Lexi Endlaka Leswaku Bibele Yi Pfuna eMinkarhini Ya Hina

“Matsalwa hinkwawo ma huhuteriwe hi Xikwembu naswona ma nga pfuna . . . ku kongomisa vutomi bya vanhu.”—2 TIMOTIYA 3:16, The Jerusalem Bible.

EMATIN’WINI hinkwawo ya vanhu, Bibele yi susumetela vanhu va mindhavuko yo tala leswaku va hundzula mahanyelo ya vona ma va lamanene. Tsalwa leri tshahiweke laha henhla ri hlamusela lexi endlaka leswaku Bibele yi pfuna hi ndlela yoleyo—vutlhari bya yona byi huma eka Xikwembu. Hambileswi Bibele yi tsariweke hi vanhu, leswi yi swi vulaka swi huma eka Xikwembu. Bibele yi ri: “Vanhu a va vulavula leswi humaka eka Xikwembu va ri karhi va susumetiwa hi moya lowo kwetsima.”—2 Petro 1:21.

Bibele yi hi pfuna eka tindlela tin’wana timbirhi. Yo sungula, yi hi hlamusela langutelo lerinene leri nga hi endlaka hi va ni vutomi lebyi tsakisaka. Ya vumbirhi, yi ni matimba yo susumetela vanhu leswaku va hundzula mahanyelo ya vona leswaku va kuma vutomi byolebyo lebyi tsakisaka. A hi kambisiseni tindlela teto timbirhi.

Ku Twisisa Swi Endla Leswaku U Va Ni Tipakani Letinene

EBibeleni Xikwembu xi tshembise leswi: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona. Ndzi ta ku tsundzuxa ndzi veke tihlo ra mina ri ri ehenhla ka wena.” (Pisalema 32:8) Xiya leswaku Xikwembu a xi hi nyiki switsundzuxo ntsena kambe xi tlhela xi hi nyika vuswikoti byo twisisa swilo hi vuenti. Loko hi twisisa leswaku hi tihi tipakani leti nga hi vuyerisaka hakunene swi nga hi sirhelela leswaku hi nga tidyeli nkarhi hi ku hlongorisa swilo leswi nga pfuniki nchumu.

Hi xikombiso, pakani ya nkoka swinene leyi vanhu vo tala va tivekelaka yona evuton’wini bya vona i ku va ni ndhuma kumbe rifuwo. Tibuku leti endleriweke ku pfuna vanhu ku ti tlhantlhela swiphiqo swa vona ti vulavula ngopfu hi ndlela leyi u nga kanganyisaka van’wana ha yona leswaku u va ni ndhuma kumbe u va ni rifuwo. Kasi hi hala tlhelo Bibele yi hi byela leswi: “Ku kwetlembetana exikarhi ka vanhu; . . . i vuhava ni ku hlongorisa mheho.” “La rhandzaka silivhere ntsena a nge enerisiwi hi silivhere.” (Eklesiasta 4:4; 5:10) Xana xitsundzuxo lexi xa hi pfuna namuntlha?

Leswaku hi kombisa ndlela leyi ndzayo leyi humaka eBibeleni yi hi pfunaka ha yona, a hi kambisiseni mhaka ya Akinori wa le Japani. Endzhaku ka loko Akinori a dyondze hi matimba leswaku a pasela ehenhla ku tlula swichudeni leswin’wana, u fikelele pakani yakwe yo heta tidyondzo takwe eyunivhesiti leyi dumeke kutani a kuma ntirho ekhampanini leyi tivekaka ngopfu. Swilo hinkwaswo a swi vonaka swi n’wi fambela kahle. Kambe hambileswi a a tirha kahle, sweswo a swi n’wi tiselanga ntsako lowu a a tshemba leswaku u ta va na  wona. Ematshan’weni ya sweswo, a a tshamela ku vabya hileswi a a tshama a tshikilelekile naswona a karhele swinene. Vanghana vakwe entirhweni a va nga ri na mhaka na yena. Leswi a a karhatekile, u hundzuke xilovekelo naswona u kale a lava ni ku tisunga. Hiloko a sungula ku dyondza Bibele ni Timbhoni ta Yehovha. Leswi a swi dyondzeke swi cince langutelo rakwe hi swilo leswi a a swi teka swi ri swa nkoka evuton’wini. Hi ku hatlisa, vuvabyi byakwe lebyi a byi vangiwa hi ntshikilelo byi sungule ku hela. Ematshan’weni yo va Akinori a tikarhatela ku lava ku xiximiwa ni ku navela ku va ni rifuwo, u sungule ku tivonela hi byakwe leswi xivuriso xin’wana xa Bibele xi swi vulaka: “Mbilu leyi tsakeke, yi horisa miri.”—Swivuriso 14:30, Bibele—Mahungu Lamanene.

Hi yihi pakani leyi wena u yi tekaka yi ri ya nkoka swinene evuton’wini? Hi wihi nchumu lowu u nga wu fikelelaka lowu nga ku tiselaka ntsako wa xiviri? Xana i ku va ni ndyangu lowu tsakeke? Kumbe, xana i ku hlomisela vana va wena leswaku swi va fambela kahle evuton’wini? Xana i ku va ni vanghana vo tala? Xana i ku va u titlonya hi vutomi? Tipakani leti hinkwato i ta nkoka. Entiyisweni Bibele yi vula leswaku hi fanele hi ti fikelela, kambe a yi hi khutazi leswaku hi rhangisa tona ntsena evuton’wini bya hina. Hi ku tirhisa vutlhari lebyi pfunaka, Bibele yi vulavula hi nchumu wa nkoka lowu lavekaka leswaku hi va ni vutomi lebyi tsakisaka. Yi ri: “Chava Xikwembu xa ntiyiso u hlayisa swileriso swa xona. Hikuva leyi hi yona mfanelo hinkwayo ya munhu.” (Eklesiasta 12:13) Loko hi xi ba hi makatla xileriso lexi, vutomi bya hina a byi nge vi na xikongomelo, hi ta pfilunganyeka kutani eku heteleleni hi hela matimba. Kasi hi hala tlhelo, Bibele ya hi tiyisekisa: “Wa tsaka la tshembaka Yehovha.”—Swivuriso 16:20.

Ndlela Leyi Bibele Yi Susumetelaka Vanhu Leswaku Va Hundzula Vutomi Bya Vona

Muapostola Pawulo u tsale a ku: “Rito ra Xikwembu ra hanya naswona ri ni matimba.” Ku fana ni banga leri tsemaka hi matlhelo mambirhi, rito ra Xikwembu ri fika emiehleketweni ni le makungwini lama dzikeke ya munhu. (Vaheveru 4:12) Bibele yi ni matimba yo hundzula ndlela leyi vanhu va hanyaka ha yona hileswi yi va pfunaka ku vona leswi vumunhu bya vona byi nga xiswona hakunene ku nga ri leswi vona va ehleketaka leswaku va xiswona. Kutani lava nga ni timbilu letinene va ta swi xiya leswaku va fanele va hundzula mahanyelo ya vona. Hi xikombiso, loko Pawulo a vulavula hi Vakreste va le vandlheni ra le mutini wa khale wa Korinto lava tshameke va va vayivi, swidakwa, vaoswi ni swin’wana swo fana ni sweswo, u te: “Hi leswi van’wana va n’wina a mi ri swona. Kambe mi hlantswiwile mi basa . . . hi moya wa Xikwembu xa hina.” (1 Vakorinto 6:9-11) Moya lowo kwetsima wa Yehovha wa ha tirha ninamuntlha naswona wu ni matimba. Kutani wu nga susumetela vanhu ku hundzula mahanyelo ya vona.

Mario loyi a tshamaka eYuropa, a a ri wanuna wa madzolonga loyi a a dzaha mbangi a tlhela a yi xavisa. Siku rin’wana loko phorisa rin’wana ri n’wi tekele swidzidziharisi swakwe, u hlundzuke ngopfu lerova a ri ba a tlhela a fayetela movha wa rona. Ku tlula kwalaho, Mario a a nga tirhi naswona a a nghene hi nhloko eswikweletini. Leswi a xiyeke leswaku a a nga ta swi kota ku titlhantlhela swiphiqo swakwe, u pfumele ku dyondzeriwa Bibele. Loko Mario a ri karhi a hundzula vumunhu byakwe, u cince ndlela leyi a a languteka ha yona, u tshike ku tirhisa swidzidziharisi ni ku swi xavisa naswona u tshike ku va ni madzolonga. Lava a va tiva mahanyelo yakwe ya khale va hlamarile. Va n’wi yimisile kutani va n’wi vutisa va ku: “Mario, xana hi wena hakunene?”

I yini leswi susumeteleke vanhu vo fana na Akinori na Mario leswaku va hundzula vutomi bya vona kutani va va ni ntsako ni ku eneriseka evuton’wini? Swi le rivaleni leswaku i vutivi lebyintshwa hi Xikwembu lebyi va byi kumeke hi ku dyondza Bibele. I Xikwembu ntsena lexi nga hi nyikaka switsundzuxo leswi pfunaka leswi hi swi lavaka leswaku swi ta hi fambela kahle evuton’wini sweswi ni ku kuma vutomi lebyi nga heriki enkarhini lowu taka. Ku fana ni Tatana, Yehovha Xikwembu u vulavula na hina hi ku tirhisa Bibele a ku: “N’wananga, yingisa u tlhela u amukela marito ya mina. Kutani malembe ya wena ya ku hanya ma ta tala. . . . Loko u famba, magoza ya wena a ma nge manyeki; naswona loko u tsutsuma, a wu nge khunguvanyeki. Namarhela ndzayo; u nga yi tshiki yi famba. Yi hlayise, hikuva i vutomi bya wena.” (Swivuriso 4:10-13) Xana swi kona switsundzuxo leswi pfunaka leswi nga tlulaka nkongomiso lowu hi wu kumaka eka Muvumbi wa hina?

 [Bokisi/Xifaniso lexi nga eka tluka 7]

Switsundzuxo Leswi Pfunaka Namuntlha

Bibele yi ni milawu leyi pfunaka leyi nga hi kongomisaka etimhakeni hinkwato ta vutomi bya manguva lawa. Swikombiso swin’wana hi leswi:

• Ku kota ku hanyisana kahle ni vanhu van’wana

“Swilo hinkwaswo, leswi mi lavaka vanhu va swi endla eka n’wina, na n’wina mi fanele mi swi endla eka vona.”—Matewu 7:12.

“Loyi a tikhomaka tanihi lontsongo exikarhi ka n’wina hinkwenu hi yena lonkulu.”—Luka 9:48.

“Mi landzela ndlela ya malwandla.”—Varhoma 12:13.

• Ku hlula mikhuva yo biha

“Loyi a fambaka ni vanhu vo tlhariha u ta tlhariha, kambe loyi a tirhisanaka ni lavo hunguka, a swi nge n’wi fambeli kahle.”—Swivuriso 13:20.

“U nga vi exikarhi ka lava va nwaka ngopfu vhinyo.”—Swivuriso 23:20.

“U nga vi nakulobye wa loyi a voyameleke eku hlundzukeni.”—Swivuriso 22:24.

• Ku va ni ndyangu lowu tsakeke

“Un’wana ni un’wana wa n’wina a a rhandze nsati wakwe hilaha a tirhandzaka hakona; hi hala tlhelo, wansati u fanele ku va ni xichavo xo enta eka nuna wakwe.”—Vaefesa 5:33.

“Tiambexeni xinakulobye lexikulu xa tintswalo, musa, mianakanyo yo titsongahata, ku rhula, ni ku va ni mbilu yo leha. Hambetani mi lehiselana mbilu ni ku rivalelana hi ku ntshunxeka.”—Vakolosa 3:12, 13.

• Ku pfuna vana

“Letela mufana hi ndlela leyi nga yakwe; hambiloko a kurile a nge hambuki eka yona.”—Swivuriso 22:6.

“Na n’wina, vatatana, mi nga karhati vana va n’wina, kambe hambetani mi va kurisa hi ku tshinya ni nkongomiso wa mianakanyo wa Yehovha.”—Vaefesa 6:4.

• Ku papalata timholovo

“Loko nhlamulo yi olova, yi tlherisa vukarhi, kambe rito leri tlhavaka ri pfuxa ku hlundzuka.”—Swivuriso 15:1.

“Vanani lavo rhanga eku xiximaneni.”—Varhoma 12:10.

Hambi ku ri vanghana va nga papalata ku holova hikwalaho ka timhaka ta mabindzu hi ku yi tsala ehansi mintwanano ya kona. Hikwalaho ka sweswo, Yeremiya, nandza wa Xikwembu u tsale a ku: “Ndzi tsala papila ra mpfumelelano ndzi vehela xilemo kutani ndzi teka timbhoni loko ndzi ri karhi ndzi pima mali eswikalweni.”—Yeremiya 32:10.

• Ku hlakulela langutelo lerinene

“Swilo swin’wana ni swin’wana swa ntiyiso, . . . leswi rhandzekaka, . . . leswi ku vulavuriwaka kahle ha swona, hinkwaswo leswi nga kona swa vunene ni hinkwaswo leswi nga kona leswi dzunekaka, hambetani mi xiya swilo leswi.”—Vafilipiya 4:8.

Bibele yi sola ku va vanhu va tshama va ri karhi va anakanya hi swilo swo biha naswona yi sola lava vilelaka “hi swiavelo swa vona evuton’wini.” Yi ri: “Tsakani hi ntshembo.”—Yudha 4, 16; Varhoma 12:12.

Ku tirhisa milawu leyi leyinene a swi nge hi tiseli ntsako ni ku va ni ku rhula ntsena sweswi kambe swi ta tlhela swi hi pfuna ku hanya hi milawu ya Xikwembu kutani hi kuma mikateko ya xona. Bibele yi ri: “Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.

[Swifaniso leswi nga eka tluka 5]

Akinori loko a ha ri n’wamabindzu (eximatsini) a ri ni nsati wakwe va ri karhi va tiphina hi ku chumayela van’wana ntiyiso lowu nga eBibeleni