Ku Thwasa KA Ntlawa Wa Vu-130 Wa Le Giliyadi

Siku Leri Tsakisaka Ro Kuma Swiavelo Leswintshwa

HANDLE ko kanakana, ku thwasa ka ntlawa wa vu-130 wa mathwasana ya Xikolo xa Bibele xa Giliyadi xa Watchtower ku endle leswaku ma kuma swiavelo swa wona leswintshwa. Hi Mugqivela wa March 12, 2011, vayingiseri lava tlulaka 8 500 va hlengeletanile leswaku va ta vona ku thwasa ka swichudeni, ku katsa ni mindyangu ya swona ni vanghana. Ntsako a wu ri wukulu—ku nga ri wa siku rero ntsena kambe ni wa vumundzuku bya varhumiwa lava leteriweke kahle, lava a va ta rhumeriwa emisaveni hinkwayo leswaku va ya dyondzisa vanhu ntiyiso wa Bibele.

‘Va Tsaka Hinkwavo Lava Tshamaka Va Langutele’ Yehovha

Marito wolawo lama chavelelaka lama kumekaka eka Esaya 30:18, a ku ri nhloko-mhaka ya nkulumo leyi nyikeriweke hi Geoffrey Jackson, xirho xa Huvo leyi Fumaka ya Timbhoni ta Yehovha tlhelo mutshama-xitulu wa nongonoko. Hi xichavo ni hi misavu, u bumabumele swichudeni hileswi swi koteke ku tiyisela eka khoso leyi tikaka ya xikolo xa Giliyadi ni ku swi tiyisekisa leswaku hakunene siku leri a swi ri langutele hi mahlo-ngati ri fikile. Hi kwihi ku langutela ka xiviri loku swichudeni leswi swi nga na kona hi vumundzuku? U tlhuvutse tinhla tinharhu ta nkoka leti nga eka Esaya 30:18-21.

Eka yinhla yo sungula, Makwerhu Jackson u te: “Mi nga langutela leswaku Yehovha u ta yingisa swikhongelo swa n’wina.” U kombetele eka xitiyisekiso lexi kumekaka eka ndzimana 19 leyi nge: ‘Xikwembu xi ta ku komba tintswalo loko xi twa xirilo xa wena.’ Loko a xiya marito lama nga eka Xiheveru xo sungula, risivi “wena” eka xivulwa lexi, ri le ka vun’we, ku nga ri eka vunyingi, Makwerhu Jackson u vule leswaku Yehovha u hlamula swikhongelo swa hina ha un’we-un’we. “Tanihi Tatana, Yehovha a nga vutisi a ku, ‘Ha yini u nga tiyi ku fana ni munhu un’wana?’ Ematshan’weni ya sweswo, u rhiya ndleve eka un’wana ni un’wana wa hina. Naswona wa hi hlamula.”

Eka ya vumbirhi, Makwerhu Jackson u vule leswaku hi nga langutela ku langutana ni swiphiqo. U te: “Yehovha a nga hi tshembisi leswaku vutomi byi ta olova, kambe u hi tshembisa leswaku u ta hi pfuna.” Hilaha ndzimana 20 yi kombisaka hakona, Xikwembu xi profete leswaku loko Vaisrayele va hlaseriwa, maxangu ni ntshikilelo a swi ta va tshamelo-maxelo. Hambiswiritano, minkarhi hinkwayo Yehovha a tshama a swi lunghekerile ku ponisa vanhu vakwe. Hilaha ku fanaka, swichudeni swa xikolo xa Giliyadi na swona swi ta langutana ni swiphiqo ni mintlhontlho hambi ku nga ri swona leswi a swi ehleketa leswaku swi ta langutana na swona. Makwerhu Jackson u engetele a ku: “Kambe mi nga langutela leswaku Yehovha u ta va na n’wina leswaku a mi pfuna ku langutana ni xiphiqo xin’wana ni xin’wana.”

Eka ya vunharhu, Makwerhu Jackson u tsundzuxe swichudeni hilaha ndzimana 20 na 21 ti kombisaka hakona, “mi nga langutela nkongomiso—kutani wu lavisiseni!” U vule leswaku namuntlha Mukreste un’wana ni un’wana u fanele a rhiya ndleve loko Yehovha a vulavula na yena hi ku tirhisa Bibele ni minkandziyiso leyi sekeriweke eka yona. U khutaze swichudeni leswaku swi hambeta swi tinyiketela eku hlayeni ka Bibele ka siku ni siku, hikuva swi vula vutomi.

“Ku Chava Yehovha A Ku Ve Ehenhla Ka N’wina”

Anthony Morris la nga xirho xa Huvo leyi Fumaka u nyikele nhlamuselo ya xiga lexi nga eMatsalweni lexi nge: “Ku chava Yehovha.” (2 Tikronika 19:7) Marito wolawo a ma nga kombeteli eka ku chava loku rhurhumerisaka, kambe a ma kombetela eka ku navela ku endla leswinene, xichavo lexi enteke ni ku tiyimisela hi mbilu hinkwayo leswi nga endlaka leswaku munhu a khomiwa hi rhumbyana. Makwerhu Morris u khutaze swichudeni leswaku swi ya eswiavelweni swa swona swa vurhumiwa swi ri ni ku chava koloko. Xana swi nga ku kombisa  njhani ku chava koloko eka Yehovha? U dzike eka tinhla timbirhi ta nkoka.

Eka yinhla yo sungula, Makwerhu Morris u khutaze swichudeni leswaku swi tirhisa ndzayo leyi kumekaka eka Yakobo 1:19 leyi nge: “Hatlisa emhakeni yo twa, [u] nonoka emhakeni yo vulavula.” U vule leswaku swichudeni swi dyondze swo tala eka khoso leyi tekaka tin’hweti ta ntlhanu kambe swi fanele swi va ni vuxiyaxiya bya leswaku loko swi ya eswiavelweni swa swona a swi fanelanga swi tibuma hi dyondzo leyi swi yi kumeke. U te: “Mi fanele mi yingisa ku sungula. Yingisani eka mavandlha ya laha mi tshamaka kona naswona mi yingisa lava rhangelaka eka tiko leri mi averiweke eka rona; yingisani leswi va swi vulaka malunghana ni tiko ni ndhavuko. Mi nga kanakani ku vula mi ku: ‘A hi swi tivi.’ Loko mi vuyeriwile eka dyondzo leyi mi yi kumeke, loko mi ya mi dyondza swo tala, mi ta swi xiya leswaku ku ni switsongo leswi mi swi tivaka.”

Eka ya vumbirhi, Makwerhu Morris u hlaye Swivuriso 27:21 leyi nge: “Mbita ya ku tengisa i ya silivhere, ni khele ra ndzilo i ra nsuku; naswona munhu u fambisana ni ku dzunisa kakwe.” U hlamusele leswaku tanihi leswi nsuku ni silivhere swi lavaka ku tengisiwa, na hina hi nga tengisiwa hikwalaho ko dzunisiwa. Njhani? Loko vanhu va hi dzunisa swi nga ha endla leswaku hi ringeka. Swi nga endla leswaku hi mila makatla hi tlhela hi lahlekeriwa hi vuxaka bya hina na Yehovha kumbe swi hi pfuna leswaku hi swi xiya leswaku hi kolota Yehovha kutani hi tiyimisela ku namarhela milawu yakwe. Xisweswo, Makwerhu Morris u khutaze swichudeni leswaku loko vanhu va swi dzunisa swi ku teka hi ndlela leyinene—tanihi nkarhi wo kombisa leswaku swi “chava Yehovha.”

“Sirhelelani Vurhumiwa Bya N’wina”

Guy Pierce, la nga xirho xa Huvo leyi Fumaka, u nyikele nkulumo-nkulu ya nongonoko. U vulavule hi nhloko-mhaka leyi nga laha henhla, a hlamusela leswaku rito “murhumiwa” ri vula “munhu la rhumiweke ku ya endla ntirho.” A swi hlamarisi leswi a vuleke leswaku tinhlengeletano to tala ti rhumela varhumiwa vo tala eka mintirho yo hambana-hambana. Vo tala va varhumiwa volavo va dzike eka ku horisa mavabyi ni ku lava mintlhantlho ya swiphiqo swa tipolitiki ta misava. U te: “N’wina mi hambanile na vona.” Njhani?

Eka ku hlaya ka swona ka Bibele, swichudeni swi dyondze swo tala malunghana ni ku horisiwa ka mavabyi. Loko Yesu a pfuxa xinhwanyatana, vatswari va xona a va “nga ha tikoti hi ku tsaka lokukulu.” (Marka 5:42) Hilaha ku fanaka, loko vanhu lava nga voniki va horisiwile hi singita, a va nga tikoti hi ku tsaka. Xin’wana xa swivangelo swa masingita wolawo i ku kombisa hina namuntlha leswi Kreste a nga ta swi hetisisa emisaveni leyintshwa leyi taka, leyi eka yona “ntshungu lowukulu” wa vanhu vo lulama lowu nga ta pona ku herisiwa ka mafambiselo lawa yo biha ya swilo wu nga ta horisiwa eka mavabyi ya mixaka hinkwayo. (Nhlavutelo 7:9, 14) Varhandziwa va vona, lava nga ta va amukela loko va pfuxiwa, na vona va ta va va nga ha vabyi. Mawaku ntsako wonghasi!

Hambiswiritano, hilaha Makwerhu Pierce a hlamuseleke hakona, mhaka yo horisa mavabyi a yi nge he vi ya nkoka ematin’wini. Vanhu lava Yesu a va tshunguleke, va tlhele va vabya. Vanhu lava a va pfuxeke va tlhele va fa. Hambi ku ri munhu loyi a fe mahlo loyi a n’wi tshunguleke u tlhele a fa mahlo loko a fa. Xa nkoka swinene lexi Yesu a xi hetisiseke a ku ri ku horisa hi tlhelo ra moya. Varhumiwa lava humaka eGiliyadi na vona va ni ntirho wo horisa hi tlhelo ra moya. Va pfuna vanhu leswaku va vuyelelana ni Tata wa hina wa le matilweni leswaku va va vanhu va moya. Lava nga ta fikelela xikongomelo xa vutomi lebyi nga heriki hi lava va horisiweke hi tlhelo ra moya ntsena. Makwerhu Pierce u te: “Ku horisiwa hi tlhelo ra moya hi swona leswi dzunisaka Xikwembu. Swi endla leswaku swi mi fambela kahle evutirhelini bya n’wina bya nsimu.”

Tinhla-nkulu Tin’wana Tinharhu Ta Siku

“Leri Ku Ta Va Siku Lerinene?” Robert Rains la nga xirho xa Komiti ya Rhavi ya le United States u vutise xivutiso xexo lexi fikeke hi nkarhi. U khutaze swichudeni leswaku siku ni siku swi tiyiseka leswaku i siku lerinene hikuva swi tirhisa nkarhi wa swona hi vutlhari entirhweni wa swona wa vurhumiwa, swi tirhisa Rito ra Xikwembu loko swi langutana ni maxangu ni ku tshembela eka Yehovha hi xikhongelo.

“Xana Mi Nga Endla Leswaku Xileriso Xa Khale Xi Va Lexintshwa?” Muleteri wa xikolo xa Giliyadi, Mark Noumair u vutise xivutiso xexo enkulumeni yakwe. U hlamusele 1 Yohane 2:7, 8, leyi eka yona  muapostola Yohane a vuleke “xileriso xa khale” lexi nakambe ku nga “xileriso lexintshwa.” Haswimbirhi swi kombetela eka nawu wun’we—lowu eka wona valandzeri va Kreste va rhandzanaka handle ka vutianakanyi, hi moya wa ku tinyiketela. (Yohane 13:34, 35) Nawu wolowo a wu ri wa khale kambe valandzeri va Yesu va tlhele va nyikiwa wona eka makume ya malembe lama hundzeke hi Kreste hi byakwe; nakambe a wu ri wuntshwa hikuva Vakreste a va langutana ni swiphiqo leswintshwa naswona a va fanele va kombisa rirhandzu hi tindlela letintshwa naswona hilaha ku heleleke. Hilaha ku fanaka, varhumiwa va langutana ni swiphiqo swo tala naswona va fanele va dyondza ku kombisa rirhandzu hi tindlela letintshwa. Xana hi wihi nkoka wa ku endla tano?

Makwerhu Noumair u khutaze swichudeni a ku: “Mi nga pfuki mi endle swilo leswi mi swi vengaka.” U swi lemukise leswaku loko swi vona mahanyelo yo karhi lawa swi ma vengaka ivi swi ma tekelela, swi ta va swi ri karhi swi endla swilo leswi swi swi vengaka, ku nga ku tionha mahanyelo. Hi hala tlhelo, loko hi hlula swiphiqo sweswo hi ku kuma tindlela letintshwa to kombisa rirhandzu, hi ta va hi voninga tanihi “rivoni ra ntiyiso” naswona hi ta herisa munyama wa moya.

“Dzenengelani Ndzhwalo.” Muleteri un’wana wa xikolo xa Giliyadi, Michael Burnett, u tlhuvutse nhloko-mhaka leyi. U vulavule hi vanhu va le matikweni ya Afrika lava dzenengelaka mindzhwalo yo tika etinhlokweni ta vona. Va tirhisa harhi, ku nga lapi leri tsondzeriwaka kutani va ri veka ehenhla ka nhloko leswaku va nga gogonyiwi nileswaku ndzhwalo wu nga wi, sweswo swi endla leswaku va kota ku famba kahle. Varhumiwa lava humaka eGiliyadi va ta byarha vutihlamuleri lebyikulu eswiavelweni swa vona swa le matikweni-mambe, kambe va nyikiwe nchumu wo karhi lowu nga fanisiwaka ni harhi: ndzetelo lowukulu lowu sekeriweke eBibeleni. Loko va tirhisa leswi va swi dyondzeke, va ta kota ku dzenengela ndzhwalo wa vona.

Mintokoto Ni Mimbulavurisano

Xikolo xa ndzetelo xa Giliyadi xi katsa nkarhi lowu swichudeni swi wu hetaka evutirhelini bya nsimu ni le mavandlheni ya kwalaho ya Timbhoni ta Yehovha. William Samuelson, la nga mulanguteri wa Ndzawulo ya Swikolo swa Vutirheli bya le Tilweni, u hlamusele yin’wana ya mintokoto ya swichudeni eka nkulumo yakwe leyi nge: “U Nga Ri Wisisi Voko Ra Wena.” (Eklesiasta 11:6) Hi ku tirhisa minkombiso ya leswi endlekeke, swichudeni swi kombise ndlela leyi a swi hiseka ha yona ensin’wini, ku kuma nkarhi wo chumayela mahungu lamanene ya mfumo eka swihaha-mpfhuka, etirhesiturente ni laha ku cheriwaka kona petirolo. Swi chumayele hi yindlu ni yindlu, hi xitshuketa ni hi ku tirhisa papila. Hakunene a swi ma wisisanga mavoko ya swona naswona sweswo swi ve ni vuyelo lebyinene.

Kenneth Stovall, la nga mudyondzisi wa xikolo xa Giliyadi, u vulavurisane ni vavanuna vanharhu hi mintokoto yo tala ya varhumiwa—Barry Hill loyi a tirhaka aEcuador na le Dominican Republic, Eddie Mobley la tirhaka eCôte d’Ivoire na Tab Honsberger la tirhaka eSenegal, Benin na le Haiti. Hinkwavo va vulavule hi nhloko-mhaka leyi nge: “Ringani Yehovha Kutani U Ta Mi Chululela Mikateko.” (Malakiya 3:10) Hi xikombiso, Makwerhu Hill u hlamusela ndlela leyi yena ni nghamu yakwe va langutaneke ni swiphiqo ha yona, ku va va kote ku tiyisela maxelo ya le Ecuador lawa ma hisaka ma tlhela ma va ni ritshuri swin’we ni ndzhope. U vule leswaku ku ringana malembe mambirhi ni hafu a va tirhisa mabakiti loko va hlamba. Kambe a va nga ehleketi ku famba; a va vona onge xiavelo xa vona a ku ri nkateko lowu humaka eka Yehovha. U ri: “Xiavelo lexi a ku ri xa nkoka evuton’wini bya hina.”

Loko nongonoko wu hela, xin’wana xa swichudeni xi hlaye papila leri khumbaka mbilu leri humaka eka swichudeni leswi thwaseke, swi kombisa ndlela yo nkhensa xikolo lexi swi veke na xona. Papila ra kona ri hlayekisa xileswi: “Ripfumelo ra hina ri tiyisiwile naswona hi ta tirha hi matimba exiavelweni xa hina.” Swichudeni hinkwaswo swi kume tidiploma ta swona naswona swi averiwe ku ya ematikweni yo hambana-hambana. Makwerhu Jackson u gimete nongonoko hi ku tiyisekisa swichudeni leswaku swi nga langutela ku vona mpfuno wa Yehovha evuton’wini bya swona, ngopfu-ngopfu loko swi langutana ni swiphiqo. Hinkwavo lava a va ri kona va sale va tsakile. Swi le rivaleni leswaku Yehovha u ta tirhisa varhumiwa lava lavantshwa leswaku va hetisisa ntirho.

 [Chati/Mepe lowu nga eka tluka 31]

TINHLAYO TA NTLAWA

9 matiko lama yimeriweke

34,0 xiringaniso xa malembe

18,6 xiringaniso xa malembe va khuvuriwile

13,1 xiringaniso xa malembe evutirhelini bya nkarhi hinkwawo

[Mepe]

(Leswaku u vona rungula leri hleriweke hi ku helela, vona nkandziyiso wa kona)

Swichudeni swi averiwe ematikweni lama kombisiweke laha hansi

SWIAVELO SWA VARHUMIWA

ARGENTINA

ARMENIA

BURKINA FASO

BURUNDI

CONGO (KINSHASA)

CZECH REPUBLIC

HAITI

HONG KONG

INDONESIA

KENYA

LITHUANIA

MALAYSIA

MOZAMBIQUE

NEPAL

PAPUA NEW GUINEA

ROMANIA

SENEGAL

TANZANIA

UGANDA

ZIMBABWE

[Xifaniso lexi nga eka tluka 31]

Ntlawa Wa Vu-130 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Molina, Z.; Bassolino, S.; Alatsis, C.; Arroyo, A.; Niño, L.; Merkling, S.; Clark, M.

(2) Little, C.; Tibaudo, S.; Jakobsson, S.; Moreno, J.; Rodriguez, A.; Lee, K.; Cárdenas, H.; Aguilar, L.

(3) Clairbush, A.; Polley, A.; Caldwell, S.; Adame, J.; Hildebrandt, S.; Shoemaker, I.; Grohman, N.; Galvez, G.

(4) Clark, J.; Bassolino, A.; Packham, K.; Adame, J.; Knaus, M.; Niño, M.; Moreno, R.; Galvez, J.

(5) Rodriguez, D.; Geynes, M.; Molina, J.; Aguilar, A.; Alatsis, I.; Manno, A.; Grohman, R.; Packham, J.

(6) Geynes, S.; Cárdenas, M.; Arroyo, C.; Manno, C.; Merkling, J.; Lee, H.; Clairbush, X.; Jakobsson, P.

(7) Little, J.; Hildebrandt, B.; Shoemaker, M.; Knaus, K.; Caldwell, J.; Tibaudo, F.; Polley, C.