KUTIMBA PANJI KUKOLELERA ŴANAKAZI: Wupu wa United Nations ukati: “Pa ŵanakazi ŵatatu, yumoza mfumu wake wali kumutimbapo panji kuchita kumukolelera.” Ukatiso “ukaboni ukulongora kuti pa charu chose, pa ŵanakazi 5, yumoza m’paka ŵanthu ŵamukolelerepo panji ŵakhumbe kumukolelera.”

VIGEŴENGA VYA MU MISEWU: Malipoti ghakulongora kuti mu United States, muli magulu gha vigeŵenga vyakofya ghakujumpha 30,000. Ku Latin America, pa ŵanthu ŵatatu, yumoza vigeŵenga vili kumuchitirapo nkhaza.

KUKOMANA: Malipoti ghakulongora kuti mu chaka chinyake sonosono apa, ŵanthu 500,000 ŵakakomeka. Chiŵelengero ichi ntchikuru chomene kuluska cha awo ŵakafwa pa nkhondo. Kumwera kwa Africa na Central America, ndiko ŵanthu ŵanandi chomene ŵakukomeka. Ku Latin America, ŵanthu ŵakujumpha 100,000 ŵakakomeka mu chaka chimoza, ndipo ku Brazil kwekha ŵanthu pafupifupi 50,000. Kasi vingachitika kuti nkhaza zizakamalirethu?

Chifukwa wuli nkhaza zili palipose? Pali vifukwa vinandi ivyo ŵanthu ŵakuwona kuti ndivyo vikupangiska ŵanthu kuchitira ŵanyawo nkhaza. Vinyake ni ivi: kupenja umoyo uwemi na ndalama, kutinkhana, kumwa chomene moŵa na minkhwala yakutimbanizga wongo, ŵana ŵakubabikira mu nyumba izo ŵapapi ŵakuchitirana nkhaza, kweniso vigeŵenga vikopa yayi kulangika.

Mu vyaru vinyake ŵakuyezgayezga kuti ŵamarane nalo suzgo ili. Ku Brazil, mu tawuni ya São Paulo, ŵakuti mu vyaka 10 ivyo vyajumpha, chiŵelengero cha ŵanthu awo ŵakakomeka chikakhira chomene. Kweni uchigeŵenga wamitundumitundu uchali chomene mu tawuni iyi. Ndipo ŵanthu 10 pa ŵanthu 100,000 ŵachali kukomeka. Kasi ntchivichi pera chingawovwira kuti nkhaza zose zimare?

Icho chingawovwira chomene ntchakuti ŵanthu ŵakwenera kusintha kaghanaghaniro na vyakuchita. Kuti munthu uyo wali na nkhaza wasinthe, wakwenera kuleka mtima wa kujitukumura, uryezi, na kujighanaghanira yekha. M’malo mwake, wakwenera kutemwa, kuchindika na kughanaghanira ŵanyake.

Ntchivichi chingamovwira munthu kuti wasinthe kufika apa? Wonani ivyo Baibolo likusambizga:

• “Ili ni ng’anamuro la kutemwa Chiuta lakuti tisungilire malango ghake.”—1 Yohane 5:3

• “Kopa Yehova nkhutinkha uheni.” *—Zintharika 8:13.

Kutemwa Chiuta na kopa kumukwiyiska ndivyo vingawovwira chomene ŵanthu ŵankhaza kuti ŵasinthe  nkharo yawo. Ndipo ŵakusintha nadi. Kasi vikuchitika nadi kuti munthu wasinthe?

Pulikani vya Alex,  * uyo wakakhala mu jele vyaka 19 ku Brazil chifukwa cha milandu yakupambanapambana. Wakati wasambira Baibolo na Ŵakaboni ŵa Yehova, nayo wakazgoka Kaboni mu chaka cha 2000. Kasi wali kuleka nadi nkhaza? Enya, ndipo chitima chikumukora chomene para wakukumbuka viheni ivyo wakachitanga. Iyo wakuti: “Nkhumutemwa Yehova chifukwa wali kunigowokera zakwananga zane. Kuwonga Yehova na kumutemwa, ndivyo vili kunovwira kuti nileke ivyo nkhachitanga.”

César, nayo ngwa ku Brazil, ndipo wakibanga na futi. Wakachita ivi vyaka 15. Ntchivichi chikamovwira kuti wasinthe? Apo wakaŵa mu jele, wakamba kusambira Baibolo na Ŵakaboni ŵa Yehova. Iyo wakuti: “Aka kakaŵa kakwamba pa umoyo wane kumanya chifukwa icho Chiuta wali kutilengera. Nkhamba kumutemwa Chiuta. Kweniso nkhamba kumuwopa, kung’anamura kuti nkhawopanga kuchitaso viheni ivyo vingamukwiyiska. Nkhakhumbanga yayi kulongora kuti ndine munthu wambura kuwonga lusungu ulo wakanilongora. Chitemwa ichi na kumopa Chiuta ndivyo vikanovwira kuti nisinthe.”

Kasi nkhani izi zikutiphalira vichi? Zikutiphalira kuti Baibolo lili na nkhongono za kusinthira umoyo wa ŵanthu, chomenechomene kaghanaghaniro kawo. (Ŵaefeso 4:23) Alex, uyo tamuzunura mu nkhani iyi, wakati: “Ivyo nkhasambira mu Baibolo vikaŵa nga ni maji ghawemi agho nathira mu thupi lane, ndipo ghakusuka maghanoghano ghaheni. Nakuti nkhaghanaghanangako yayi kuti zuŵa linyake vinthu ivi ningavileka.” Usange mu maghanoghano ghithu tikuzuzgamo uthenga wa mu Baibolo uwo ngwakutowa, ungawuskamo panji kusuka viheni vyose. Mazgu gha Chiuta ghakutozga ŵanthu. (Ŵaefeso 5:26) Ŵanthu ŵankhaza na ŵakujighanaghanira ŵekha, ŵangazgoka ŵanthu ŵalusungu na ŵamtende. (Ŵaroma 12:18) Chifukwa chakuti ŵakulondezga fundo za mu Baibolo, ŵakuŵa na mtende.—Yesaya 48:18.

Ŵakaboni ŵa Yehova ŵakujumpha 8,000,000 mu vyaru 240, ŵamanya icho chingawovwira kuti nkhaza zimare. Ŵanthu ŵa mitundu yose pa charu chose ŵasambira kutemwa na kopa Chiuta. Ŵasambiraso kutemwana, ŵakukhala mwamtende nga mbanthu ŵa mu banja limoza. (1 Petrosi 4:8) Uwu mbukaboni wakuti nkhaza zingamara.

Baibolo likulayizga kuti sonosono apa Chiuta wawuskengepo ŵanthu ŵankhaza. Charu chankhaza ichi chikulindilira “zuŵa la cheruzgo na la pharanyiko la ŵanthu ŵambura kopa Chiuta.” (2 Petrosi 3:5-7) Ŵanthu ŵankhaza ŵazamusuzgaso ŵanyawo yayi. Kasi tikumanya wuli kuti Chiuta wakukhumba kuwuskapo nkhaza?

Baibolo likuti Chiuta “wakutinkha waliyose uyo wakutemwa nkhaza.” (Salimo 11:5) Chiuta wakutemwa mtende na urunji. (Salimo 33:5; 37:28) Lekani walekelerenge yayi kuti ŵanthu ŵankhaza ŵalutilire kusuzga ŵanyawo.

Charu chiphya icho muzamuŵa mtende chili pafupi. (Salimo 37:11; 72:14) Ipo sambirani vinandi kuti mumanye ivyo mungachita kuti namwe muzakakhalemo mu charu chambura nkhaza ichi.