Nghena endzeni

Hundzela eka leswi nga endzeni

Xana Mupapa “I Mutlhandlami Wa Mukwetsimi Petro”?

Xana Mupapa “I Mutlhandlami Wa Mukwetsimi Petro”?

 Xana Mupapa “I Mutlhandlami Wa Mukwetsimi Petro”?

HI 2002, Mupapa John Paul wa Vumbirhi u tsalele bixopo wa le Limburg, le Jarimani papila, a endla swiboho leswi nga fanelangiki hi bixopo malunghana ni ku susa khwiri. Mupapa u sungule nkongomiso wakwe hi ku vula leswaku u ni vutihlamuleri eka “vuhlayiseki bya vanhu ni vun’we bya vanhu hinkwavo va tikereke malunghana ni ku rhandza ka Yesu Kreste.” U kombele valawuri leswaku va yingisa xiboho xa bixopo tanihi leswi yena a nga mupapa, u vule leswaku hi yena “mutlhandlami wa Mukwetsimi Petro.”

Hi ku ya hi nhlamuselo ya Kereke ya Rhoma Khatoliki, “Kreste u hlawule Mukwetsimi Petro leswaku a va murhangeri wa vaapostola hinkwavo.” Kereke ya Khatoliki yi tiyisekisa leswaku “Kreste u vule leswaku Petro u fanele a rhangela hilaha ku nga heriki naswona vabixopo va Marhoma hi vona va tekeke ntirho wakwe endzhaku ka loko a file.”—New Catholic Encyclopedia (2003), Vholumo 11, matluka 495-496.

Marito wolawo a va ma teka ma ri ya nkoka. Xana u tshame u kambisisa ntikelo wa leswi va swi vuleke? Xiya tinhlamulo ta swivutiso leswi swinharhu: (1) Xana Bibele ya swi seketela leswaku Petro hi yena mupapa wo sungula? (2) Xana matimu ma hi dyondzisa yini malunghana ni laha vapapa va sunguleke kona ku tlhandlamana? (3) Xana mahanyelo ni tidyondzo ta vapapa swi seketela leswi va swi vulaka leswaku i vatlhandlami va Petro?

Xana Petro A Ri Mupapa Wo Sungula?

Ku tiyisekisa leswaku kereke yi sunguriwe hi Petro, Makhatoliki ma kombetele eka marito ya Yesu lama nga eka Matewu 16:18 leyi nge: “Hi wena Petro, naswona eribyeni leri lerikulu ndzi ta aka vandlha ra mina.” Entiyisweni, marito wolawo ma tsariwe hi Xilatini ehenhla ka ndhawu leyi vuriwaka Mukwetsimi Petro eKerekeni ya Rhoma.

Augustine, Tatana wa Kereke loyi a xiximiwa, nkarhi wun’wana u tshame a vula leswaku vandlha ri sunguriwe hi Petro. Hambiswiritano, loko a nga si fa, u cince langutelo rakwe eka leswi marito ya Yesu ma vulaka swona. Eka ntirho lowu tiviwaka tanihi Retractations, Augustine u vule leswaku Yesu hi yena a nga sungula kereke, ku nga vandlha ra Vukreste, ku nga ri Petro. *

I ntiyiso leswaku muapostola Petro u tekiwa a ri wa nkoka eka Tievhangheli. Yesu u hlanganise vaapostola vakwe vanharhu, ku nga Yohane, Yakobo na Petro, leswaku va va na yena eka swiendlakalo swo hlayanyana swa nkoka. (Marka 5:37, 38; 9:2; 14:33) Yesu u nyike Petro “xilotlelo xa mfumo wa matilo,” lexi a xi tirhiseleke ku pfula ndlela ya Mfumo—yo sungula, eka Vayuda ni le ka vanhu va matiko lava veke swirho swa vukhongeri bya Xiyuda, ya vumbirhi, eka Vasamariya naswona yo hetelela eka Vamatiko. (Matewu 16:19; Mintirho 2:5, 41; 8:14-17; 10:45) Hi ku fambisana ni vumunhu byakwe, Petro minkarhi yin’wana a a tirha tanihi muvulavuleri wa vaapostola hinkwavo. (Mintirho 1:15; 2:14) Kambe, xana leswi swi endla leswaku Petro a va nhloko ya vandlha ro sungula?

Muapostola Pawulo u tsale leswaku Petro u byarhisiwe vutihlamuleri bya ku va “muapostola wa lava va yimbeke.” (Vagalatiya 2:8) Hambiswiritano, mongo wa marito ya Pawulo ma komba leswaku a nga vuli swona leswaku Petro u kongomise vandlha. Nhlamuselo ya Pawulo a yi ri malunghana ni vutihlamuleri bya Petro byo chumayela eka Vayuda.

 Hambileswi Petro a nyikiwe vutihlamuleri lebyikulu, eBibeleni ku hava laha hi kumaka a vula leswaku i nhloko ya vandlha kutani hikwalaho ka sweswo a tekela vadyondzisiwa swiboho tanihi ntlawa. Epapileni rakwe u tivitane “muapostola” ni “nkulukumba,” a swi kona swo tlula sweswo.—1 Petro 1:1; 5:1.

Xana Matimu Ma Dyondzisa Yini Malunghana Ni Laha Vapapa Va Sunguleke Kona?

Kutani, xana mavonelo ya vapapa ma sungule rini naswona njhani? Vonelo leri a ri amukeleka eka munhu ra leswaku a lava xikhundlha eka vapfumeri-kuloni ri sungule ku dzima timitsu loko vaapostola va ha hanya. Vaapostola a va yi teka njhani mianakanyo yo tano?

Muapostola Petro u byele vavanuna lava a va rhangela evandlheni leswaku va nga “[tikiseli] lava nga ndzhaka ya Xikwembu”; a va fanele va tikhama hi mianakanyo yo titsongahata eka van’wana. (1 Petro 5:1-5) Muapostola Pawulo u lemukise leswaku evandlheni, a ku ta andza vavanuna lava “[vulavulaka] swilo leswi soholotiweke leswaku va tikokela vadyondzisiwa.” (Mintirho 20:30) Loko lembe-xidzana ro sungula C.E. ri ya eku heleni, muapostola Yohane u tsale papila leri eka rona a n’wi soleke swinene mudyondzisiwa Diyotrefo. Ha yini a n’wi holoverile? Xivangelo xin’wana hi leswaku wanuna loyi ‘a lava ku tiveka emahlweni’ evandlheni. (3 Yohane 9) Ndzayo yoleyo eka vaapostola a yi twala tanihi nawu lowu tikaka, wa lava a va navela ku va ni xikhundlha.—2 Vatesalonika 2:3-8.

Endzhakunyana ka loko vaapostola vo hetelela va file, vanhu va sungule ku lava ndhuma leyikulu. The Cambridge History of Christianity yi ri: “Swi tikomba onge a ku nga ri na munhu ni un’we loyi a a tirha tanihi ‘hosi’ eRhoma ku ya fikela exikarhi ka lembe-xidzana ra vumbirhi.” Hi lembe-xidzana ra vunharhu, bixopo wa le Rhoma u tiendle mulawuri lonkulu eswiphen’wini swa kereke. * Ku engetela eka ntikelo wa leswaku bixopo wa le Rhoma u ni vulawuri lebyikulu, van’wana va hlengelete nxaxamelo wa lava tlhandlameke Petro.

Hambiswiritano, nxaxamelo lowu a wu nyikeli swo tala eka marito lama vuriweke. Ha yini? Hikuva mavito man’wana lama nga eka nxaxamelo a ma nyikeli vumbhoni. Xa nkoka ngopfu, masungulo ya nxaxamelo lowu ma ni xihoxo. Hi ndlela yihi? Hambiloko Petro a chumayerile eRhoma, tibuku ta manguva lawa ta lembe-xidzana ro sungula ni ra vumbirhi ti kombisa leswaku a ku na vumbhoni bya leswaku a ri nhloko ya vandlha.

Vumbhoni byin’wana bya leswaku Petro a nga ri nhloko ya vandlha ra le Rhoma hileswaku loko muapostola Pawulo a tsalela Varhoma papila rakwe, u katse nxaxamelo wo tala wa Vakreste va kwalaho. Kambe a nga n’wi boxanga Petro nikatsongo. (Varhoma 16:1-23) Loko ku ri leswaku  Petro a a ri nhloko ya vandlha, xana hi nga anakanya leswaku Pawulo a a langutela Petro ebodlheleni kumbe ku n’wi tsongahata?

Nakambe, xiya leswaku hi nkarhi lowu Petro a tsaleke papila rakwe ro sungula leri huhuteriweke, Pawulo u tsale papila rakwe ra vumbirhi a ri yisa eka Timotiya. Epapileni rero, Pawulo a nga kanakananga ku boxa tiko ra Rhoma. Entiyisweni, Pawulo u tsale mapapila ya tsevu a ri eRhoma, eka hinkwawo ka wona a nga n’wi boxanga Petro.

Endzhaku ka malembe ya kwalomu ka 30 Pawulo a tsale mapapila yakwe, muapostola Yohane u tsale mapapila manharhu ni buku ya Nhlavutelo. Eka matsalwa lawa ku hava laha Yohane a nga vula leswaku vandlha ra le Rhoma a ri dume ngopfu kumbe a kombetela eka murhangeri wa kereke loyi a byarheke xikhundlha xa le henhla xa ku va mutlhandlami wa Petro. Bibele ni vumbhoni bya matimu a byi yi seketeli mhaka ya leswaku Petro u vule leswaku i bixopo wo sungula wa vandlha ra le Rhoma.

Xana Mahanyelo Ni Tidyondzo Ta Vapapa Ti Seketela Leswi Va Swi Vulaka?

Hi nga langutela leswaku munhu la vulaka leswaku i “mutlhandlami wa Mukwetsimi Petro” ni “Muyimeri wa Kreste” a landzela mahanyelo ni tidyondzo ta Petro na Kreste. Hi xikombiso, xana Petro u swi amukerile ku khomiwa hi ndlela yo hlawuleka hi vapfumeri-kulobye? Nikatsongo. A nga ma pfumelelanga marito yo hlawuleka ya xichavo leswaku a byarhisiwa wona. (Mintirho 10:25, 26) Ku vuriwa yini hi Yesu? U vule leswaku u tele ku ta tirhela van’wana, ku nga ri ku tirheriwa. (Matewu 20:28) Ku hambana ni sweswo, xana vapapa va tiviwa hi yini? Xana va papalata ndhuma, va ala swithopo leswikulu naswona va papalata ku koka vanhu mahlo hi rifuwo kumbe matimba ya vona?

Petro na Kreste a va ri vavanuna lava nga ni mahanyelo lamanene lava kondleteleke ku rhula. Ringanisa rhekhodo ya vona ni leswi Khatoliki encyclopedia Lexikon für Theologie und Kirche (Lexicon for Theology and Church) yi swi vulaka malunghana na Mupapa Leo wa Vukhume: “Ku tikatsa eka swa tipolitiki, xihlawuhlawu ni ku tinyiketela eka mintsako swi endle leswaku Leo wa Vukhume a nga vi na mhaka ni vumoya byakwe.” Karl Amon, mufundhisi wa Khatoliki tlhelo profesa wa matimu ya kereke u vula leswaku swiviko leswi tiyisekisiweke leswi vulavulaka hi Mupapa Alexander wa Vutsevu swi paluxa “swiendlo swa yena swo tala swo homboloka, ku tirhisa ka yena vulawuri hi ndlela yo biha, ku xaviselana swikhundlha ekerekeni ni ku tikhoma ka yena loko biha.”

Ku vuriwa yini hi tidyondzo ta vapapa? Xana ti nga fanisiwa njhani ni tidyondzo ta Petro na Kreste? Petro a a nga pfumeli leswaku vanhu hinkwavo vo lulama va ya etilweni. Loko a vulavula hi Hosi Davhida wo lulama u te: “Davhida a nga tlhandlukelanga ematilweni.” (Mintirho 2:34) Petro a nga dyondzisanga leswaku tincece ti fanele ti khuvuriwa. Ematshan’weni ya sweswo, u dyondzise leswaku nkhuvulo i goza leri vapfumeri va ri tekaka ri ri ra nkoka.—1 Petro 3:21.

Yesu u dyondzise vadyondzisiwa vakwe leswaku a va fanelanga va ringeta ku va ni ndhuma leyikulu ku tlula vanhu van’wana. Yesu u te: “Loko munhu a lava ku va wo sungula, u fanele a va wo hetelela eka hinkwavo.” (Marka 9:35) Endzhakunyana ka rifu rakwe, Yesu u nyikele nkongomiso lowu nga lo dlaa erivaleni eka valandzeri vakwe a ku: “Mi nga tshuki mi vuriwa Rabi, hikuva mudyondzisi wa n’wina i un’we, kasi n’wina hinkwenu mi vamakwavo. Ku tlula kwalaho, mi nga tshuki mi vitana hambi ku ri mani leswaku i tata wa n’wina la misaveni, hikuva Tata wa n’wina i un’we, wa le tilweni. Naswona mi nga vuriwi ‘varhangeri,’ hikuva Murhangeri wa n’wina i wun’we, i Kreste.” (Matewu 23:1, 8-10) Xana u ehleketa leswaku vapapa va seketela tidyondzo ta Petro na Kreste?

Van’wana va vula leswaku ku tlhandlamana ka vapapa swi ya emahlweni hambiloko munhu la nga ni xikhundlha xo hlawuleka a nga ri na mahanyelo lama languteriweke eka Vakreste. Xana u ehleketa leswaku mholovo yoleyo ya twala? Yesu u te: “Murhi wun’wana ni wun’wana lowunene wu humesa mbhandzu lowunene, kambe murhi wun’wana ni wun’wana wo bola wu humesa mbhandzu lowu nga pfuniki nchumu, hambi ku ri murhi wo bola a wu nge humesi mbhandzu lowunene.” Tanihi leswi ku nga ni vumbhoni, xana u ehleketa leswaku Petro kumbe Kreste a va ta lava ku tihlanganisa ni mihandzu leyi vapapa va yi humesaka?—Matewu 7:17, 18, 21-23.

[Tinhlamuselo ta le hansi]

^ par. 7 Bulo ra Yesu na Petro a ri sekeriwe eku hambaniseni ka Kreste ni ntirho wakwe, ku nga ri eka ntirho lowu Petro a ta wu endla. (Matewu 16:13-17) Endzhakunyana, Petro hi byakwe u vule leswaku Yesu i ribye ra laha vandlha ri akiweke kona. (1 Petro 2:4-8) Muapostola Pawulo u tiyisekise leswaku Yesu, ku nga ri Petro, i “ribye ra masungulo ra le yinhleni” ra vandla ra Vukreste.—Vaefesa 2:20.

^ par. 14 Yesu ni vaapostola vakwe va lemukise leswaku vandlha ra Vukreste a ri ta tala hi vavanuna lava a va ta dyondzisa tidyondzo ta vagwinehi. (Matewu 13:24-30, 36-43; 2 Timotiya 4:3; 2 Petro 2:1; 1 Yohane 2:18) Marito wolawo ma ve ntiyiso loko kereke kumbe vandlha ra Vukreste ra lembe-xidzana ra vumbirhi ri tekelela mikhuva ni tidyondzo ta Bibele leti soholotiweke hi filosofi ya Magriki.

[Swifaniso leswi nga eka tluka 25]

Xana vumbhoni byi kombisa leswaku vapapa va landzele xikombiso xa Petro?