‘Kamuya Mukabayiisye, Akubabbapatizya’
‘Kamuya Mukabayiisye, Akubabbapatizya’
“Nkaambo kaako kamuya mukabaiisye bantu bamisyobo yoonse, akubabapatizya . . . alimwi amubaiisye kuti bajatisye makani oonse ngendakamulailila.”—Matayo 28:19, 20.
1. Ncakusala cili buti bana Israyeli ncobakasala kabali kunselelo aa Cilundu ca Sinai?
IMYAKA iitandila ku 3,500 yainda, boonse mucisi bakakonka kuli Leza. Kabaswaangene kunselelo aa Cilundu ca Sinai, ibana Israyeli bakazumina caantangalala kuti: “Coonse buyo Jehova ncaamba tulacicita.” Kuzwa ciindi eeco, bana Israyeli bakaba bantu balyaabide kuli Leza, ‘bayandika’ [“basale,” BT]. (Kulonga 19:5, 8; 24:3) Bakali kukulangila kapati kukwabililwa anguwe akupona kwamazyalani munyika “iikunka mukupa abuci.”—Bapaizi 20:24, BT.
2. Ncilongwe cili buti bantu sunu ncobakonzya kuba ancico a Leza?
2 Pele mbubwenya mbwaakaamba sintembauzyo Asafu, bana Israyeli ‘tiibakabamba cizuminano ca Leza, bakakaka kweenda mumulawo wakwe.’ (Intembauzyo 78:10) Bakaalilwa kutobela cikonke bamatataabo ncobakakonka kuli Jehova. Mukuya kwaciindi, icisi cakaleka kuba acilongwe citaliboteli ncicakajisi a Leza. (Mukambausi 5:4; Matayo 23:37, 38) Aboobo, Leza ‘wakatalika kuyeeya bamasi, kuti asale kuli mbabo bantu bazina lyakwe.’ (Incito 15:14) Alimwi okuno kumazuba aakumamanino, ulayobolola “inkamu impati yabantu batabaliki kumuntu naba omwe, bazwa kuzisi zyoonse akumisyobo yoonse akumikowa yoonse akumyaambo yoonse,” cakukondwa ibaamba kuti: “Lufutuko lulazwa kuli-Leza wesu uukede acuuno cabwami aku-Mwanambelele.”—Ciyubunuzyo 7:9, 10.
3. Nintaamu nzi muntu nzyayelede kutola kutegwa abe acilongwe a Leza?
3 Kutegwa muntu abe umwi wabaabo ibajisi cilongwe cibotu eeci a Leza, weelede kulyaaba kuli Jehova akutondezya oobo kubuleya kwiinda mukubbapatizyigwa mumeenda. Ooku nkutobela malailile aa Jesu kuli basikwiiya bakwe aakuti: “Nkaambo kaako kamuya mukabaiisye bantu bamisyobo yoonse, akubabapatizya muzina lya-Taata alya-Mwana alya-Muuya Uusalala, alimwi amubaiisye kuti bajatisye makani oonse ngendakamulailila.” (Matayo 28:19, 20) Ibana Israyeli bakaswiilila kubalwa kwa “bbuku lyacizuminano.” (Kulonga 24:3, 7, 8) Aboobo, bakamvwisya mikuli njobakajisi kuli Jehova. Mbubwenya buyo asunu, iluzibo lwini-lwini lwamakanze aa Leza kweelana ambwaabede mu Jwi lyakwe, Ibbaibbele, lulayandika kapati muntu katanabweza ntaamu yakubbapatizyigwa.
4. Ncinzi ncayelede kucita muntu ikutegwa ayelele kubbapatizyigwa? (Amubikkilizye akabbokesi kali atala.)
4 Cakutadooneka, Jesu wakali kuyanda kuti basikwiiya bakwe babe alusyomo luyumu kabatana bbapatizyigwa. Tanaakalailila basikumutobela ikuyoogwasya buyo bantu kuba basikwiiya, pele wakabalailila akubayiisya ‘kujatisya makani oonse ngaakabalailila.’ (Matayo 7:24, 25; Ba-Efeso 3:17-19) Aboobo, aabo ibeelela kubbapatizyigwa kanji-kanji inga bakaiya Bbaibbele kwamyezi naa kwamwaka omwe naa yobilo kucita kuti kusala kwabo kutabi kwakubinda naa kucitwa cakutazyiba. Lyalubbapatizyo, aabo babbapatizyigwa balavwiila kuti inzya kumibuzyo yobilo iiyandika kapati. Mbwaanga Jesu wakakankaizya kuti ‘Ii wesu abe Ii, Pe wesu abe Pe,’ inga cagwasya ikuti toonse twiinduluke ncoyaamba mibuzyo yalubbapatizyo yobilo eeyi.—Matayo 5:37.
Ikweempwa Akulyaaba
5. Nintaamu nzi zyobilo ziyandika kapati zikankaizyigwa mumubuzyo wakusaanguna walubbapatizyo?
5 Mubuzyo wakusaanguna walubbapatizyo ubuzya sikubbapatizyigwa ikuti naa weempwa buumi bwakwe bwamusyule akwaaba buumi bwakwe kuli Jehova kutegwa acite kuyanda kwakwe. Mubuzyo ooyu ukankaizya ntaamu zyobilo ziyandika kapati zyalo zyeelede kubwezyegwa katana bbapatizyigwa muntu, nkokuti kweempwa akulyaaba.
6, 7. (a) Nkaambo nzi kweempwa ncokuyandika kuli boonse bayanda kubbapatizyigwa? (b) Nkucinca kuli buti kweelede kucitwa muntu neempwa?
6 Nkaambo nzi muntu ncayandika kweempwa katana bbapatizyigwa? Imwaapostolo Paulo upandulula kuti: “Aswebo mbotwakabede, alimwi twakali kutobela zisusi zyabuumi bwabuntunsi.” (Baefeso 2:3, Ci) Katutanaba aluzibo lwamakanze aa Leza, twakali kupona mbubapona bantu munyika, kweelana aziyanza alimwi azyeelelo zyayo. Buumi bwesu bwakali kweendelezyegwa a leza waansi ano, Saatani. (2 Ba-Korinto 4:4) Nokuba boobo, mbotwazyiba makanze aa Leza, twasala ‘kutaceenda muzisusi zyanyama pele mumakanze aa Leza.’—1 Petro 4:2.
7 Oobu buumi bupya bulagwasya munzila zinji. Ikapati, bupa coolwe cakuba acilongwe cibotu a Jehova, calo Davida ncaakakozyanisya akutambwa kunjila “mucilao” a “mucilundu cisalala” ca Leza—icoolwe citaliboteli. (Intembauzyo 15:1) Masimpe, Jehova takonzyi kutamba kufwumbwa muntu, pele balikke aabo ‘beenda cakulondoka akucita bululami, ibaamba lusinizyo mumyoyo yabo.’ (Intembauzyo 15:2) Akaambo kabukkale busiyene-siyene motwakabede katutanaiya kasimpe, ikutobela zyeelelo eezi inga kwayandika kuti tucince mumbazu zimwi—ibukkale bwesu alimwi ambotubede. (1 Ba-Korinto 6:9-11; Ba-Kolose 3:5-10) Iciyootukulwaizya kucinca munzila eeyi nkweempwa—ikuusa cini-cini kujatikizya bukkale bwesu bwamusyule alimwi akuyandisya kukkomanisya Jehova. Eeci cipa kuti muntu acince cakumaninina—ikutacipona buumi bwakulibikkila buyo maano omwini, ibwanyika pele ikupona buumi bukkomanisya Leza.—Incito 3:19.
8. Ino tulyaaba buti, alimwi kulyaaba kweendelana buti alubbapatizyo?
8 Cibeela cabili camubuzyo wakusaanguna walubbapatizyo cibuzya basikubbapatizyigwa naa bakalyaaba kuli Jehova kucita kuyanda kwakwe. Kulyaaba nintaamu iiyandika kapati yeelede kutolwa katana bbapatizyigwa muntu. Kulacitwa mumupailo, oomo motwaamba luyando lwesu lwakwaaba buumi bwesu kuli Jehova kwiinda muli Kristo. (Ba-Roma 14:7, 8; 2 Ba-Korinto 5:15) Mpoonya Jehova ulaba Simaleleesu a Mukamwini, alimwi mbuli Jesu, andiswe tulabotelwa kucita kuyanda kwa Leza. (Intembauzyo 40:8; Ba-Efeso 6:6) Eeci cisyomezyo cicitwa amoyo woonse kuli Jehova cicitwa buyo ciindi comwe. Mbwaanga tulalyaaba katuli tolikke, nokuba boobo, ikutondezya kubuleya mubuzuba bwakubbapatizyigwa kupa kuti boonse bazyibe kuti twakalyaaba camoyo woonse kuli Taateesu wakujulu.—Ba-Roma 10:10.
9, 10. (a) Ino kucita kuyanda kwa Leza kubikkilizya nzi? (b) Ino mbuti noziba nkumekume zya Nazi mbozyakamvwisya mbokuyandika kulyaaba kwesu?
9 Ino kutobela cikozyanyo ca Jesu mukucita kuyanda kwa Leza kubikkilizya nzi? Jesu wakaambila basikwiiya bakwe kuti: “Kuti muntu kayanda kunditobela, aliimye abweze [cisamu cakwe cakupenzyezya, NW] elyo ulanditobela.” (Matayo 16:24) Aawa wakaamba zintu zyotatwe nzyotweelede kucita. Kusaanguna, ‘tulaliimya.’ Munzila imwi, tatutobeli zisusi zyakulibikkila buyo maano omwini pele tulatobela lulayo amalailile aa Leza. Cabili, ‘tulalibwezyela cisamu cakupenzyezya.’ Kuciindi naakali kupona Jesu, cisamu cakupenzyezya cakali cintu ciiminina masampu akupenga. Mbotuli Banakristo, tulazumina kwaamba kuti zimwi ziindi tulakonzya kupenga akaambo kamakani mabotu. (2 Timoteo 1:8) Nokuba kuti nyika ilakonzya kutusampaula naa kutukazya, mbuli Kristo ‘tulaubaula buusu,’ katukkomene mukuzyiba kuti tukkomanisya Leza. (Ba-Hebrayo 12:2) Camamanino, tulazumanana ‘kumutobela’ Jesu.—Intembauzyo 73:26; 119:44; 145:2.
10 Cikkomanisya ncakuti, nobaba basikutukazya balizyi mbokuyandika kulyaaba Bakamboni ba Jehova nkobalyaaba kuli Leza kuti bamubelekele cakumaninina. Mucikozyanyo, mucilabba cabuzike ca Buchenwald mu Nazi Germany, Bakamboni ibatakaya ansi mulusyomo lwabo bakeelede kusaina majwi aaya aasimbidwe aakuti: “Ndicili Sikwiiya Bbaibbele alimwi kunyina nendiya kuleka kusyomeka kucikonke ncindakakonka kuli Jehova.” Cakutadooneka, eeci citondezya mbobalimvwa babelesi ba Leza boonse ibalyaabide alimwi basyomeka!—Incito 5:32.
Kuzyibwa Kuti Muli Kamboni wa Jehova
11. Ncoolwe nzi ncabaaco ooyo wabbapatizyigwa?
11 Imubuzyo wabili ubuzya sikubbapatizyigwa naa ulamvwisya kuti lubbapatizyo ndwabbapatizyigwa lumuzyibya kuti ngu Kamboni wa Jehova. Amana kubbizyigwa, uba mubelesi uusalidwe a Jehova uuyitwa azina lyakwe. Eeci ncoolwe cilibedelede alimwi mmukuli mulemu kapati. Alimwi ooyo wabbapatizyigwa ulaba abulangizi bwakufwutuka kukabe kutamani kufwumbwa buyo kuti wazumanana kusyomeka kuli Jehova.—Matayo 24:13.
12. Mmukuli nzi uuboola acoolwe cakwiitwa azina lya Leza?
12 Masimpe, ncoolwe cilibedelede ikwiitwa azina lya Leza singuzuzyoonse, Jehova. Imusinsimi Mika wakati: “Misyobo yoonse ileenda muzina lyamizimu yayo, aswebo tuleenda muzina lya-Jehova Leza wesu lyoonse mane kukabe kutamani.” (Mika 4:5) Nokuba boobo, coolwe eeci cilabikkilizya amukuli. Tweelede kusoleka kupona munzila iipa kuti zina ndyotwiitwa andilyo lilemekwe. Mbubwenya Paulo mbwaakaibalusya Banakristo mu Roma, ikuti muntu kataciti nzyayiisya, izina lya Leza “lilasampaulwa,” naa kuba ampuwo ibi.—Ba-Roma 2:21-24.
13. Nkaambo nzi babelesi ba Jehova balyaabide ncobali amukuli wakupa bumboni kujatikizya Leza wabo?
13 Imuntu waba Kamboni wa Jehova, ulauzumina amukuli wakukambauka kujatikizya Leza wakwe. Jehova wakaambila cisi ca Israyeli cakalyaabide kulinguwe kuti babe bakamboni bakwe kutegwa bape bumboni bwabu Leza bwakwe butamani. (Isaya 43:10-12, 21) Pele tiibakasyomeka mumulimo ooyu, aboobo Jehova wakabakaka. Mazuba ano, Banakristo beni-beni balikkomene ikuba acoolwe cakupa bumboni kujatikizya Jehova. Tulacita oobo akaambo kakuti tulamuyanda, alimwi tuyandisya kuti izina lyakwe lisalazyigwe. Ino ncinzi cinga catupa kuumuna mbwaanga tujisi makani aakasimpe kujatikizya Taateesu wakujulu amakanze aakwe? Tulimvwa bwakalimvwa mwaapostolo Paulo naakati: “Milimo eyo nsikonzyi kwiikaka. Maawe kulindime nintakambauka Makani Mabotu.”—1 Ba-Korinto 9:16.
14, 15. (a) Ino mbuti mbunga ya Jehova mboitugwasya kuyaambele kumuuya? (b) Nzipego zili buti nzyotujisi zitugwasya kumuuya?
14 Imubuzyo wabili alimwi wiibalusya sikubbapatizyigwa zyamukuli ngwajisi wakubelekela amwi ambunga ya Jehova yeendelezyegwa amuuya uusalala. Tatweelede kulizandula notubelekela Leza, tuyandika kugwasyigwa akukulwaizyigwa a “babunyina” boonse. (1 Petro 2:17; 1 Ba-Korinto 12:12, 13) Mbunga ya Leza ilayandika kapati kutegwa tuyaambele kumuuya. Ilatupa mabbuku manji aapandulula Bbaibbele alo aatugwasya kuyaambele muluzibo lwini-lwini, ikusala camaano notuli mumapenzi, alimwi akuba acilongwe ciyumu a Leza. Mbubwenya mbuli mutumbu uubona kuti mwanaakwe ulalya kabotu alimwi akulanganizyigwa, awalo “muzike musyomesi uucenjede” ulatupa cakulya cakumuuya cinji aciindi ceelede kutegwa tuyaambele kumuuya.—Matayo 24:45-47; 1 Ba-Tesalonika 2:7, 8.
15 Lyamiswaangano yaamvwiki, bantu ba Jehova balajana lwiiyo luyandika alimwi balakulwaizyigwa kuba Bakamboni ba Jehova basyomeka. (Ba-Hebrayo 10:24, 25) Icikolo Camulimo Weendelezyegwa a Leza cituyiisya kwaanguluka notwaambaula kubuleya, alimwi Muswaangano wa Mulimo ulatuyiisya kucizyiba kwaamba mulumbe ngotujisi. Kumiswaangano alimwi akwiinda mukulibalila tobeni mabbuku aapandulula Bbaibbele, tulakonzya kubona muuya wa Jehova kaubeleka, kuusololela mbunga yakwe. Kwiinda muzintu eezi nzyotupegwa lyoonse, Leza ulatucenjezya kujatikizya ntenda zikonzya kuboola, ulatuyiisya kuba babelesi bacibwene alimwi ulatugwasya kupakamana kumuuya.—Intembauzyo 19:7, 8, 11; 1 Ba-Tesalonika 5:6, 11; 1 Timoteo 4:13.
Icipa Kubbapatizyigwa
16. Ncinzi citukulwaizya kulyaaba kuli Jehova?
16 Imibuzyo yalubbapatizyo yobilo iibalusya basikubbapatizyigwa mboluyandika lubbapatizyo lwamumeenda alimwi amikuli iiboola. Ino ncinzi ceelede kubakulwaizya kusala kubbapatizyigwa? Tuba basikwiiya babbapatizyidwe ikutali akaambo kakuti kuli uutusinikizya, pele akaambo kakuti Jehova ‘nguutukwela.’ (Johane 6:44) Mbwaanga “Leza nduluyando,” uleendelezya bubumbo caluyando ikutali calunya. (1 Johane 4:8) Tulamuyanda Jehova akaambo kabube bwakwe buli kabotu alimwi ambwatweendelezya. Jehova wakatupa Mwanaakwe simuzyalwa alikke alimwi watusyomezya buumi bwakumbele buli kabotu. (Johane 3:16) Akaambo kaceeci, tulakulwaizyigwa kumupa—ikwaaba—buumi bwesu kulinguwe.—Tusimpi 3:9; 2 Ba-Korinto 5:14, 15.
17. Ino nkuunzi nkutwatakalyaaba?
17 Tatulyaabi kumuzeezo ngobajisi bantu naa kumulimo uugaminide, pele tulyaaba kuli Jehova. Imulimo ngwajisi Leza kubantu bakwe uya kucinca, pele ikulyaaba kwabo kulinguwe kunyina nokuyoocinca. Mucikozyanyo, ncaakaambide Abrahamu kucita cakali indene kapati ancaakaambila Jeremiya kuti acite. (Matalikilo 13:17, 18; Jeremiya 1:6, 7) Pele boonse bobilo bakazuzikizya mulimo uugaminide ngwaakabapede Leza kuti bacite akaambo kakuti bakali kumuyanda Jehova alimwi bakali kuyandisya kucita kuyanda kwakwe cakusyomeka. Kuciindi eecino cakumamanino, basikutobela Kristo boonse babbapatizyidwe balasoleka kutobela malailile aa Kristo aakukambauka makani mabotu aa Bwami akugwasya bantu kuba basikwiiya. (Matayo 24:14; 28:19, 20) Ikuucita amoyo woonse mulimo ooyo nenzila mbotu yakutondezya luyando lwesu kuli Taateesu wakujulu alimwi akuti masimpe tulilyaabide kulinguwe.—1 Johane 5:3.
18, 19. (a) Ino ncinzi ncotwaambila buleya notubbapatizyigwa? (b) Ncinzi ciyoolangwa-langwa mucibalo citobela?
18 Cakutadooneka, lubbapatizyo lupa zilongezyo zinji, pele nintaamu yeelede kukkalila ansi kuyeeya. (Luka 14:26-33) Itondezya kusala kwalo kweelede kubikkilwa maano kapati kwiinda mikuli ili yoonse. (Luka 9:62) Notubbapatizyigwa, mubwini twaambila buleya kuti: “Oyu Leza ngu-Leza wesu lyoonse alyoonse; nguuyootweenzya mane kusikila kulufu.”—Intembauzyo 48:14.
19 Icibalo citobela ciyoolanga-langa mibuzyo iikonzya kubuka kujatikizya lubbapatizyo lwamumeenda. Sena inga kuli twaambo tumvwika tukonzya kupa muntu kutayanda kubbapatizyigwa? Sena myaka yakuzyalwa yeelede kuba akaambo? Ino mbuti boonse mbobakonzya kutondezya bulemu ciindi calubbapatizyo?
Sena Inga Mwapandulula?
• Nkaambo nzi Munakristo aumwi ncayandika kweempwa katana bbapatizyigwa?
• Ino kulyaaba kuli Leza kubikkilizya nzi?
• Mmikuli nzi iiboola acoolwe cakwiitwa azina lya Leza?
• Ino ncinzi ceelede kutukulwaizya kusala kubbapatizyigwa?
[Mibuzyo yaciiyo]
Kabbokesi/[Cifwanikiso icili apeeji 20]
Mibuzyo Yobilo Yalubbapatizyo
Ikwiinda mucipaizyo ca Jesu Kristo, sena mweempwa zibi zyanu akulyaaba kuli Jehova kuti mucite kuyanda kwakwe?
Sena mulizyi kuti kulyaaba akubbapatizyigwa kwanu zimuzibya kuba umwi wa Bakamboni ba Jehova ibazulilwa mumbungano ya Leza iisololelwa amuuya?
[Cifwanikiso icili apeeji 21]
Kulyaaba ncisyomezyo cizwa mumoyo cicitwa kuli Jehova mumupailo
[Cifwanikiso icili apeeji 23]
Mulimo wesu wakukambauka upa bumboni bwakulyaaba kwesu kuli Leza