Kasi Chiuta Wali na Mazina Ghalinga?

JULANI

Ivyo Baibolo likuyowoya

Chiuta wali na zina leneko limoza pera. Mu Chihebere likulembeka kuti יהוה ndipo kanandi mu Chitumbuka likung’anamulika kuti “Yehova”. a Kwizira mwa ntchimi yake Yesaya, Chiuta wakati: “Ine ndine Yehova. Ili ndilo zina lane.” (Yesaya 42:8) Zina ili likusangika maulendo 7,000 mu mipukutu yakale ya Baibolo, ndipo ndilo likusangika maulendo ghanandi chomene kuluska zina linyake lililose la Chiuta, panji zina lililose la munthu. b

Kasi Chiuta waliso na mazina ghanyake?

Nangauli Baibolo likulongora kuti Chiuta wali na zina limoza pera leneko, kweni likugwiliskiraso ntchito mazina gha udindo ghanandi. Musi umu muli mazina gha udindo ghakupambanapambana gha Chiuta kweniso ivyo ghakuvumbura pa nkhani ya wunthu wake.

Zina la udindo	Lemba	Ng’anamuro
Allah	(Palije)	Lili kufuma ku Chiarabu, ndipo zina lakuti “Allah” ni zina la munthu yayi kweni ni zina la udindo ilo likung’anamura “Chiuta.” Mabaibolo gha mu Chiarabu na viyowoyero vinyake ghakugwiliskira ntchito zina lakuti “Allah” kung’anamura “Chiuta.”
Wankhongonozose	Genizesi 17:1	Wali na nkhongono zambura mphaka. Zina la Chihebere lakuti ʼEl Shad·daiʹ, “Chiuta Wankhongonozose,” likusangika maulendo 7 mu Baibolo.
Alefa na Omega	Chivumbuzi 1:8; 21:6; 22:13	“Wakwamba na waumaliro,” panji kuti “jando na umaliro,” kung’anamura kuti kukaŵavya Chiuta Wankhongonozose padera pa Yehova ndipo kuzamuŵavya munyake wakuŵa nga ndiyo. (Yesaya 43:10) Alefa na Omega ni vilembo vyakwamba na vyaumaliro vya alufabeti ya Chigiriki.
Mulara Wamwaka	Daniyeli 7:9, 13, 22	Walije pakwambira; wakaŵako ni kale chomene pambere waliyose panji chinthu chinyake chilichose chindaŵeko.—Salimo 90:2.
Mlengi	Yesaya 40:28	Ndiyo wakalenga vinthu vyose.
Dada	Mateyu 6:9	Mupi wa umoyo.
Chiuta	Genizesi 1:1	Chinthu icho ntchakwenelera kusopeka; chankhongono. Lizgu la Chihebere lakuti ʼElo·himʹ likwimira vinthu vinandi, kulongora ukuru wa Yehova, ntchindi izo zikumwenelera, panji udindo wake wapachanya chomene.
Chiuta wa ŵachiuta	Dotoronome 10:17	Chiuta wapachanya chomene, kuluska “ŵachiuta ŵawakawaka” awo ŵanthu ŵanyake ŵakusopa.—Yesaya 2:8.
Msambizgi Mukuru	Yesaya 30:20, 21	Wakutisambizga fundo izo zikutovwira chomene kweniso wakutilongozga.—Yesaya 48:17, 18.
Mlengi Wauchindami	Salimo 149:2	Ndiyo wakalenga vinthu vyose.—Chivumbuzi 4:11.
Chiuta wakukondwa	1 Timote 1:11	Iyo wakusekelera na kukondwa nyengo zose.—Salimo 104:31.
Wakupulika malurombo	Salimo 65:2	Wakupulika malurombo ghose gha ŵanthu awo ŵakulomba na chipulikano.
Ndine Mweneuyo Ndine	Ekisodo 3:14, Tumbuka Bible	Wakuŵa chilichose icho wakhumba kuti wafiske khumbo lake. Mazgu agha ghali kung’anamurikaso kuti “Niŵenge icho nakhumba kuŵa” panji kuti “Niŵenge Icho Nasankha Kuŵa.” Mazgu agha ghakovwira kuti tipulikiske makora ng’anamuro la zina la Chiuta lakuti, Yehova, ilo likusangika mu vesi lakulondezgapo.—Ekisodo 3:15.
Wasanji	Ekisodo 34:14, Tumbuka Bible	Wakukhumba yayi kuti ŵanthu ŵasopengeso munyake padera pa iyo. Mazgu agha ghali kung’anamurikaso kuti “wakukhumba yayi kuti ŵanthu ŵasopenge chiuta munyake” na “wakukhumba kuti ŵanthu ŵasopenge iyo pera.”
Themba lamuyirayira	Chivumbuzi 15:3	Muwuso wake ulije pakwambira nesi umaliro.
Fumu	Salimo 135:5	Mwenecho panji kuti fumu; mu Chihebere ʼA·dhohnʹ na ʼAdho·nimʹ.
Yehova wa mipingo, Fumu ya Maŵanja	Yesaya 1:9, Tumbuka Bible; Ŵaroma 9:29, Tumbuka Bible	Ndiyo wakulongozga magulu ghakupambanapambana gha ŵangelo. Zina lakuti “Fumu ya Maŵanja” lingalembekaso kuti “Yehova wa mawumba” panji kuti “Yehova wa mawumba [ghakuchanya].”—Ŵaroma 9:29, Mang’anamuliro gha Charu Chiphya.
Wapachanya Nkhanira	Salimo 47:2	Ngwapachanya chomene.
Mutuŵa Chomene	Zintharika 9:10	Ni mutuŵa chomene (mu makhaliro ghake ghose) kuluska waliyose.
Muwuvi	Yesaya 64:8	Wali na mazaza pa ŵanthu wose na mitundu, nga umo muwuvi wakuŵira na mazaza pa dongo.—Ŵaroma 9:20, 21.
Muwomboli	Yesaya 41:14; Tumbuka Bible	Ndiyo wali kuwombora panji kuti kugura ŵanthu ku kwananga na nyifwa kwizira mu sembe ya Yesu Khristu.—Yohane 3:16.
Jalawe	Salimo 18:2, 46	Chigongwe chakukhora kweniso chiponosko chithu.
Mponoski	Yesaya 45:21	Wakutiponoska ku vinthu vyakofya panji ivyo vingatipweteka.
Muliska	Salimo 23:1	Wakupwelelera ŵateŵeti ŵake.
Fumu Yikuru	Genizesi 15:2	Wali na mazaza ghakuru chomene; mu Chihebere ʼAdho·naiʹ.
Wapachanya Nkhanira	Daniyeli 7:18, 27	Ngwapachanya chomene.

Mazina gha malo mu Malemba Ghachihebere

Mazina ghanyake gha malo mu Baibolo ghali na zina la Chiuta mukati mwake, kweni vikung’anamura kuti ni mazina ghanyake gha Chiuta yayi.

Zina la malo	Lemba	Ng’anamuro
Yehova-yire	Genizesi 22:13, 14	“Yehova Wapelekenge.”
Yehova-nisi	Ekisodo 17:15	“Yehova ndi Ndembera yane,” panji “Chimanyikwiro chane.” (Tumbuka Bible) Yehova ni Chiuta uyo ŵanthu ŵake ŵangamuthemba kuti waŵavikilire na kuŵawovwira.—Ekisodo 17:13-16.
Yehova-shalomu	Ŵeruzgi 6:23, 24	“Yehova Ni Mtende.”
Yehova-shamma	Ezekiyeli 48:35, American Standard Version	“Yehova Wali Kwenekuko.”

Vifukwa ivyo tikwenera kumanya na kugwiliskira ntchito zina la Chiuta

Chiuta wakuwona kuti zina lake lakuti, Yehova, ndakuzirwa chomene, chifukwa wali kuliŵika mu malo masauzandi ghanandi mu Baibolo.—Malaki 1:11.
Mwana wa Chiuta, Yesu, wakayowoyanga mwakuwerezgawerezga kuzirwa kwa zina la Chiuta. Mwachiyelezgero, wakalomba kwa Yehova kuti: “Zina linu lituŵiskike.”—Mateyu 6:9; Yohane 17:6.
Awo ŵamanya na kwamba kugwiliskira ntchito zina la Chiuta, ŵakwamba kuchitapo kanthu kuti ŵaŵe nayo paubwezi. (Salimo 9:10; Malaki 3:16) Ubwezi uwu ukuŵawovwira kuti nawo ŵasange chandulo na layizgo la Chiuta lakuti: “Chifukwa chakuti wakunitemwa, nimuthaskenge. Nimuvikilirenge chifukwa wakumanya zina lane.”—Salimo 91:14.
Baibolo likuti: “Kuli awo ŵakuchemeka ŵachiuta, kwali nkhuchanya panji pa charu chapasi, nga umo kuliri ‘ŵachiuta’ ŵanandi na ‘mafumu’ ghanandi.” (1 Ŵakorinte 8:5, 6) Lekani Baibolo likutiphalira za Chiuta yumoza waunenesko, uyo zina lake ni Yehova.—Salimo 83:18.

a Ŵanthu ŵanyake awo ŵakufufuza Malemba Ghachihebere ŵakutemwa kugwiliskira ntchito zina lakuti “Yahweh” para ŵakuyowoya vya zina la Chiuta.

b Zina lakudumura la Chiuta, “Ya,” likusangika maulendo pafupifupi 50 mu Baibolo, kusazgapo mazgu ghanyake nga ghakuti “Haleluya,” panji kuti “Aleluya,” agho ghakung’anamura kuti “Lumbani Ya.”—Chivumbuzi 19:1.