Baroma 10:1-21
10 Bakwesu, nceyandisya mumoyo wangu akubakombelezyela kuli Leza bana Israyeli ncakuti bafwutulwe.+
2 Inzya, ndilazumina kuti mbasungu kubelekela Leza,+ pele ikutali kweelana aluzyibo lwini-lwini.
3 Nkaambo mbwaanga tiibakabuzyi bululami bwa Leza,+ pele bakali kusoleka kulibikkila bululami bwabo beni,+ tiibakalibombya pe kubululami bwa Leza.+
4 Nkaambo Kristo ngamamanino aa Mulawo,+ kutegwa muntu uuli woonse uusyoma abe mululami.+
5 Nkaambo kujatikizya bululami ibujanwa akaambo ka Mulawo, Musa wakalemba kuti: “Muntu uucita zintu eezyi unoopona akaambo kanzizyo.”+
6 Pele bululami bujanwa akaambo kalusyomo bwaamba kuti: “Utalibuzyi mumoyo wako+ kuti, ‘Nguni utiitante kujulu?’+ nkokuti, kuyooselusya Kristo,
7 naa kuti, ‘Nguni utiinjile mumulindi uutagoli?’+ nkokuti, kuyoobusya Kristo kuzwa kubafwu.”
8 Pele ino bwaamba nzi? Bwaamba kuti, “Ijwi lili afwaafwi andinywe, lili mukanwa lyanu amumoyo wanu”;+ nkokuti, “ijwi” lyalusyomo, eelyo ndyotukambauka.
9 Nkaambo ikuti kamwaambilizya caantangalala amulomo wanu, kuti Jesu ngo Mwami,+ akusyoma mumyoyo yanu kuti Leza wakamubusya kuzwa kubafwu, muyoofwutulwa.
10 Nkaambo muntu utondezya lusyomo ndwajisi mumoyo kutegwa abe mululami, pele amulomo wakwe ulaambilizya antangalala+ kutegwa ajane lufwutuko.
11 Nkaambo lugwalo lwaamba kuti: “Kunyina naba omwe uusyoma mulinguwe uuyootyompwa.”+
12 Nkaambo kunyina kwiindana akati kamu Juda amu Giriki.+ Mwami wabo boonse ngumwi buyo, uupa zileleko zinji* kuli boonse aabo bamwiita.
13 Nkaambo “muntu woonse wiita zina lya Jehova* uyoofwutulwa.”+
14 Pele ino balamwiita buti ooyo ngobatasyomi? Alimwi ino mbuti mbobakonzya kumusyoma ooyo ngobatanamvwide? Alimwi ino balamvwa buti kakunyina uukambauka?
15 Alimwi ino balakambauka buti batatumwa?+ Mbubonya mbokulembedwe kuti: “Taaliboteli kaka imaulu aabaabo baambilizya makani mabotu aazintu zibotu!”+
16 Nokuba boobo, tabali boonse bakaazumina makani mabotu. Nkaambo Isaya waamba kuti: “Jehova,* ino nguni wasyoma zintu nzyobakamvwa kulindiswe?”*+
17 Aboobo lusyomo lujanwa buyo lyamana kumvwugwa jwi.+ Alyalo jwi lilamvwugwa muntu naamba kujatikizya Kristo.
18 Pele andibuzye kuti, Sena tiibakamvwa? Nkaambo kayi, “majwi aabo akamvwugwa munyika yoonse, alimwi mulumbe wabo wakamwaika kusikila kumagolelo aanyika.”+
19 Pele alimwi andibuzye kuti, Sena bana Israyeli tiibakazyiba?+ Kusaanguna Musa waamba kuti: “Ndiyoomupa kuba amunyono kwiinda mubantu ibatali cisi; ndiyoomunyemya kwiinda mucisi cabufwubafwuba.”+
20 Pele Isaya ulaamba cabusicamba kuti: “Ndakajanwa abaabo ibatakali kundilangaula;+ ndakazyibwa abaabo ibatakali kubuzya zyandime.”+
21 Pele kujatikizya bana Israyeli waamba kuti: “Buzuba boonse ndalikutandabika maanza aangu kubantu bataswiilili alimwi basicinguni.”+
Bupanduluzi buyungizyidwe
^ Naa “mwaabi.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “mulumbe wesu?”
