Lutani apo pali nkhani

Lutani pa menyu yachiŵiri

Ŵakaboni ŵa Yehova

Chitumbuka

Kasi Baibolo Lingatovwira Kuŵa Ŵakukondwa mu Nthengwa?

Kasi Baibolo Lingatovwira Kuŵa Ŵakukondwa mu Nthengwa?

Ivyo Baibolo likuyowoya

Enya. Musi umu muli fundo za vinjeru za mu Baibolo izo zawovwira ŵanalume na ŵanakazi ŵanandi chomene kuti ŵaweso ŵakukondwa mu nthengwa zawo:

  1. Lembeskani nthengwa yinu. Para nthengwa yinu mwalembeska mukugomezgana ndipo mukuŵa ŵakukondwa.—Mateyu 19:4-6.

  2. Mutemwanenge na kuchindikana. Ivyo mungatemwa kuti munyinu wamuchitirani ndivyo namwe mukwenera kumuchitira.—Mateyu 7:12; Ŵaefeso 5:25, 33.

  3. Gegani mazgu ghakulasa. Mukwenera kuyowoya mwalusungu, nanga ni apo mfumu panji muwoli winu wayowoya panji wachita chinthu icho chamukwenyerezgani. (Ŵaefeso 4:31, 32) Pa Zintharika 15:1, Baibolo likuti: “Zgoro lakuzika likuwezga ukali, kweni mazgu ghakukalipa ghakwambiska mbembe.”

  4. Ŵani ŵakugomezgeka kwa munyinu. Mukwenera kugonana na mwanalume panji mwanakazi winu pera, ndipo kudokerana na ŵanyake yayi. (Mateyu 5:28) Baibolo likuti: “Nthengwa yiŵenge yakuchindikika na ŵanthu wose, ndipo pakugona paŵenge pambura kufipirwa.”—Ŵahebere 13:4.

  5. Sambizgani ŵana ŵinu mwachitemwa. Gegani kuleremeka ŵana kweniso kuŵalanga mwaukali.—Zintharika 29:15; Ŵakolose 3:21.