Sena Mulilibambilide Kwaambila Bantu Nzyomusyoma?

SENA kuli nomwakajanika mubukkale bumwi bwakapa kuti muyandike kwaamba mbozibede ncobeni nzyomusyoma? Amulange-lange cakacitika kuli Susana, imucizi uujisi myaka yakuzyalwa iili 16 uukala mucisi ca Paraguay. Muciiyo cimwi cijatikizya njiisyo zyakulilemeka, sicikolo umwi wakaamba kuti Bakamboni ba Jehova tabacizumini “Cizuminano Cakale,” nokuba kusyoma muli Jesu Kristo naa Mariya. Alimwi sicikolo uumwi wakaamba kuti Bakamboni mbantu baciindilizya mumakani aabukombi balo banga bayanda kufwa muciindi cakusilikwa. Ino nywebo nimwakaingula buti?

Susana wakapaila kuli Jehova mpoonya wakatambika janza. Ciiyo cakali afwaafwi kumana, aboobo Susana wakalomba bayi bakwe bakaintu kuti apegwe coolwe cakwaamba nzyasyoma mbwaakali umwi waba Bakamboni ba Jehova. Bayi bakazumina. Nsondo zyobilo zyakatobela, Susana wakalibambila makani aakwe, kubelesya broshuwa iijisi mutwe wakuti: Jehovah’s Witnesses—Who Are They? What Do They Believe?

Buzuba bwakwaamba makani aakwe bwakasika. Susana wakapandulula kaambo ncotwiitwa kuti Bakamboni ba Jehova. Kumane wakapandulula bulangizi bwesu bwakumbele alimwi akaambo ncotukakila kubikkwa bulowa. Mpoonya wakaambila basicikolonyina kubuzya mibuzyo. Basicikolo banji bakatambika maanza. Bayi bakagambwa kumvwa musimbi ooyu nkwaakali kwiingula mibuzyo kabelesya Magwalo.

Umwi sicikolo musankwa wakaamba kuti: “Ndakali mu Ŋanda ya Bwami lweendo lumwi, tiindakabona cikozyanyo nociba comwe.” Bayi bakayanda kuzyiba kaambo ncomutakwe zikozyanyo mu Ŋanda ya Bwami. Susana wakabala lugwalo lwa Intembauzyo 115:4-8 alimwi a Kulonga 20:4. Kabagambidwe, bayi bakabuzya kuti: “Ino nkaambo nzi muzikombelo zyesu ncomuli zikozyanyo zinji kakuli Bbaibbele talizumizyi kubelesya zikozyanyo mubukombi?”

Imubandi wamibuzyo akwiingula wakazumanana kwamaminiti aali 40. Susana naakabuzya basicikolo ikuti naa inga bayanda kweebelela vidiyo yakuti: No Blood—Medicine Meets the Challenge, boonse bakazumina. Mpoonya bayi bakabikka bubambe bwakuti bakazumanane amubandi ooyu mubuzuba butobela. Nobakamana kweebelela vidiyo, Susana wakapandulula nzila zyabusilisi zitabelesyegwi bulowa nzyobazumina Bakamboni ba Jehova bamwi. Kujatikizya kaambo aaka, bayi bakaamba kuti: “Tiindazyi kuti kuli nzila zinji zyabusilisi zitabelesyegwi bulowa; alimwi tiindazyi kuti kuli mpindu ziliko mukutabelesya bulowa. Sena busilisi oobu bubelesyegwa buyo a Bakamboni ba Jehova?” Nobakamvwa kuti bulabelesyegwa amuntu uuli woonse, bayi bakaamba kuti: “Bakamboni ba Jehova baakundiswaya ciindi ciboola, ndiyoobandika ambabo.”

 Cibeela ncaakalibambilide Susana kuti abandike kwamaminiti aali 20 buyo, cakatola mawoola otatwe. Nokwakainda nsondo yomwe, basicikolonyina abalo bakapegwa coolwe cakupandulula nzyobasyoma muzikombelo zyabo. Kumamanino aamubandi, bakabuzyigwa mibuzyo minji, pele basicikolo aaba tiibakacikonzya kuzipandulula kabotu nzyobasyoma. Bayi bakababuzya kuti: “Ino nkaambo nzi ncomwaalilwa kupandulula nzyomusyoma mbuli mweenzinyoko ooyu uuli ngumwi wa Bakamboni ba Jehova?”

Bakaingula kuti: “Baliiya ncobeni Bbaibbele. Pele swebo tatuliiyi kapati.”

Bayi bakalanga Susana akumwaambila kuti: “Masimpe muliiya ncobeni Bbaibbele alimwi akupona kweelana ancoliyiisya. Muyandika kulumbaizyigwa.”

Susana naakayanda, naakaumuna buyo. Pele, kwiinda mukwaambaula kutegwa asalazye twaambo ntobatakali kumvwisya basicikolonyina, wakatobela cikozyanyo camusimbi muna Israyeli uutaambidwe zyina iwakatolwa mubuzike abana Aramu. Imusimbi ooyo wakali kukkala muŋanda ya Naamani silutwe wampi yabasikalumamba yabana Aramu, iwakajisi bulwazi bwacinsenda. Imusimbi muna Israyeli ooyu wakaambila namalelo wakwe kuti: “Nicakabota mwami wangu naakali kumusinsimi uuli ku-Samariya, nkaambo naakamuponya cinsenda cakwe.” Imusimbi ooyu wakalimvwa kuti uleelede kupa bumboni kujatikizya Leza wakasimpe. Eeci cakapa kuti simalelo wakwe, Naamani, abe mukombi wa Jehova.—2 Bam. 5:3, 17.

Mbubwenya buyo, Susana tanaakaumuna buyo pele wakapa bumboni kujatikizya Jehova alimwi abantu bakwe. Kwiinda mukupandulula nzyasyoma ciindi nozyakadoonekwa, Susana wakali kutobela lulayo lwamu Magwalo lwakuti: “Amulemeke Kristo mumyoyo yanu kuti ngo-Mwami. Amube balibambide lyoonse, kuti mubapandulwide boonse bamubuzya makani aalusyomo lumukalilide, pele amuvuwe amoyo mutete akuyoowa Leza.” (1 Pet. 3:15) Sena mulilibambilide kwaamba nzyomusyoma alimwi akucita oobo ikuti kwayandika?

[Cifwanikiso icili apeeji 17]

Eezyi zibelesyo zilakonzya kumugwasya kwaamba nzyomusyoma