Zintharika 29:1-27
29 Munthu uyo wakunonopeska singo yake* para wachenyeka kanandi waka+Waphyokenge mwamabuchi mwakuti wangachiraso yayi.+
2 Para ŵarunji mbanandi, ŵanthu ŵakusekelera,Kweni para ŵaheni ŵakuwusa, ŵanthu ŵakulagha.+
3 Munthu uyo wakutemwa vinjeru wakukondweska awiske,+Kweni uyo wakwendezgana na mahule wakusakaza vyuma vyake.+
4 Themba likukhozga charu na urunji,+Kweni munthu uyo wakukhumba vimbundi wakuchiwiska.
5 Munthu uyo wakumyamyatika mzengezgani wakeWakuthyera malundi ghake ukonde.+
6 Ubudi wa munthu muheni ukumuthya,+Kweni murunji wakuchemerezga mwachimwemwe na kusekelera.+
7 Murunji wakughanaghanira wanangwa wa ŵakavu,+Kweni muheni walije navyo ntchito.+
8 Ŵanthu ŵakujithumbwa ŵakotcha msumba,+Kweni awo mbavinjeru, ŵakuwezga ukali.+
9 Para munthu wavinjeru wakususkana na chindere,Pakuŵa kuparantha na kugoska, kweni pakuŵavya kukhorwa.+
10 Ŵanthu awo ŵali na nyota ya kuthiska ndopa ŵakutinkha yose uyo ngwambura kafukwa,+Ndipo ŵakukhumba kutora umoyo wa ŵakunyoloka.*
11 Munthu muzeleza wakufumiska ukali* wake wose,+Kweni wavinjeru wakuwuwezga.+
12 Para muwusi wakupulikira mautesi,Ŵateŵeti ŵake wose ŵaŵenge ŵaheni.+
13 Munthu mukavu na wakuyuzga ŵakuyana* pa ichi:
Yehova wakupeleka ungweru ku maso gha wose ŵaŵiri.*
14 Para themba likweruzga ŵakavu mwakunyoloka,+Chitengo chake chikhozgekenge nyengo zose.+
15 Luswazu* na ntchenyo vikupa vinjeru,+Kweni mwana uyo ŵakumulekelera* wakulengeska anyina.
16 Para ŵaheni ŵandana, kuswa malango nako kukwandana,Kweni ŵarunji ŵawonenge ŵaheni para ŵakuwa.+
17 Langa mwana wako ndipo wakupumuzgenge.Wakukondweskenge chomene.*+
18 Apo palije mboniwoni,* ŵanthu ŵakujichitira bweka vinthu,+Kweni mbakukondwa awo ŵakusunga dango.+
19 Muteŵeti wakuchenyeka na mazgu pera chara,Pakuti nanga wakupulikiska, kweni wakupulikira yayi.+
20 Kasi wamuwona munthu uyo wakuchimbilira kuyowoya?+
Muzeleza wali na chigomezgo chikuru kuluska iyo.+
21 Usange munthu waleremeka muteŵeti wake kufuma pa uwukirano,Pamanyuma waŵenge wambura kuwonga.
22 Munthu uyo wakutemwa kukalipa wakuwuska mbembe.+Yose uyo wakutemwa kukwiya wakubuda vinthu vinandi.+
23 Kujikuzga kwa munthu kumukhizgenge,+Kweni uyo ngwakujiyuyura mu mzimu wasangenge uchindami.+
24 Uyo wakwenda na munkhungu wakujitinkha.*
Wangapulika ntchemo yakuti wakapanikizgire,* kweni wakukhalapo waka chete.+
25 Kopa ŵanthu ntchipingo,+Kweni uyo wakuthemba Yehova waŵenge wakuvikilirika.+
26 Ŵanthu ŵanandi ŵakukhumba kudumbiskana na* muwusi,Kweni kwa Yehova ndiko munthu wakusanga urunji.+
27 Munthu wambura urunji mbukazuzi kwa murunji,+Kweni uyo mendero ghake ngakunyoloka mbunyankhasi kwa muheni.+
Mazgu Ghamusi
^ Panji kuti, “wakuchita mtafu.”
^ Pangayowoyekaso kuti, “Kweni ŵarunji ŵakukhumba kuvikilira umoyo wake.”
^ Mazgu gheneko, “mzimu.”
^ Mazgu gheneko, “ŵakukumana.”
^ Ndiko kuti, wakuŵapa umoyo.
^ Panji kuti, “Chilango.”
^ Mazgu ghanyake, “ŵakumuleremeka.”
^ Panji kuti, “Wakondweskenge umoyo wako.”
^ Panji kuti, “uchimi; uvumbuzi.”
^ Panji kuti, “wakutinkha umoyo wake.”
^ Panji kuti, “chilapo cha nthembo.”
^ Pangayowoyekaso kuti, “kutemweka na.” Mazgu gheneko, “ŵakupenja chisko cha.”
