupwelelera mu nyumba mwane cinthu cilicose ico cikakolerananga na cisopa cane cakale. Pamanyuma nkhawocha vyose nga ni mabuku, vithuzithuzi, na vinthu vinyake vyakudura ivyo nkhaŵa navyo vyakukhwaskana na cisopa cakale. Caciŵiri, nkhayezgayezga comene kusanga nyengo yinandi yakucezgera na Ŵakaboni ŵa Yehova. Nkhawovwirika cifukwa ca kuŵa nawo paubwezi ndipo ŵakanikhozganga. Mwapacokopacoko, nkhawuluwa umoyo wane wakale.

UMO NASANGIRA CANDULO: Muwoli wane na ŵana ŵane ŵakaŵanga na phukwa cifukwa cakuti nkhaŵasuranga. Kweni nkhati namba kucezga nawo, nga umo Baibolo likusambizgira kuti ndimo ŵacitirenge ŵafumu, tikamba kuŵa paubwezi. Nyengo yikati yajumphapo, muwoli wane nayo wakamba kuteŵetera Yehova. Pamoza na mwana withu mwanalume, mwana withu mwanakazi na mfumu wake, tose tikukolerana pa kusopa kwaunenesko.

Para nkhughanaghanira ivyo nkhakhumbanga pa wanici wane kuti niteŵetere Ciuta ndiposo kovwira ŵanji, nkhuwona kuti nasanga vyose ivyo nkhakhumbanga. Ndipo ivyo nasanga vyajumphaso na umo nkhaghanaghaniranga. Kwali Yehova ningamuwonga na vici!

“Nkhamanyanga kuti nkhusoŵerwa cinthu cinyake.”—LYNETTE HOUGHTING

CILIMIKA ICO WAKABABIKIRA: 1958

UKO WAKABABIKIRA: SOUTH AFRICA

UMO WAKAŴIRA: WAKAJIWONANGA KUTI NGWAKUPATIKA

UMO NKHAŴIRA KALE: Nkhababikira mu tawuni ya Germiston iyo kuli migodi ndipo ucigeŵenga ngucoko. Ŵapapi ŵane ŵakanipeleka ku ŵanthu ŵanyake kuti ndiwo ŵanilerenge cifukwa cakuti ŵakawonanga kuti ŵangakwaniska yayi kunipwelelera. Pakati pajumpha mazuŵa 14 kufumira apo nkhababikira, ŵakutorana ŵanyake ŵacitemwa ŵakanitora ndipo ndiwo nkhawonanga kuti mbapapi ŵane. Kweni nkhati namanya  kuti mbapapi ŵane ŵakunibaba yayi nkhamba kujipulika kuti ŵapapi ŵane ŵali kunipata. Nkhamba kuwona kuti awo ŵakanileranga mbapapi ŵane yayi ndiposo kuti ŵakanipulikiskanga yayi.

Apo nkhaŵa na vilimika vya m’ma 16, nkhamba kwenda mu mabala, kweneuko ine na ŵabwezi ŵane tikategherezganga na kuvina sumu zakwimbika na mabandi. Nkhati nafika vilimika 17, nkhamba kukhweŵa. Nkhakhumbanga kuti niŵe na thupi licoko nga mbanthu ŵa mu vithuzithuzi vya ŵanthu ŵakusaska hona. Apo nkhaŵa na vilimika 19, nkhamba kugwira nchito ku Johannesburg, kweneuko nkhamba kwenda na ŵanthu ŵa nkharo ziheni. Nkhamba kutuka, kukhweŵa comene, ndipo pa Cisulo na Sabata nkhamwanga comene.

Nangauli nkhacitanga vinthu ivi, kweni nkhaŵa wankhongono. Nyengo zose nkhacitanga maseŵera ghakukhozga thupi na kuseŵera bola yamalundi. Nkhalimbikirangaso comene nchito yane ndipo nkhamanyikwa comene na maluso ghane mu makampani gha makompyuta. Nkhaŵa na ndalama zinandi, ndipo ŵanthu ŵakawonanga kuti vinthu vikunendera makora. Kweni nkhaŵanga wakukondwa yayi, nkhajiwonanga kuti ndine wakuzgeŵa, kweniso umoyo ukaninozgeranga yayi. Pasi pa mtima, nkhamanyanga kuti nkhusoŵerwa cinthu cinyake.

UMO BAIBOLO LIKASINTHIRA UMOYO WANE: Nkhati namba kusambira Baibolo, nkhamanya kuti Yehova ni Ciuta wacitemwa. Nkhasambiraso kuti Ciuta walongora citemwa cake pakutipa Baibolo, ilo ni Mazgu ghake. Vikuŵa nga ni para watilembera kalata kuti yitilongozge umo tikwenera kwendera. (Yesaya 48:17, 18) Nkhamanya kuti para nkhukhumba kuti nisange candulo na ulongozgi wacitemwa wa Yehova, nkhwenera kusintha vinandi pa umoyo wane.

Cinthu cimoza ico nkhakhumbikwiranga kusintha ni ŵanthu awo nkhacezganga nawo. Nkhaghanaghanirapo comene mazgu gha pa Zintharika 13:20, agho ghakuti: “Uyo wakwenda na ŵavinjeru naye tiwaŵe wavinjeru, kweni mulongozgani wa vindere tiwapwetekekenge.” Fundo iyi yikanovwira kuti niŵaleke ŵabwezi ŵane ŵakale na kusanga ŵabwezi ŵanyake pakati pa Ŵakaboni ŵa Yehova.

Kweni kuleka kukhweŵa ndilo likaŵa suzgo likuru comene cifukwa hona likaninjira comene. Nkhati namazga suzgo ili, nkhaŵaso na suzgo linyake. Cifukwa cakuti nkhaleka kukhweŵa nkhatutuŵa comene. Ili likaŵa suzgo likuru comene kwa ine ndipo pakajumpha vilimika pafupifupi 10 kuti niŵeso na thupi liwemi. Kweni nkhamanya kuti nacita makora comene kuleka kukhweŵa. Nkhalutilira kulomba kwa Yehova, ndipo wakanipa nkhongono kuti nicitenge makora vinthu.

UMO NASANGIRA CANDULO: Sono nili na umoyo uwemi. Kweniso nili wakukhorwa, ndipo nkhudokeraso yayi vinthu ivyo mulije cimwemwe canadi nga ni nchito yakulembeka, kumanyikwa, na usambazi. Kweni nkhukondwa cifukwa ca kuphalirako ŵanji unenesko wa mu Baibolo. Pasono, ŵatatu mwa ŵabwezi ŵane ŵakale ŵakuteŵetera Yehova pamoza na ine ndiposo mfumu wane. Pambere ŵapapi awo ŵakanilera ŵandapotere, nkhaŵaphalira ivyo Baibolo likulayizga, kuti ŵakufwa ŵazamuwuka na kukhala mu paradiso pa caru capasi.

Cifukwa cakuti nkhusendelera kwa Yehova, maghanoghano ghakuti ŵapapi ŵane ŵakanipata ghali kumara. Yehova wanovwira kuti niŵe mu mbumba ya pa caru cose ya Ŵakaboni ŵake. Pakati pawo, nili na ŵamama, ŵadada, ŵakuru, na ŵanung’una ŵanandi.—Mariko 10:29, 30.

[Cithuzithuzi pa peji 12]

Pakati pa Ŵakaboni ŵa Yehova nasanga citemwa ceneco

[Cithuzithuzi pa peji 13]

Tempele la Shinto ilo nkhasopangako