“Alefa na Omega” ni zina linyake la Yehova Chiuta, Wankhongonozose. Zina ili likusangika mu Baibolo pa malo ghatatu.—Chivumbuzi 1:8; 21:6; 22:13. a

 Pa alifabeti Yachigiriki, alefa ntchilembo chakwamba ndipo omega ntchilembo chaumaliro. Zina lakuti Alefa na Omega likusangika mu buku la Chivumbuzi mu Testamenti Lasono ilo likalembeka mu Chigiriki. Pakuti alefa ntchilembo chakwamba pa alifabeti ya Chigiriki ndipo omega ntchilembo chaumaliro, vikulongora kuti Yehova pera ndiyo ngwakwamba kweniso waumaliro. (Chivumbuzi 21:6) Iyo ni Chiuta Wankhongonozose kwamba kale chomene, ndipo walutilirenge kuŵa Wankhongonozose kwamuyirayira. Ndiyo yekha “kufuma muyirayira m’paka muyirayira.”—Salimo 90:2.

 Para Baibolo likuyowoya kuti “wakwamba na waumaliro,” likuyowoya vya Yehova Chiuta kweniso Mwana wake, Yesu. Ndipouli mazgu agha ghali na mang’anamuro ghakupambana. Wonani viyelezgero viŵiri ivi.

•   Pa Yesaya 44:6, Yehova wakuti: “Ndine wakwamba na waumaliro. Palije Chiuta munyake, kweni ine pera.” Lemba ili likulongora kuti Yehova pera ndiyo ni Chiuta waunenesko muyirayira, ndipo padera pa iyo palijeso munyake. (Dotoronome 4: 35, 39) Pa lemba ili, ivyo mazgu ghakuti “wakwamba na waumaliro” ghakung’anamura vikuyana waka na “Alefa na Omega.”

•   Mazgu agho ghali pa Chivumbuzi 1:17, 18 na 2:8 ghakuti “wakwamba [pro’tos, ghakung’anamura Alefa yayi] na ghakuti waumaliro [e’skha·tos, ghakung’anamura omega yayi].” Nkhani yose mu mavesi agha, yikuyowoya za munthu uyo wakafwa ndipo paumaliro wakawuskika. Ntheura mavesi agha ghakuyowoya vya Chiuta yayi chifukwa Chiuta wandafwepo. (Habakuku 1:12) Kweni Yesu ndiyo wakafwa na kuwuskika. (Milimo 3:13-15) Wakaŵa munthu wakwamba kuwuskika na kupika umoyo wambura kufwa kuchanya, ndipo ndiko wakhalenge “muyirayira swii.” (Chivumbuzi 1:18; Ŵakolose 1:18) Yesu ndiyo walikupika mazaza ghakuwuska ŵakufwa. (Yohane 6:40, 44) Yesu wakaŵaso munthu waumaliro kuwuskika mwakudunjika na Yehova. (Milimo 10:40) Lekani Yesu ngwakweneIera nadi kuchemeka kuti “wakwamba na waumaliro.”

 Yayi. Uyo wakayowoya mazgu gha pa Chivumbuzi 22:13 wandazunulike, ndipo mu chaputara ichi muli ŵanthu ŵanandi awo ŵakuyowoya kweni ŵandazunulike mazina ghawo. Pakuyowoya za Chivumbuzi chaputara 22, Professor William Barclay wakati: “Nkhani iyi yindalembeke mu ndondomeko yake; . . . So ntchakusuzga chomene kumanya uyo wakayowoya mazgu agha.” (The Revelation of John, Volume 2, Revised Edition, peji 223) Ntheura zina lakuti “Alefa na Omega” ilo lili pa Chivumbuzi 22:13 likwimira Yehova Chiuta nga umo viliri na mavesi ghanyake agho ghakuzunura zina ili mu buku la Chivumbuzi.