Dyondza Swo Karhi Eka Vuyelo Bya Swihoxo Swa Vaisrayele

LOKO Vaisrayele va nghena eTikweni leri Tshembisiweke, a a va swi tiva leswi Yehovha a swi languteleke eka vona. Hi ku tirhisa Muxe, Xikwembu xi te: “Mi fanele mi hlongola vaaki hinkwavo va tiko emahlweni ka n’wina, mi lovisa swifaniso swa vona hinkwaswo swa maribye, ni swifaniso swa vona hinkwaswo leswi n’okisiweke swa nsimbi mi ta swi lovisa, ni tindhawu ta vona hinkwato leti tlakukeke to kwetsima mi ta ti lovisa.”—Tinhl. 33:52.

Vaisrayele a va nga fanelanga va endla ntwanano ni vaaki va tiko rero kumbe va tekana na vona. (Det. 7:2, 3) Entiyisweni, vanhu va Xikwembu va nyikiwe xitsundzuxo lexi nge: ‘Tivoneleni leswaku mi nga endli ntwanano ni vaaki va tiko leri mi yaka eka rona, hikuva wu nga ha va ntlhamu eka n’wina.’ (Eks. 34:12) Kambe, Vaisrayele a va xi yingisanga Xikwembu kutani va wele entlhan’wini. I yini lexi endleke leswaku va wela entlhan’wini lowu? I yini leswi hi nga swi dyondzaka eka swihoxo swa vona ni vuyelo bya kona?—1 Kor. 10:11.

Xiseveseve Ni Vamatiko Swi Endle Leswaku Va Gandzela Swikwembu Swa Hava

Loko Vaisrayele va ta kuma Tiko leri Tshembisiweke va rhange hi ku hlula vaaki va rona. Hambiswiritano, Vaisrayele a va swi yingisanga hinkwaswo swileriso swa Xikwembu. A va va hlongolanga valala va vona. (Vaav. 1:1–2:10) Ku ri na sweswo, leswi Vaisrayele va tshameke exikarhi ka vanhu va “matiko ya nkombo” lava a va ri etikweni rero, sweswo swi endle leswaku va endla xiseveseve na vona. (Det. 7:1) Xana leswi swi va khumbe njhani Vaisrayele? Bibele yi ri: “Va [teke] vana va vona va vanhwanyana va va vasati va vona, ni vana va vona va vanhwanyana va va nyiketa eka vana va vona va majaha, va tirhela swikwembu swa vona. Hi ndlela yoleyo vana va Israyele va [endle] swo biha ematihlweni ya Yehovha, va rivala Yehovha Xikwembu xa vona, va tirhela Vabali ni timhandzi to kwetsima.” (Vaav. 3:5-7) Ku va ni xiseveseve ni vamatiko swi vangele Vaisrayele ku tekana na vona ni ku gandzela swikwembu swa hava. Loko Vaisrayele va kala va tekana ni vahedeni volavo, a swa ha va olovelanga  ku va hlongola etikweni. Vugandzeri bya ntiyiso a byi thyakisiwile, naswona Vaisrayele va sungule ku gandzela swikwembu swa mavunwa.

Leswi vaaki va le Tikweni leri Tshembisiweke se a va ri vanghana va vona, a va ta va hambukisa swinene Vaisrayele evugandzerini bya ntiyiso ku tlula loko va ha ri valala va vona. Xiya ndlela yin’wana leyi vukhongeri bya ntiyiso a byi ta thyakisiwa ha yona.

Ku Tolovela Marimelo Ya Vakanana Ku Vange Leswaku Va Gandzela Bali

Loko Vaisrayele va nghena eTikweni leri Tshembisiweke va wise ku tsendzeleka kutani vo tala va ve varimi. Ndlela leyi a va rima ha yona kumbexana a yi fana ni ndlela leyi Vakanana a va rima ha yona. Kambe a va tekelelanga tindlela ta Vakanana to rima ntsena. Ku va ni xiseveseve ni Vakanana swi tlhele swi yenga Vaisrayele leswaku va tekelela vugandzeri bya vona lebyi a byi fambisana ni ku rima.

Vakanana a va gandzela Vabali vo tala, ku nga swikwembu leswi a ku anakanyiwa leswaku swi nonisa misava. Handle ka ku rima ni ku tshovela, Vaisrayele, hi ku famba ka nkarhi va sungule ku gandzela swikwembu swa Vakanana va anakanya leswaku hi swona swi va nyikaka ntshovelo wo tala. Vo tala eIsrayele va endle onge va gandzela Yehovha kambe entiyisweni a va gwinehile.

Xitsundzuxo Lexi Hi Faneleke Hi Xi Tekela eNhlokweni Namuntlha

Swi nga ha endleka leswaku loko Vaisrayele va sungula ku hlangana ni vanhu va le Tikweni leri Tshembisiweke, a va nga tiyimiselanga ku gandzela Bali ni ku tikhoma hi ndlela yo biha leyi a yi fambisana ni vugandzeri lebyi. Kambe, ku endla xiseveseve ni vanhu va le tikweni leri swi endle leswaku va sungula ku gandzela Bali. Na hina hi ta wela entlhan’wini lowu loko hi endla xiseveseve ni vanhu lava nga ni xinghana kambe va nga riki Vakreste naswona va nga riki na mahanyelo yo fana ni ya hina naswona va nga rhandziki misinya ya milawu ya Bibele. Hi nga ha boheka ku hlangana ni vanhu lava nga riki vapfumeri entirhweni, exikolweni kumbexana ni le kaya. Hambiswiritano, leswi humeleleke Vaisrayele i xitsundzuxo eka hina xa leswaku loko ho endla xinghana ni vanhu lava, hi ta va hi tlanga hi ndzilo. Bibele yi tiyisile loko yi ku: “Vunakulobye byo biha byi onha mikhuva leyi pfunaka.”—1 Kor. 15:33.

Namuntlha, hi langutana ni miringo yo tala leyi fanaka ni leyi Vaisrayele va langutaneke na yona. Manguva lawa ku ni swilo swo tala leswi vanhu va swi endlaka swikwembu swa vona. Swi katsa mali, vanhu lava dumeke eka ta vuhungasi, lava nga ni ndhuma eka ta mintlangu, minhlangano ya tipolitiki, varhangeri van’wana va vukhongeri hambi ku ri swirho swa ndyangu. Swin’wana swa swilo leswi hi nga ha swi teka swi ri swa nkoka swinene evuton’wini bya hina. Ku va ni xinghana lexikulu ni vanhu lava nga rhandziki Yehovha swi nga onha vuxaka bya hina na yena.

Vaisrayele vo tala va kokiwe rinoko ni ku phasiwa hi vuoswi lebyi a byi ri bya nkoka evugandzerini bya Bali. Mintlhamu leyi fanaka ni leyi ya ha phasa vagandzeri vo tala va Xikwembu. Hi xikombiso, munhu la nga riki na vuxiyaxiya a nga ha hlalela swifaniso swo navetisa rimbewu eka khompyuta yakwe a ri ekaya kutani sweswo swi onha ripfalo rakwe. Swi twisa ku vava loko Mukreste a phasiwa hi ku hlalela swifaniso swo navetisa rimbewu eka Internet!

“Va Tsaka Lava Hlayisaka Switsundzuxo Swakwe”

Munhu u tiendlela xiboho hi yexe xa leswaku u ta yingisa Yehovha kumbe a nge n’wi yingisi, loko a hlawula vanghana. (Det. 30:19, 20) Hikwalaho hi fanele hi tivutisa leswi: ‘I vamani lava ndzi hlawulaka ku tihungasa na vona? Xana va ni mahanyelo lamanene naswona va yi xixima milawu ya Xikwembu? Xana va gandzela Yehovha? Xana loko ndzi tihungasa na vona swi ta ndzi khutaza leswaku ndzi va Mukreste la wupfeke?’

Mupisalema u yimbelerile a ku: “Va tsaka lava pfumalaka xihoxo endleleni ya vona, lava fambaka enawini wa Yehovha. Va tsaka lava hlayisaka switsundzuxo swakwe; va hambeta va n’wi lavisisa hi mbilu hinkwayo.” (Ps. 119:1, 2) Hakunene, “wa tsaka un’wana ni un’wana la chavaka Yehovha, la fambaka etindleleni takwe.” (Ps. 128:1) Loko swi ta emhakeni yo hlawula vanghana va hina, onge hi nga dyondza swo karhi eka swihoxo swa Vaisrayele kutani hi yingisa Yehovha minkarhi hinkwayo.—Swiv. 13:20.

[Xifaniso eka tluka 26]

Ku endla xiseveseve ni lava nga rhandziki Yehovha swi nga hi hoxa entlhan’wini wa ku gandzela swikwembu swa hava